Read digo Wira wa Selemani 1 Bible Online

Wira wa Selemani 1 - digo bible

Wira wa Selemani 1

¹Wira mnono sana wa Selemani, kutsupa mawira gosi.

²Naanidonere na mromowe mana mendzwaye ni nono kutsupa uchi wa zabibu

³Marashige gananukato, dzinare rinanihamira dza viratu kungu nono ya marashi chigomwagika. Ndiyo mana asichana anammendza.

⁴Nigbwira mkpwono huhende wangbwi! Mfalume akaniphirika kpwakpwe chumbani. Hunahererwa kpwa ajili yenu huna raha kpwa sababuyo ee, mfalume kpwa kpweli mendzwayo i mtswano kutsupa uchi wa zabibu. Ni sawa asichana kukumendza.

⁵Mwi achetu a Jerusalemu, mimi myawenu dzagbwe ni mwiru, ela ni mnono dzagbwe ni mwiru dza mahema kula Kedari au paziya za mahema ga Selemani.

⁶Msinilole sana kpwa sababu ya wiru wangu dzuwa ndiro chirohenda ngozi yangu ikale hivi. Mana enehu a chilume anireyera, achinishurutisha kutundza minda ya mizabibu. Nami nchishindwa kutundza munda wangu wa mizabibu.

⁷Niambira uwe wangu wa moyoni, go mangʼondzigo undagarisaphi rero? Undagatindizha kuphi dzuwa ra mutsi? Niambira sedze nkaonekana kuyeya kahi za arisa ayao.

⁸We mchetu mnono kuriko osi, napho kumanya lunga ro gurufu ra mangʼondzi na mbuzi na urise ana mbuzio phephi na mahema ga arisa.

⁹Wende wangu, uwe u wa samani na u mnono, dza farasi mchetu kahi za farasi alume a kuvweha magari ga Farao.

¹⁰Mafundago mmanono na vipuli uchivyovwala vikakuajira, na singoyo nono ikaajirwa ni mkpwufu uchiovwala.

¹¹Hundakutengezera mikufu ya zahabu, ichiyodonwa na feza.

¹²Wakati mfalume akasagala phakpwe kochini, marashi gangu ga narido gananukato kosi.

¹³Naye wende wangu ni dza chikoba cha manemane kahi-kahi ya nyaho zangu.

¹⁴Wende wangu ni dza viluwa chivyobumuka kpwenye minda ya mizabibu ya Eni-Gedi.

¹⁵Lola, wende wangu, urivyo mnono, u mnono sana; matsogo ganapendeza dza ga njiya manga.

¹⁶Wende wangu, uwe piya u mnono, tsona u mnono haswa. Na phatu phehu pha kudziambalaza phana nyasi mbitsi.

¹⁷Nguzo za nyumba yehu ni muhi uihwao muerezi, na maphaluge ni ga miboreshi.