Read digo Wira wa Selemani 8 Bible Online

Wira wa Selemani 8 - digo bible

Wira wa Selemani 8

¹Kalapho u mwenehu wa chilume, mmwenga wa nyumba yehu, phahi ningekudonera chingʼangʼa na takungekala na mutu wa kuhuoloha na chala cha lawama.

²Ningekuhala na kukulongoza kuphiya nyumbani kpwa mayo, hadi chumbani kpwa ye yenivyala, na kuko ningekupha uchi wangu wa zabibu uchiotiywa vilungo, uchi wa makomamanga gangu.

³Mkpwonoo wa kumotso ungekala tsini ya chitswa changu, na mkpwonoo wa kulume unaniphaphasa.

⁴Niapirani mwimwi achetu a Jerusalemu, kukala tamundalamusa wala kugondomola mkpwatyo hadi wakatiwe ufike.

⁵Ni ani yuya edzaye kula weruni, achiyegadzamira wendewe? Phapho kolo ya mtofaa nakulamusa, phapho ambapho mayoo wakala na utsungu wa kudzivugula, phapho ambapho mayoo wakuvyala.

⁶Andika dzina rangu phako moyoni, dzirinde kpwa sababu yangu tu, mana mendzwa ina nguvu dza nguvu za chifo! Wivu ni mkali dza kuzimu, nao unaaka dza moho mkali na ukaliwe ni wa kuolaga.

⁷Ela vidzuho vya madzi taviweza kuzimya moho wa mendzwa, hata myuho mikulu taiweza kuuzimya. Ichikala mutu angehumira maliye yosi kugula mendzwa, atu angemʼbera tsetsetse!

⁸Huna mwenehu wehu mchetu, ambaye bado kadzangbwemera nyaho. Hundamuhenderani mwenehu wehu, ndiphokpwedzaposwa?

⁹Ichikala ye mwenye ni ukuta, hundampamba dza minara ya feza. Ela achikala ni ryango, phahi hundamrinda na mbao za muerezi.

¹⁰Mimi nákala dza ukuta, na nyaho zangu kala zikaima dza minara! Kpwa hivyo wende wangu anaphonilola anaphaha amani na anaona kukala nkatosheka.

¹¹Selemani kala ana munda wa mizabibu hiko Baali-Hamoni, ambao kala nkuukodi kpwa akurima. Chila mmwenga kala nkuripha vipande elufu vya feza bada ya kuvuna matunda gao.

¹²Munda wangu wa mizabibu ni wangu mwenye, uwe Selemani kala na elufuzo za feza, na chila anayetundza matundage naasale na maganage mairi.

¹³Uwe usagalaye mundani, ayangu anagodzera kusikira sautiyo, ela mimi tu na nisikire rakaro!

¹⁴Henda wangbwi, wende wangu, mairo dza ga chiphala, ama chidzisa, dzulu ya vidzango ambako vilungo nkumera!