Read digo Zaburi 83 Bible Online

Zaburi 83 - digo bible

Zaburi 83

¹Zaburi ya Asafu. Ee Mlungu, usikale gbwi usinyamale, ee Mlungu, na usihurire!

²Mana ke, maaduigo ganaizaiza, hinyo avihao anaokuzira akaunula vitswa vyao.

³Akaapangira atuo njama mbii, anashauriana vira ndivyoahenda vii hinyo unaoarinda.

⁴Anaamba, “Ndzoni hukomese ro taifa rao, dzina ra Iziraeli risitambukirwe tsona.”

⁵Ee, anapanga phamwenga kpwa umwenga, anaika chilagane chinyumecho.

⁶Mahema ga Aedomu na ga atu a Isimaili, Moabu na ga Ahagari,

⁷Agebali, Aamoni na Aamaleki. Afilisti asagalao Tiro.

⁸Hata Aashuru akashirikiana nao, akaunga mkpwono chivyazi cha Lutu.

⁹Ahende dza urivyoahenda atu Amidiani, urivyoahenda Sisera na Jabini hipho chidzuho cha Kishoni,

¹⁰atu urioaangamiza kuko Eni-Dori achikala dza chitole cha ngʼombe dzulu ya tsi.

¹¹Ahende akulu aho akale dza Orebu na Zeebu, atawala akale dza Zeba na Salimuna,

¹²ambao aamba, “Náhudziharire tsi ya Mlungu ikale yehu.”

¹³Ee Mlungu wangu, ahende dza vumbi chirounulwa ni chikulukulu, dza wiswa wakati wa phepho.

¹⁴Dza viratu moho unavyoocha tsaka, na Jimbijimbi ra moho riochavyo myango,

¹⁵azorese na phutoro, na waaogofyere na phuto kali!

¹⁶Henda nyuso zao zikale na haya, ili aendze dzinaro, ee Mwenyezi Mlungu.

¹⁷Naatiywe waibu na ahangaike hata kare na kare naafwe na waibu wao.

¹⁸Naamanye kukala uwe macheyo, ambaye dzinaro ndiwe Mwenyezi Mlungu, uwe macheyo ndiwe Uriye Dzulu Kuriko Vyosi himu duniani.