Read digo Zaburi 92 Bible Online

Zaburi 92 - digo bible

Zaburi 92

¹Zaburi. Wira wa Siku ya Kuoya. Ni vinono kumtogola Mwenyezi Mlungu, na kukuimbira mawira ga kutogola dzinaro, uwe Uriye Dzulu Kuriko Vyosi.

²Kutangaza mendzwayo isiyosika wakati wa ligundzu, na uaminifuo wakati wa usiku,

³kpwa kuhumira chivoti na ngephephe, na kpwa sauti ya zeze.

⁴Mana mahendogo uwe Mwenyezi Mlungu gakanihenda nihererwe, nindaimba na raha kpwa sababu ya kazi ya mikonoyo.

⁵Mahendogo, ee Mwenyezi Mlungu ni makulu sana! Si rahisi kumanya maazogo!

⁶Hiri ni dzambo ambaro mzuzu kaweza kurimanya, mjinga kaweza kurielewa.

⁷Dzagbwe atu ayi anakula dza nyasi nao ahendao mai achioongokerwa, mwisho wao ni kuangamika hata kare na kare.

⁸Ela uwe, ee Mwenyezi Mlungu unatukuzwa hata kare na kare.

⁹Mana maaduigo, ee Mwenyezi Mlungu, maaduigo gandaangamika, osi ahendao mai andatsamukana.

¹⁰Ukanihenda nikale na mkpwotse dza nyahi ukanimwagira mafuha maphya.

¹¹Matso gangu gakadzionera maadui gachishindwa na masikiro gangu gakasikira chiriro cha aviha angu.

¹²Enye haki andapwipwita dza mitende, na kukula dza mierezi ya Lebanoni.

¹³Aho ni dza mihi iriyophandwa ndani ya nyumba ya Mwenyezi Mlungu, inayopwipwita muhalani pha Mlungu wehu.

¹⁴Andaenderera kuvyala matunda hata ukareni chila wakati indakala mitsanga-mitsanga na yenye nguvu.

¹⁵Vivi vinaonyesa kukala Mwenyezi Mlungu ni mkamilifu, iye ni mwamba wangu na ndaniye tamuna uyi.