Read digo Zaburi 91 Bible Online

Zaburi 91 - digo bible

Zaburi 91

¹Mutu akalaye kahi ya makalo ga Ariye Dzulu Kuriko Vyosi, andaoya kpwenye urindzi wa iye Mwenye Nguvu Zosi,

²andaweza kumuamba Mwenyezi Mlungu, “Uwe ndiwe chimbiriro rangu na ngome yangu, Mlungu wangu, ninayekukuluphira!”

³Kpwa kpweli Mlungu andakuokola na muhambo wa muindza, na kukurinda na makongo mai.

⁴Andakufwinika dza nyama a mapha afwinikavyo anae na mapha, nawe undaphaha chimbiriro. Uaminifuwe undakurinda dza ngao irindavyo asikari.

⁵Uwe kundaogopha hatari za usiku, wala muvwi ujezwao wakati wa mutsi,

⁶wala ukongo mui uzidio usiku, wala mafwa gahendekago dzuwa ngerengere.

⁷Hata atu elufu achifwa mkpwonoo wa kumotso, na elufu kumi achifwa uphande wa mkpwonoo wa kulume, ela we, chifo tachindakuphaha.

⁸Undaona na matsogo mwenye vira atu ayi ndivyotiywa adabu.

⁹Kpwa kukala ukamuhenda Mwenyezi Mlungu, chimbiriroro, na Iye Ariye Dzulu Kuriko Vyosi, makalogo,

¹⁰mai tagandakuphaha, wala mafwa tagandasengerera hemaro.

¹¹Mana andalagiza malaikae akurinde phophosi uphiyapho.

¹²Nao andakuunula na mikono yao, usedze ukakpwala dziwe.

¹³Undavyoga simba na fira, undavyoga-vyoga simba asiru na nyoka zenye sumu kali.

¹⁴Mlungu anaamba, “Nindaokola iye animendzaye, nindarinda iye amanyaye dzina rangu!

¹⁵Achiniiha, nami nindamuihikira, achikala tabuni, nindakala phamwenga naye, nindamuokola, naye andaishimiwa.

¹⁶Nindamupha maisha mare, na kumuonyesa wokofu wangu.”