Read digo Zaburi 57 Bible Online

Zaburi 57 - digo bible

Zaburi 57

¹Kpwa chilongozi wa aimbadzi. Kuhumira sauti ya “Usibanange.” Wira wa Daudi arioutunga bada ya kumchimbira Sauli na kpwendadzifwitsa pangani. Nionera mbazi, ee Mlungu, nionera mbazi mana usalama wangu naulorera kula kpwako. Mino ndachimbirira mwako maphani hadi phuto riolagaro ndiphohurira.

²Namririra Iye Ariye Dzulu Kuriko Vyosi, Mlungu anayenitimizira achigonipangira.

³Andanihumira msada kula mlunguni na kunitivya, andaatiya waibu hinyo anaonishambuliya. Mlungu andanionyesa mendzwaye isiyosika na uaminifuwe.

⁴Nkazungulukpwa ni simba aroho, a kurya atu, meno gao avi ni mikuki na mivi, ndimi zao avi ni panga kali.

⁵Uwe Mlungu, togolwa ko dzulu mlunguni, ngumayo naigote duniani kosi.

⁶Akanihegera chimia ili anigbwire, hata nafsi yangu inasononeka. Akanitsimbira dibwa phangu njirani ela akagbwa enye mumo.

⁷Moyo wangu tauna shaka, ee Mlungu, moyo wangu tauna shaka! Nindaimba na kukuhendera shangbwe!

⁸Lamuka, uwe moyo wangu. Lamuka, uwe ngephephe na zeze! Nindalamuka chiti cha ngutu.

⁹Nindakushukuru uwe Mwenyezi Mlungu kahi za atu, nindakuimbira mawira ga kukutogola kahi za mataifa.

¹⁰Mana mendzwayo isiyosika i dzulu hata inafika mlunguni, uaminifuo unafika mainguni.

¹¹Togolwa, ee Mlungu, kutsupa mlunguni! Uaminifuo naugote dunia yosi!