Read digo Zaburi 5 Bible Online

Zaburi 5 - digo bible

Zaburi 5

¹Kpwa chilongozi wa aimbadzi. Kuhumira vivoti. Zaburi ya Daudi. Ee Mwenyezi Mlungu, phundza higa nikuambirago, na usikire kuula kpwangu.

²Sikira chiriro changu, Mlungu wangu na mfalume wangu, mana uwe ndiwe nikuvoyaye.

³Ligundzu uwe Mwenyezi Mlungu, ukuphundza sauti yangu. Ligundzu nkukuvoya,[1] chisha nkagodzera unijibu.

⁴Uwe u Mlungu usiyehamirwa ni uyi, tsona kusagala na atu ayi.

⁵Anaodzikarya taaweza kuima mberezo, mana ukumena atu ahendao mai.

⁶Uwe, ukuangamiza agombao handzo; Mwenyezi Mlungu nkuzira aolagadzi na atu a handzo.

⁷Ela kpwa sababu ya unji wa mendzwayo nindainjira mwako nyumbani, na kuabudu kpwa kukuogopha ndani ya Nyumbayo takatifu.

⁸Ee Mwenyezi Mlungu, nilongoza nihende hakiyo, kpwa sababu ya maadui gangu, na ugolose njirayo mbere zangu ili niilunge.

⁹Anagobisha sigo ga kpweli, maazo gao ni ga kuangamiza atu. Miro zao ni dza mbira za wazi, [2] anahumira ndimi zao kugomba handzo.

¹⁰Uwe Mlungu, atiye adabu kpwa uasi wao; henda mipango yao iaangamize enye. Azole kpwa sababu ya unji wa dambi zao, mana akakuasi.

¹¹Ela osi anaokuchimbirira naahererwe, tsona aimbe na raha hata kare na kare. Rinda anaokumendza, ili aphahe kupiga njerejere kpwa sababuyo.

¹²Mana kpwa kpweli uwe Mwenyezi Mlungu ukujaliya enye haki; na mendzwayo nkuarinda dza ngao.