Read digo Zaburi 90 Bible Online

Zaburi 90 - digo bible

Zaburi 90

¹Voyo ra Musa, mutu wa Mlungu. Mwenyezi Mlungu, ukakala makalo gehu chivyazi hadi chivyazi.

²Uwe wakala Mlungu huriyekuabudu kabila myango kuumbwa na ulimwengu, uwe undasala kukala Mlungu hunayekuabudu.

³Ukuuyiza atu mtsangani, na kuamba, “Mwi anadamu, uyani mrikola!”[17]

⁴Mana miaka elufu kpwako ichitsapa ni kama dzana, au usiku mmwenga.

⁵Uwe ukusisa uzima wa anadamu dza viratu ndoso. Anadamu ni dza nyasi zimerazo ligundzu,

⁶ambazo ligundzu nkupwipwita, ela ichifika dziloni ni kunyala na kuuma.

⁷Mana tsukizizo zinahumarigiza, naswi hunaogofyerwa ni kutsukirwako.

⁸Ukaika mai gehu mberezo, dambi zehu za siri zi wazi mberezo.

⁹Kpwa sababu ya tsukizizo, siku zehu nkukala chache, miaka yehu ikasira upesi dza mseho.

¹⁰Hunaweza kuishi miaka mirongo sabaa, au ichikala huna nguvu, miaka mirongo minane, ela yo minono nayo ni ya tabu na sonono, kano ikasira naswi tahupho tsona.

¹¹Ni ani amanyaye uziho wa tsukizizo? Ni ani amanyaye wuoga urehwao ni tsukizizo?

¹²Hufundze humanye vira maisha gehu garivyo mafupi, ili hukale na ikima.

¹³Ee Mwenyezi Mlungu, undatsukirwa hadi rini? Huonere mbazi swiswi atumishio!

¹⁴Chila ligundzu hushibishe na mendzwayo isiyosika, ili huhererwe na kukala na raha siku zehu zosi.

¹⁵Hujaliye siku nyinji za raha chiasi cha urivyohenda hugaye; miaka yehu ya tabu naikale chiasi sawa na miaka ya kujaliwa.

¹⁶Huonyese mahendogo, swiswi atumishio, aonyese ana ehu ngumayo.

¹⁷Unono wa Mwenyezi Mlungu, Mlungu wehu naukale dzulu yehu, na kazi za mikono yehu ziongokerwe. Ustawishe kazi za mikono yehu!