Read digo Zaburi 56 Bible Online

Zaburi 56 - digo bible

Zaburi 56

¹Kpwa chilongozi wa aimbadzi. Kuhumira sauti ya “Njiya mpore akalaye kure.” Wira wa Daudi arioutunga bada ya kugbwirwa ni Afilisti hiko Gathi. Nionera mbazi, ee Mlungu, mana atu ananishambuliya. Aviha ananionera dii.

²Aviha angu ananizoresa mutsi wosi, hinyo anaoheha nami kpwa kudzikarya ni anji sana.

³Wakati naogopha nindakukuluphira uwe.

⁴Namkuluphira Mlungu ambaye nenore naritogola, namkuluphira Mlungu bila wuoga. Kpwani mwanadamu andanihendani?

⁵Mutsi wosi ananifyakatsira ananiazira mai chila siku.

⁶Nkukutana akapanga na akanioteya, nkulolato gosi nihendago, kuno a tayari kuniolaga.

⁷Ariphe sawa na uyi wao, ee Mlungu, aangamize kpwa tsukizizo!

⁸Uwe unamanya vira nirivyohangaika, matsozi gangu unagatambukira, dze, gano gosi tagaandikirwe mwako chitabuni?

⁹Hipho nikuvoyapho maadui gangu nkushindwa. Mino namanya kukala Mlungu a uphande wangu.

¹⁰Namkuluphira Mlungu ambaye nenore naritogola, namkuluphira Mwenyezi Mlungu ambaye nenore naritogola.

¹¹Namkuluphira Mlungu bila wuoga. Pho kpwani mwanadamu andanihendani?

¹²Mino lazima niuse naziri yangu kpwako, ee Mlungu, nindakulavira sadaka za shukurani.

¹³Mana uwe ukaitivya roho yangu na chifo ee, ukanirinda nisigbwe nikale ndasagala phephi na uwe, ee Mlungu, pharipho na mwangao ulavyao uhai.