Read digo Zaburi 94 Bible Online

Zaburi 94 - digo bible

Zaburi 94

¹Ee Mwenyezi Mlungu, uwe Mlungu uriphizaye chisasi, uwe Mlungu uriphizaye chisasi, dzimanyise chingʼangʼa!

²Unuka uwe muamuli wa dunia, atiye adabu anaodzikarya kulengana na kudzikarya kpwao.

³Hata rini, ee Mwenyezi Mlungu? Atu ayi andaenderera kuhererwa hata rini?

⁴Anagomba maneno ga kudziunula, ahendao mai osi anadzikarya.

⁵Anatisa-tisa atuo, ee Mwenyezi Mlungu anaonera hinyo ario ni urisio.

⁶Anatsindza magungu na ajeni asagalao kahi ya tsi yehu, anaolaga anachiya.

⁷Nao anaamba, “Mwenyezi Mlungu kaona, Mlungu wa Jakobo kamanya.”

⁸Mwi azuzu kuriko atu osi! Mwi apumbavu, mundakala rini na ikima?

⁹Dze, ye ariyeumba sikiro, akale kasikira? Ye ariyeumba dzitso, akale kaona?

¹⁰Dze, ye anayetiya adabu mataifa ganjina, akale kandakutiyani adabu? Dze, ye aafundzaye anadamu, akale kana marifwa?

¹¹Mwenyezi Mlungu anamanya maazo ga mwanadamu, kukala tagana mana yoyosi.

¹²Baha mutu umutiyaye adabu, ee Mwenyezi Mlungu, umfundzaye shariyayo,

¹³ukumupha kuhurira wakati wa siku za tabu, hadi atu ayi atsimbirwe dibwa.

¹⁴Mana Mwenyezi Mlungu kandaricha atue, kandatsupha atu ario urisiwe.

¹⁵Mana uamuli wa haki undalaviwa tsona, na enye haki osi andailunga.

¹⁶Ni ani ndiyeniterya kupingana na atu ayi? Ni ani ndiyekala uphande wangu chinyume cha atu ayi?

¹⁷Kala Mwenyezi Mlungu kayaniterya, ningekala náphiya kare tsi ya ariofwa.

¹⁸Niriphoamba, “Nahereza,” mendzwayo isiyosika, ee Mwenyezi Mlungu, yanigbwiririra.

¹⁹Moyo wangu uriphokala unayugika na mambo manji, uwe waniphoza marenda na uchinihenda nihererwe.

²⁰Uwe kuweza kuungana na atawala ayi, atungao shariya za kukanira mai?

²¹Ao nkuungana ili aangamize maisha ga atu a haki, na kuamula atu asio na makosa aolagbwe.

²²Ela Mwenyezi Mlungu akakala ngome yangu, na Mlungu wangu akakala mwamba wangu wa kuchimbirira.

²³Iye andaaripha dambi zao, na aangamize kpwa uyi wao. Mwenyezi Mlungu, Mlungu wehu andaangamiza tsetsetse.