Read digo Zaburi 72 Bible Online

Zaburi 72 - digo bible

Zaburi 72

¹Zaburi ya Selemani. Ee Mlungu, mjaliye mfalume akale na uamuli wa haki na umuphe mwana wa mfalume hakiyo.

²Na aweze kuamula atuo irivyo sawa na agayi aamule na haki!

³Myango nairehere atu mafwanikiyo na vidzango virehe haki.

⁴Mfalume na akanire agayi kpwenye tsi, aterye ana a achiya na kuangamiza atu anaoonera ayawao.

⁵Andakuogopha wakati wosi wa kuaka kpwa dzuwa na wakati wa kuala kpwa mwezi kahi ya vivyazi vyosi!

⁶Naakale dza mvula inyayo dzulu ya nyasi chizokatwa, dza mawasa gatiyavyo arizi madzi!

⁷Wakati wa maishage gosi haki indatawala na kukale na amani hadi mwezi ukale taupho tsona!

⁸Naatawale kula bahari hadi bahari na kula muho Yufurati hadi mwisho wa dunia!

⁹Avihae naamlavire ishima na maaduige galambe mitsanga.

¹⁰Afalume a Tarishishi na a visuwa andareha kodi, afalume a Sheba na Seba andamrehera zawadi.

¹¹Afalume osi andamsujudiya na atu a mataifa ganjina gosi amuhumikire.

¹²Mana andamkombola achiyetsowekpwa amuririraye na mgbwayi asiye na mutu wa kumterya.

¹³Anaoonera imani anyonje na atsowi, na anativya maisha ga atsowekpwao.

¹⁴Anaakombola na kuonerwa na fujo mana kpwakpwe iye maisha gao gana samani kulu.

¹⁵Mfalume na akale na maisha mare aphokere zawadi ya zahabu kula Sheba, atu amuvoyere Mlungu siku zosi na kumvoyera baraka za Mlungu dii yosi!

¹⁶Tsi naijaliwe ikale na mtsere munji, masuche ganazugbwa kpwenye virere vya vidzango, matundage gakale dza ga Lebanoni, atu midzini akale anji dza nyasi!

¹⁷Dzinare naridumu hata kare na kare, sifwaye nono naienderere wakati wosi dzuwa rialapho! Atu naahumire dzinare kuvoya baraka na mataifa ganjina gosi gamuihe ariyeajaliwa.

¹⁸Mwenyezi Mlungu naatogolwe, Mlungu wa Iziraeli ambaye iye macheye ndiye ahendaye mambo ga ajabu.

¹⁹Dzinare nono naritogolwe hata kare na kare dunia yosi naigote ngumaye. Amina, Amina!

²⁰Huno ndio mwisho wa mavoyo ga Daudi mwana wa Jese.