Read digo Zaburi 62 Bible Online

Zaburi 62 - digo bible

Zaburi 62

¹Kpwa chilongozi wa aimbadzi. Kuhumira sauti ya Jeduthuni. Zaburi ya Daudi. Nkahurira, namgodza Mlungu bahi, wokofu wangu ula kpwakpwe.

²Iye ndiye mwamba wangu na wokofu wangu, ngome yangu, sindakakamiswa ni utu.

³Pho mino mundanishambuliya hadi rini? Mwi mosi mundanipiga hadi rini, mino ambaye ni dza chambaza chirichoweka dza ukuta unaoandza kubomoka?

⁴Mkapanga kunibwaga mnibanangire ishima yangu, munahamirwa nkugomba handzo tu, maneno genu ni ga kubariki ela mioyoni mwenu munalani.

⁵Nkahurira namgodzera Mlungu bahi mana ndiye kuluphiro rangu.

⁶Iye macheye ndiye mwamba na wokofu wangu, ndiye ngome yangu, sindakakamiswa ni utu.

⁷Wokofu wangu na ishima yangu vila kpwa Mlungu. Mlungu ndiye mwamba wangu wa nguvu na chimbiriro rangu.

⁸Mwi atu, mkuluphireni Mlungu wakati wosi, muambireni gosi garigo mwenu mioyoni. Mlungu ndiye chimbiriro rehu.

⁹Anadamu osi ni dza mseho, osi avyere kpwa adide, taafwaha chitu. Tsona uchiapima mkpwotse wao taufika hata kilo mwenga, osi phamwenga achipimwa mkpwotse wao taufika hata wa pumuzi.

¹⁰Msiadamire kuonera atu, sihendeni ngulu na mali ya wiivi, napho utajiri ukaenjerezeka msiuadamire.

¹¹Mlungu wagomba limwenga, higa nkagasikira kano mbiri, kukala uwezo ni wa Mlungu,

¹²na piya mendzwa isiyosika ni yako uwe, Mwenyezi Mlungu. Mana uwe unamripha mwanadamu kulengana na mahendoge.