Read digo Zaburi 88 Bible Online

Zaburi 88 - digo bible

Zaburi 88

¹Kpwa chilongozi wa aimbadzi. Zaburi ya atu a chivyazi cha Kora. Kuhumira sauti ya “Mahalathi leanoti.” Wira wa Hemani, Muezira. Mwenyezi Mlungu, Mlungu unitivyaye, nakuririra uwe mutsi na usiku wosi.

²Sikira higa nivoyago, phundza chiriro changu!

³Mana roho yangu inafwasa na sonono, na maisha gangu ganasengerera kuzimu.

⁴Ninaisabiwa phamwenga na atsererao dibwani. Mimi ni sawa na mutu asiye na uwezo,

⁵ni dza mutu achiyerichwa kahi ya nyufu, ni dza arioolagbwa arereo mbirani, atu ambao uwe kuatambukira tsona, mana kuna rorosi uahenderaro tsona.

⁶Ukanitiya dibwani tsini kabisa, mwatu murimo na chilungulungu cha jiza.

⁷Tsukizizo zinaniremerera, unanigayisa na maimbi ga tsukizizo.

⁸Ukahenda asena angu anizire, ukanihenda nikale tsukizo kpwao. Nkafungirwa na siweza kutuluka,

⁹matso gangu ga tele kpwa sababu ya chiriro. Chila siku ninakuririra, uwe Mwenyezi Mlungu, ninakugolosera mikono yangu.

¹⁰Dze, nyo ariofwa ukuahendera vilinje? Au nkuunuka akakutogola?

¹¹Dze, mendzwayo isiyosika nkusemurirwa mo mbirani? Au uaminifuo nkusemurirwa wakati wa ubanangi?[16]

¹²Dze, vilinjevyo nkumanyikana phatu phenye jiza, au mahendogo ga haki kahi ya tsi ya arioyalwa?

¹³Ela ninakuririra uwe, ee Mwenyezi Mlungu, chila ligundzu nkukuvoya.

¹⁴Haya, mbona unanirema Mwenyezi Mlungu? Mbona unalola kanda usinione?

¹⁵Nágaya hangu wanache wangu, nágaya karibu kufwa. Unanitishira hata ninakakama kpwa chiwewe, nami nkakata tamaa!

¹⁶Nkafwinikpwa ni tsukizizo, mahendogo ga kuogofya gakaniangamiza.

¹⁷Gakanizunguluka dza mafuriko mutsi wosi, gananisengerera chila uphande.

¹⁸Ukahenda asena na majirani aniriche, jiza vivi ndiro msena wangu wa phephi.