Read digo Isaya 65 Bible Online

Isaya 65 - digo bible

Isaya 65

¹“Nákala tayari kujibu mavoyo ga atu angu, ela taanivoyere, nákala tayari anione, ela taniendzere. Aho ni taifa ambaro tarinivoyere dzagbwe naamba, ‘Himi hipha, himi.’

²Kutwa ndzima náagolosera mkpwono atu arioasi anyendekao kpwenye njira zisizo kala nono, atu alungao maazo gao,

³atu ambao anahenda mambo ga kunitsukiza phangu matsoni, alavyao sadaka mindani, na kufukiza uvumba mwatu mwa dzulu mwa kulavira sadaka mwa matofali,

⁴asagalao vikurani na kuchesa mwatu mwa siri, aryao nyama za nguluwe, na nyungu zao zina nyama ambazo ni tsukizo.

⁵Aho akutanapho nkuambirana, ‘Kalani kure naswi, musihusengerere bii, mana swiswi hu atakatifu kuriko mwimwi.’ Atu aha ananitsukiza sana, dza mosi uinjirao pulani, dza moho uakao siku ndzima.

⁶Lola, dzambo riri náriandika nami sindanyamala bii, ela ndariphiza, ndariphiza kulengana na makosa gao.

⁷Ndakuriphizani makosa genu phamwenga na makosa ga akare enu,” Mwenyezi Mlungu anaamba. “Kpwa kukala mwafukiza uvumba myangoni chisha mchinikufuru ko vidzangoni, ndakuriphizani kulengana na mahendo genu ga kare.”

⁸Mwenyezi Mlungu anaamba hivi, “Dza viratu ambavyo atu nkuamba butsa ra zabibu risitsuphiwe mana richere na uchi mimi nami nindaahendera atumishi angu dza vivyo, sindaaolaga osi.

⁹Nindaareha atu a chivyazi cha Jakobo, a mbari ya Juda, atu angu nrioatsambula, arisi tsi ihi ya myango yangu, nao andakala atumishi angu.

¹⁰Sharoni indakala weru wa kurisa vyaa vya mangʼondzi, na Dete ra Akori rindakala phatu pha kutindizha mifugo, ya atu angu aniendzao.

¹¹Ela mwimwi mumrichao Mwenyezi Mlungu, na kuyala mwango wangu mtakatifu, muabuduo mlungu wa bahati, na kumlavira sadaka ya uchi wa zabibu mlungu wa majaliwa,

¹²ndakuhendani muolagbwe kpwa upanga, namwi mosi mundatsindzwa, kpwa kukala nákuihani ela tamuihikire, nágomba ela tamuniphundzire. Mwahenda mai phangu matsoni, na mchitsambula mambo gasigonihamira.”

¹³Kpwa hivyo Mwenyezi Mlungu anaamba hivi, “Lola, atumishi angu aniabuduo na kuniogopha andarya, ela mwimwi mundakala na ndzala. Atumishi angu andanwa, ela mwimwi mundasala na chiru. Atumishi angu andahererwa ela mwimwi mundagbwizwa waibu.

¹⁴Atumishi angu andaimba kpwa kuhererwa mwao mioyoni, ela mwimwi mundarira kpwa utsungu wa mioyo, mundapiga hofwi kpwa utsungu wa mioyo.

¹⁵Dzina renu rindahumika dza lana kahi za atu angu nrioatsambula. Mwenyezi Mlungu andakuolagani, ela atumishie andaapha dzina ranjina.

¹⁶Phahi iye ndiyevoya baraka, andazivoya kpwa Mlungu wa kpweli, na iye ndiyeapa andaapa kpwa Mlungu wa kpweli kpwa kukala zo tabu za pho mwandzo zindayalwa na tazipho tsona phangu matsoni.

¹⁷Lola, ninaumba mlunguni kuphya na dunia nyiphya, na mambo ga kare tagandatambukirwa wala kuririkanwa.

¹⁸Ela hamirwani na muhererwe siku zosi kahi ya vyo ndivyoviumba, mana ndahenda Jerusalemu ikale phatu pha raha, na atue andahererwa.

¹⁹Jerusalemu indanifwahira, na ndahamirwa ni atu angu. Atu angu taandasononeka na kurira tsona.

²⁰Tamundakala tsona na vifo vya ana atsanga, na atumia nao taandafwa kabila ya siku zao, mana ndiyefwa na miaka gana mwenga andakala achere mwanache, na iye ambaye kandafisa miaka gana mwenga, atu andaona akalaniwa.

²¹Andadzenga nyumba na asagale mumo, andaphanda mizabibu na arye matundage.

²²Taandadzenga nyumba na atu anjina akazisagale, wala kuphanda mizabibu na atu anjina akarye matundage, mana atu angu nrioatsambula andaishi maisha mare dza mihi, nao andafwaidi matunda ga kazi yao siku nyinji.

²³Taandahenda kazi ya bure, na ana aho taandaolagbwa ni makongo mai-mai, mana aho andakala atu ariojaliwa ni Mwenyezi Mlungu, aho phamwenga na vivyazi vyao.

²⁴Kabila taadzangbweiha nindaihika, ndiphokala achere kugomba, nindaasikira.

²⁵Mabawa na ana ngʼondzi andarisa phamwenga, simba andarya nyasi dza ngʼombe, ela nyoka andarya vumbi. Taandalumiza atu wala kubananga chitu kpwenye mwango wangu mtakatifu,” Mwenyezi Mlungu anaamba.