Read digo Zaburi 77 Bible Online

Zaburi 77 - digo bible

Zaburi 77

¹Kpwa chilongozi wa aimbadzi. Kuhumira sauti ya Jeduthuni. Zaburi ya Asafu. Námririra Mlungu kpwa sauti ili aniterye. Námririra Mlungu kpwa sauti ili aniphundze.

²Wakati nriphokala nina tabu namuendza Mwenyezi Mlungu, usiku wosi námvoya kuno nkaunula mikono yangu ela moyo wangu tauyahurira.

³Ee Mlungu, nákutambukira uwe kpwa kuula; Nchiririkana, nchivundzika moyo.

⁴Uwe wanihenda nisiphahe usingizi, Náyugika nchishindwa ra kugomba.

⁵Naririkana kuhusu siku za kare, miaka minji yotsupa.

⁶Usiku nátambukira mawira gangu náririkana na moyo wangu nchidziuza:

⁷“Dze, Mwenyezi Mlungu akahurema hata kare na kare? Dze, kandakala razi naswi tsona?

⁸Dze, mendzwaye isiyosika ikasira hata kare na kare? Dze, kandakamilisha ahadize tsona?

⁹Dze, Mlungu akayala kukala na mbazi? Dze, akazuwiya mbazize kpwa tsukizi?”

¹⁰Halafu nchiamba, “Chinilumizacho zaidi ni kukala mkpwono wa kulume wa Iye Ariye Dzulu Kuriko Vyosi kahuhendera tsona chochosi.”

¹¹Nindatambukira mahendo ga Mwenyezi Mlungu; ee, nindaririkana maajabugo ga hipho kare.

¹²Nindaririkana kuhusu kazizo zosi, nindaririkana kuhusu mahendogo makulu.

¹³Chila uhendacho, ee Mlungu, ni chitakatifu. Ni mlungu yuphi ariye mkpwulu dza Mlungu wehu?

¹⁴Uwe u Mlungu unayehenda vilinje, uwe ukaonyesa atu a mataifa uwezoo.

¹⁵Uwe waakombola atuo kpwa mkpwonoo wa nguvu. Atu a chivyazi cha Jakobo na cha Yusufu.

¹⁶Madzi gariphokuona, ee Mlungu, madzi gariphokuona, gaogopha, navyo vivwa vichikakama.

¹⁷Maingu gamwaga madzi, mlunguni kuchinguruma, limeme richimeka chila uphande.

¹⁸Msindo wa mngurumoo wasikirika kpwenye chikulukulu, limemero richingʼaza dunia, dunia ichisumba na ichikakama.

¹⁹Wahenda njirayo yatsupa na kahi-kahi ya bahari, wanyendeka dzulu ya madzi manji, ela nyayozo taziyaonekana.

²⁰Uwe waalongoza atuo dza mifugo kpwa ulongozi wa Musa na Aruni.