Read digo Zaburi 71 Bible Online

Zaburi 71 - digo bible

Zaburi 71

¹Nikakuchimbirira uwe, ee Mwenyezi Mlungu, usiniriche nikagbwirwa ni waibu.

²Niokola na unitivye kpwa sababu u wa haki, sikiroro na riniphundze na unitivye.

³Kala mwamba na chimbiriro rangu, ngome ya nguvu ya kuniokola mana uwe u mwamba wangu na ngome yangu.

⁴Nitivya, ee Mlungu wangu, kula mikono ya atu ayi, kula mikononi mwa atu ayi na katili.

⁵Mana uwe (bwana) Mwenyezi Mlungu u kuluphiro rangu, uwe ndiwe ninaye kuadamira hangu wanache wangu.

⁶Nikakukuluphira uwe hangu nivyalwe, uwe ndiwe uriyenituluza ndanini mwa mayo. Mimi ndakutogola uwe siku zosi.

⁷Maisha gangu gakakala ga kuangalaza kpwa anji ela uwe u chimbiriro rangu ra nguvu.

⁸Kanwa yangu inakutogola uwe na kukutukuza dii yosi.

⁹Nchedza nchitsakala usinitsuphe, nchedza fikira wakati wa kukala sina nguvu usiniriche.

¹⁰Mana maadui gangu ganagomba mai kunihusu, hinyo anaolonda kuniolaga anapanga njama.

¹¹Na anaamba, “Mlungu akaniricha, mlungeni mkamgbwire mana taphana mutu wa kumtivya.”

¹²Ee Mlungu, usikale kure nami, henda upesi wedze uniterye, ee Mlungu wangu.

¹³Hinyo anishitakio naagbwizwe haya na aangamizwe, hinyo alondao kunilumiza, naaphahwe ni waibu na akoserwa ishima.

¹⁴Ela mino nindaenderera kukala na matumaini na nindakutogola uwe zaidi na zaidi.

¹⁵Kanwa yangu indagomba kuhusu mahendogo ga haki, na kuhusu mahendogo ga wokofu dii yosi, mana isabuye ikatsupa ufahamu wangu.

¹⁶Nindakpwedza nitangaze mahendo makulu ga Mwenyezi Mlungu, nindagomba kukala uwe macheyo ndiwe mwenye haki.

¹⁷Ee Mlungu, ukanifundza hangu wanache wangu, na nchere semurira mahendogo ga ajabu.

¹⁸Kpwa hivyo hata ndiphotsakala na kukala na komvwi, ee Mlungu, usiniriche, hadi vivyazi vyosi vyedzavyo nivitangazirwe nguvuzo.

¹⁹Na haki uriyo nayo, ee Mlungu, inafika mlunguni. Uwe ukahenda mambo makulu, ee Mlungu, ni ani ariye dza uwe?

²⁰Uwe uchiyenihenda nitsupire mashaka manji makulu undanitiya nguvu tsona. Undanituluza vivwa vya duniani unirehe dzulu tsona.

²¹Uwe undaenjereza ishima yangu na uniphoze marenda tsona.

²²Piya nindakutogola na ngephephe kpwa sababu ya uaminifuo, ee Mlungu wangu. Nindaimba mawira ga kukutogola na zeze uwe Mtakatifu wa Iziraeli.

²³Nindapiga njerejere nikuimbirapho mawira ga kukutogola uwe. Nafsi yangu uchiyoitivya piya indakutogola.

²⁴Lilimi rangu rindagomba kuhusu msadao wa haki dii yosi, mana hinyo ariolonda kunilumiza akaaibishwa na kuvundzirwa ishima.