Read digo Zaburi 9 Bible Online

Zaburi 9 - digo bible

Zaburi 9

¹Kpwa chilongozi wa aimbadzi. Kpwa mtindo wa “Chifo cha mwana.” Zaburi ya Daudi. Ee Mwenyezi Mlungu, nindakushukuru na moyo wangu wosi, nindasemurira mahendogo gosi ga ajabu.

²Nindahererwa na kupiga njerejere kpwa sababuyo, nindamuimbira mawira ga kutogola Ariye Dzulu Kuriko Vyosi.

³Uriphotsembuka, maadui gangu gauya nyuma, gakpwala, gachigbwa na gachifwa.

⁴Mana uwe uamulio ni wa haki, usegere kpwenye chihicho cha chifalume na unalavya uamuli wa haki.

⁵Ukademurira atu a mataifa ganjina na kuangamiza atu ayi, nao taandatambukirwa hata kare na kare.

⁶Maadui gakaangamia hata kare na kare na midzi yao ukaibananga wala taphakasala chochosi cha kuhenda gatambukirwe.

⁷Ela Mwenyezi Mlungu anatawala hata kare na kare. Asegere chihiche cha utawala tayari kulavya uamuli.

⁸Anatawala dunia na haki, na kuamula atu osi bila ubaguzi.

⁹Mwenyezi Mlungu ni chimbiriro ra anaoonerwa, iye ni ngome wakati za tabu.

¹⁰Osi anaokumanya nkukukuluphira, mana uwe ee Mwenyezi Mlungu, kumricha yeyesi anayekuendza.

¹¹Muimbireni mawira ga kumtogola Mwenyezi Mlungu atawalaye ko Sayuni! Atangazireni atu a mataifa mahendoge.

¹²Mana iye ariphizaye aolagadzi anajali na kapuza chiriro cha aonerwao.

¹³Nionera mbazi ee Mwenyezi Mlungu! Lola vira nigayiswavyo ni hinyo anizirao, nitivya kula kpwenye maryango ga chifo,

¹⁴ili niasimurire atu osi a Sayuni yani Jerusalemu mambo ganagohenda, nkutogole. Na nihererwe kpwa sababu ukanitivya.

¹⁵Mataifa ganjina gasigommanya Mlungu gakagbwa kpwenye dibwa chiroritsimba enye, mihego yao ikaagbwira enye.

¹⁶Mwenyezi Mlungu akadzimanyisa kpwa kulavya uamuli wa haki. Atu ayi akagbwirwa kpwa sababu ya mahendo gao enye.

¹⁷Atu ayi yani osi amremao Mlungu, mwisho wao ni kuzimu.

¹⁸Ela agayi taandayalwa siku zosi, na kuluphiro ra achiya tarindaangamika.

¹⁹Unuka ee Mwenyezi Mlungu! Usimriche mwanadamu akashinda, mataifa ganjina nagalamulwe mberezo!

²⁰Atishire ee Mwenyezi Mlungu, atu a mataifa ganjina amanye kukala aho si chochosi ni anadamu tu.