Read digo Zaburi 89 Bible Online

Zaburi 89 - digo bible

Zaburi 89

¹Wira wa Ethani, Muezira. Ee Mwenyezi Mlungu, nindaimba kuhusu mendzwayo isiyosika hata kare na kare, nindatangaza uaminifuo kpwa vivyazi vyosi.

²Nindaamba kukala mendzwayo isiyosika inadumu hata kare na kare, uaminifuo u imara dza mlunguni.

³Uwe waamba, “Nkaika chilagane na mutu nriyemtsambula. Nkamuapira mtumishi wangu Daudi,

⁴kukala nindaimarisha chivyazicho hata kare na kare, na kudumisha ufalumeo kpwa vivyazi vyosi.”

⁵Mlunguni nakutogole maajabugo, ee Mwenyezi Mlungu, uaminifuo nautogolwe kahi za mikutano ya atakatifu.

⁶Mana ni ani ko mainguni awezaye kulenganishwa na uwe Mwenyezi Mlungu. Ni ani kahi za viumbe vya mlunguni ariye dza uwe Mwenyezi Mlungu?

⁷Mlungu anayeogophewa kpwenye mkpwutano wa atakatifu hiko mlunguni na anaishimiwa sana kuriko osi achiomzumguluka?

⁸Mwenyezi Mlungu, Mlungu wa majeshi, ni ani ariye na nguvu dza uwe Mwenyezi Mlungu? Uaminifuo ukakuzunguluka.

⁹Uwe unatawala mngurumo wa bahari maimbige ganaphozuka unagahuriza.

¹⁰Uwe watisatisa dzoka ra baharini riihwaro Rahabu uchiriolaga unagatsamula kpwa mkpwono wa nguvu.

¹¹Mlunguni ni maliyo na dunia piya ni yako. Dunia yosi na vyosi virivyo himo ndiwe uriyeviumba.

¹²Uwe ndiwe uriyeumba uphande wa vurini na wa mwakani, mwango wa Tabori na wa Herimoni inatogola dzinaro na raha.

¹³Uwe una mkpwono urio na nguvu, mkpwonoo una mkpwotse, mkpwonoo wa kulume ukaunulwa kpwa ushindi.

¹⁴Chihicho cha endzi misingiye ni usawa na haki. Mendzwa isiyosika na uaminifu vi mberezo.

¹⁵Baha atu ariodzifundza kukutogola na mawira, anyendekao kpwenye mwanga wa unonoo, ee Mwenyezi Mlungu.

¹⁶Atu ahamirwao ni dzinaro dii yosi na kukutogola kpwa haki uriyo nayo.

¹⁷Mana uwe ndiwe nguma yao na nguvu zao na kpwa kumendzako hunaphaha ushindi.

¹⁸Mana urindzi wehu ni wako uwe Mwenyezi Mlungu mfalume wehu ala kpwako uwe Mtakatifu wa Iziraeli.

¹⁹Hipho kare wagomba katika ruwiya na mtumishio muaminifu, uchiamba, “Nkamupha nguvu sujaa mmwenga, Nkamupha cheo cha dzulu mmwenga ariyetsambulwa kahi za atu.

²⁰Nkamphaha Daudi, mtumishi wangu nkammwagira mafuha gangu matakatifu

²¹ili mkpwono wangu ukale naye siku zosi, mkpwono wangu mimi mwenye umutiye nguvu.

²²Maadui tagandaweza kumturya, atu ayi taandaweza kumuonera.

²³Nindaapiga avihae mbereze, nindaangamiza osi ariomzira.

²⁴Uaminifu wangu na mendzwa yangu isiyosika indakala phamwenga naye, na kpwa kutsupira dzina rangu andaphaha ushindi.

²⁵Nindaika mkpwonowe dzulu ya Bahari Kulu hadi muho wa Yufurati.

²⁶Iye andaniiha aambe, ‘Uwe u Baba, Mlungu wangu, na mwamba wa wokofu wangu.’

²⁷Nami ndamuhenda mwanangu mvyere, akale mkpwulu kuriko afalume osi duniani.

²⁸Nindaenderera kummendza hata kare na kare na chilagane chehu na iye chindadumu kpwa sababuye.

²⁹Uvyaziwe ndauhenda uenderere kukala afalume, na utawalawe taundakala na mwisho dza mlunguni kurivyo.

³⁰Ela phahi, atu a chivyaziche achiricha kulunga shariya zangu, na kukala taahenda kulengana na malagizo gangu,

³¹ichikala andavundza masharuti gangu na kuricha kutimiza amuri zangu,

³²nindaatiya adabu kpwa sababu ya makosa gao, nindaapiga kpwa sababu ya uyi wao.

³³Ela sindamuusira mendzwa yangu isiyosira, au nikose kukala muaminifu.

³⁴Sindavundza chilagane changu wala kubadilisha nirirogomba mwenye.

³⁵Nkaapa limwenga tu, ra kpwandza na ra mwisho kpwa sababu ya utakatifu wangu sindamuambira handzo Daudi.

³⁶Chivyaziche chindaenderera hata kare na kare na utawalawe undadumu mbere zangu dza dzuwa.

³⁷Undadumu hata kare na kare dza mwezi, shaidi muaminifu ko mainguni.”

³⁸Ela samba, ukamtsukirirwa iye uriyemtsambula, ukamtsukirirwa iye uriyemmwagira mafuha.

³⁹Ukavundza chilagane urichoika na mtumishio ukatiya najisi tadziye kpwa kuitsupha vumbini.

⁴⁰Ukabomola kuta zosi za mudziwe ukahenda ngomeze zikale gandzo.

⁴¹Osi anaotsupa na phapho anamfuta maliye akakala mutu wa kuberwa ni majiranige.

⁴²Ukaapha ushindi avihae, ukahenda maaduige gosi gahererwe.

⁴³Ee, ukahenda silahaze zikale mabutu, na kukamterya vihani.

⁴⁴Ukamuusira uwezo wa kutawala na kubwaga chihiche cha utawala.

⁴⁵Ukaphunguza siku za uhanawe, ukamvwika waibu.

⁴⁶Undadzifwitsa hata rini, ee Mwenyezi Mlungu? Dze, undadzifwitsa hata kare na kare? Tsukizizo zindaaka dza moho hata rini?

⁴⁷Tambukira vyo maisha gangu garivyo mafupi, tambukira mwanadamu uriyemuumba ni kufwa.

⁴⁸Ni mwanadamu yuphi ambaye anaweza kuishi asifwe? Ni ani awezaye kudzikombola kula kpwa nguvu za kuzimu?

⁴⁹Mwenyezi Mlungu, iphaphi mendzwayo ya kare isiyosika? Ambayo wamuapira Daudi kpwa uaminifuo?

⁵⁰Tambukira, ee Mwenyezi Mlungu vira mtumishio anavyoberwa, vira ninavyovumirira kulaphizwa ni atu a mataifa ganjina.

⁵¹Maneno ga kulaphiza ganagogombwa ni maaduigo, ee Mwenyezi Mlungu, ambago anamlaphizira mmwagirwao mafuha chila aphiyapho.

⁵²Mwenyezi Mlungu na aajaliwe ta kare na kare! Amina na Amina.