Read digo Zaburi 80 Bible Online

Zaburi 80 - digo bible

Zaburi 80

¹Kpwa chilogozi wa aimbadzi. Kuhumira sauti ya “Matoro ga chilagane.” Zaburi ya Asafu. Huphundze uwe mrisa uroromaye Aiziraeli uwe ulogozaye chivyazi cha Yusufu dza mifugo uwe ambaye chihicho cha ufalume chi dzulu ya makerubi, onyesa mwangao,

²kpwa atu a Efuraimu, Benjamini na Manase. Onyesa uwezoo na wedze uhutivye.

³Hutiye tsona nguvu, ee Mlungu na huulole na mbazi ili huphahe kutivywa.

⁴Ee Mwenyezi Mlungu, Mlungu wa majeshi, undatsukirirwa mavoyo ga atuo hadi rini?

⁵Ukahenda matsozi gakale chakurya chehu, na ukahunwesa matsozi bakuli tele.

⁶Ukahuhenda hukale atu a kuberwa ni majirani gehu, maadui gehu ganahutseka.

⁷Hutiye nguvu tsona, ee Mwenyezi Mlungu, Mlungu wa majeshi, hulole na mbazi ili huphahe kutivywa.

⁸Uwe wareha mzabibu kula Misiri uchizola atu a mataifa ganjina, nawe uchiuphanda.

⁹Waurimira phatu nao wahenda mizi yogota tsi yosi.

¹⁰Myango ichifwinikpwa na pepho ya hinyo mzabibu na mierezi mikulu ichifwinikirwa ni pandaze.

¹¹Pandaze zichiphiya hadi baharini na mizi ichifika muho Yufurati.

¹²Mbona wabomola kutaze, hata vino chila atsupaye anadola zabibuze?

¹³Nguluwe a tsakani anaubananga-bananga, na nyama a tsakani anarisa mumo.

¹⁴Uyiza moyoo kpwehu tsona, ee Mlungu wa majeshi. Lola kula mlunguni, uone mzabibu huno.

¹⁵Ukarinde muhi uriouphanda na mkpwonoo wa kulume.

¹⁶Mzabibuo ukatemwa na ukaochwa, kpwa kuademurira, atuo anaangamia.

¹⁷Mkpwonoo na umurinde hiye mutu ariye mkpwonoo wa kulume, hiye mutu uriyemupha mkpwotse kpwa ajiliyo mwenye.

¹⁸Halafu naswi tahundagaluka na kukuricha, huphe uzima naswi hundakuabudu.

¹⁹Hutiye nguvu tsona, ee Mwenyezi Mlungu, Mlungu wa majeshi, hulole na mbazi ili huphahe kutivywa.