Read digo Zaburi 81 Bible Online

Zaburi 81 - digo bible

Zaburi 81

¹Kpwa chilongozi wa aimbadzi. Kuhumira sauti ya Gitithi. Zaburi ya Asafu. Muimbireni na raha Mlungu, iye ariye nguvu yehu, mshangiliyeni na sauti ya dzulu Mlungu wa Jakobo.

²Andzani wira, pigani tamburini, pigani zeze na ngephephe ya sauti nono.

³Pigani gunda ra pembe ya turume kutangaza kulumbwa kpwa mwezi tsona mwezi ukalapho dzungo, siku ya sikukuu yehu.

⁴Mana ihi ndiyo shariya kpwa Iziraeli hiro ndiro lagizo ra Mlungu wa Jakobo.

⁵Walagiza atu a Iziraeli wakati ariphovamia tsi ya Misiri. Nasikira sauti nisiyoimanya inaamba.

⁶Nákuhulani mizigo kula mwenu mafuzini, nchikuoyeza yo kaphu ndziho yokala mwako mikononi.

⁷Wakati kala una shida wanivoya nkuterye nami nchikuterya. Nakujibu phatu pha siri pha chiguruguru, nákujeza ko kpwenye madzi ga Meriba.

⁸Mwi atu angu, sikirani ninavyokukanyani. Ee Iziraeli, mendza kala unanisikira!

⁹Si ruhusa kukala na milungu ya chijeni kahi zenu, msiabudu mlungu wanjina.

¹⁰Mimi, ndimi Mwenyezi Mlungu, Mlunguo, niriyekulavya kula tsi ya Misiri. Vugula kanwayo nami ndakurisa.

¹¹Ela atu angu taamendze kuniphundza. Aiziraeli taalunga nilondavyo.

¹²Kpwa hivyo nchiarichira alunge mioyo yao mifu, alunge mashauri gao enye.

¹³Ee mendza kala atu angu ananiphundza kalapho Aiziraeli angelunga njira zangu.

¹⁴Ningeashindira maadui gao upesi, na mkpwono wangu ungekala tayari kupiga avihae.

¹⁵Hinyo asiommendza Mwenyezi Mlungu angemchitira mavwindi kpwa wuoga, na adabu yao ingeenderera hata kare na kare.

¹⁶Ningekurisa nganu nono ya zosi, ningekumvunisa na asali kula mwambani.