Read digo Zaburi 61 Bible Online

Zaburi 61 - digo bible

Zaburi 61

¹Kpwa chilongozi wa aimbadzi. Kpwa kuhumira vifwaya vya nyugbwe. Wira wa Daudi. Sikira chiriro changu, ee Mlungu, phundza mavoyo gangu.

²Ninakuririra kula pembe za dunia, kuno nkavundzika moyo. Nilongoza uniphirike mwambani urio dzulu sana kpwa nikale salama.

³Mana uwe ndiwe chimbiriro rangu, u ngome yangu ya nguvu ya kunichinga na maadui.

⁴Navoya nikale mwako nyumbani hata kare na kare! Niphahe chimbiriro tsini ya maphago!

⁵Mana uwe, ee Mlungu, ukasikira naziri zangu, uwe ukanipha urisi wa nyo akuogophao.

⁶Mjaliye mfalume aishi siku nyinji, miakaye ienderere chiasi cha vivyazi vyosi.

⁷Naatawale hata kare na kare mberezo, ee Mlungu, mrinde kpwa mendzwayo isiyosika na uaminifuo.

⁸Kpwa hivyo nindaimba mawira ga kukutogola, kuno nausa naziri zangu siku bada ya siku.