Read digo Zaburi 51 Bible Online

Zaburi 51 - digo bible

Zaburi 51

¹Kpwa chilongozi wa aimbadzi. Zaburi yotungbwa ni Daudi, wakati nabii wa Mlungu Nathani ariphomwedzera bada ya kuzinga na Bathisheba. Nionera mbazi, ee Mlungu, sawa-sawa na mendzwayo isiyosika. Futa uyi wangu, kulengana na unji wa mbazizo.

²Niusira makosa gangu kabisa, nitsusa dambi zangu.

³Mana namanya makosa gangu, na dambi zangu nazitambukira chila wakati.

⁴Uwe macheyo ndiwe nchiyekuhendera dambi, nkahenda mai mberezo. Kpwa hivyo mashitakago ni ga kpweli, na uamulio ni wa haki.

⁵Mimi ni mwenye dambi hangu nivyalwe, yani, ni mui hangu ndanini mwa mayo.

⁶Uwe unafwahirwa ni mutu ariye mkpweli mwakpwe moyoni, kpwa hivyo nifundza ikima mwangu moyoni.

⁷Nitsusa dambi zangu na muhisopo,[12] nami nindatsuka; niogesa niere, nkale mwereru kuriko bafuta.

⁸Nihenda nihererwe na nisikire raha, Nihenda mimi, uriyenivundza-vundza nikale na raha.

⁹Usitambukire dambi zangu, na ufute uyi wangu wosi.

¹⁰Niumbira moyo swafi, ee Mlungu, na roho yangu uihende luphya na ya kuhurira.

¹¹Usinike kure nawe; na usiniusire Rohoo Mtakatifu.

¹²Niuyizira raha ya wokofuo, na uniphe roho ya kugbwira ulondago.

¹³Ndipho nindaafundza akosao njirazo, na enye dambi andakuuyira.

¹⁴Ee Mlungu, unitivyaye, nitivya na dambi ya kuolaga, nami nindaimba kuhusu ukombolio na raka ra dzulu.

¹⁵Ee Mwenyezi Mlungu, nihendesa nigombe, nami nindatangaza sifwazo.

¹⁶Mana uwe kuhamirwa ni sadaka za nyama; ningekulavira sadaka za kuochwa usingeziphokera.

¹⁷Sadaka Mlungu alondayo ni roho iriyovundzika. Mutu mwenye moyo uriovundzika na kutubu kabisa, uwe Mlungu, undamphokera.

¹⁸Uonere mbazi mudzi wa Sayuni na uuhendere manono, uzidzenge tsona kuta za Jerusalemu.

¹⁹Hipho ndiphohamirwa ni sadaka za sawa, sadaka za kuochwa na sadaka za kuocha nyama mzima; hipho ndipholaviwa ndzau phatupho pha kulavira sadaka.