Read digo Zaburi 74 Bible Online

Zaburi 74 - digo bible

Zaburi 74

¹Wira wa Asafu. Ee Mlungu, mbona ukahutsupha kamare? Kpwa utu wani unatsukirirwa atuo, mangʼondzi ugarisago?

²Tambukira kundi ra atuo ambaro unaro hangu kare, ambaro warikombola rikale mbari ndiyo kurisi tambukira mwango wa Sayuni phatu uriphosagala.

³Tsupa kahi za magandzo gaga ga hangu kare, adui akabananga chila chitu kpwenye nyumba ya kuvoya Mlungu.

⁴Avihao ananguruma kahi za phatupho phatakatifu akaika himo bendera zao dza ishara ya ushindi.

⁵Akaiga mtsangi wa kuni anayekata mihi na mbadzoye.

⁶Avundza-vundza miryango ya nyumba ya kuvoya Mlungu kpwa kuhumira mbadzo na nyundo zao.

⁷Atiya moho phatupho phatakatifu, achitiya makalogo najisi.

⁸Akusudiya kuhuangamiza osi bu, aocha chila phatu hunaphokutana kukuabudu Mlungu tsi yosi.

⁹Tahuona ishara zehu, takuna tsona nabii yeyesi na taphana amanyaye hali indakala hivi hadi rini.

¹⁰Ee Mlungu, adui andakutseka hadi rini? Dze, maadui andalaphiza dzinaro hadi rini?

¹¹Mbona ukakundza mkpwonoo? Mbona kuugolosa?

¹²Hata vivyo uwe Mlungu u mfalume wehu hangu kare ukahenda mahendo ga kutivya kahi za tsi.

¹³Kpwa utawalao mkpwulu waganya bahari, wabunda vitswa vya madzinyama makulu ga baharini.

¹⁴Uwe wabunda vitswa vya nyama mkpwulu aihwaye Leviathani uchimlavya dza chakurya kpwa nyama a tsakani.

¹⁵Uwe ndiwe uriyehumbula pula za madzi na vidzuho na waumisa madzi myuho mikulu.

¹⁶Mutsi ni wako na usiku ni wako, uwe waumba mwezi na dzuwa.

¹⁷Ukaika miphaka yosi ya dunia, ukapanga wakati wa kazikazi na wakati wa mnyevu.

¹⁸Ee Mwenyezi Mlungu, tambukira vyo maaduigo gakuberavyo, na vyo atu azuzu alaphizavyo dzinaro.

¹⁹Usiriche uzima wa njiyao, kpwa nyama a tsakani, usiyale maisha ga aonerwao, hata kare na kare.

²⁰Tambukira chilagane urichoika naswi, tsi ikaodzala fujo chila phatu phenye jiza.

²¹Usiriche hinyo anaoonerwa aaibishwe, achiya na atsowi naatogole dzinaro.

²²Unuka udzihehere, ee Mlungu, tambukira vira azuzu akulaphizavyo chila siku.

²³Usiyale hoyo ra maaduigo na gasiya za wakati wosi za anaokupinga.