Read digo Alawi 18 Bible Online

Alawi 18 - digo bible

Alawi 18

¹Mwenyezi Mlungu achimuambira Musa,

²“Aambire atu a Iziraeli hivi: Mimi, ndimi Mwenyezi Mlungu, Mlungu wenu.

³Msihende dza vira ahendavyo atu a tsi ya Misiri mrikosagala, wala msihende dza vira ahendavyo atu a tsi ya Kanani ambako nakuphirikani. Msilunge mila zao hata chidide.

⁴Mwimwi mundalunga malagizo gangu na kugbwira shariya zangu. Mimi, ndimi Mwenyezi Mlungu, Mlungu wenu.

⁵Gbwirani shariya zangu na malagizo gangu; mana mutu ndiyegbwira malagizo andaishi kpwa kugalunga. Mimi, ndimi Mwenyezi Mlungu.

⁶“Mutu yeyesi kahi yenu naasilale na mʼbariwe wa phephi. Mimi, ndimi Mwenyezi Mlungu.

⁷Usimvundzire ishima sowe kpwa kulala na mayoo. Usilale naye, iye ni mayoo.

⁸Usimvundzire ishima sowe kpwa kulala na mmwenga wa achee anjina.

⁹Usilale na mwenenu mchetu, akale ni mwana baba wala mwana mayo, akale wavyalwa pho kaya au kpwanjina.

¹⁰Usilale na mdzukuluo, mwana wa mwanao mlume wala wa mchetu, mana undadzivundzira ishima mwenye.

¹¹Usilale na mwana mchetu yevyalwa ni sowe na mchetu wanjina. Mwana mchetu hiye ni mwenenu.

¹²Usilale na shangaziro, mana hiye ni ndugu wa phephi wa sowe.

¹³Usilale na ndugu mchetu wa mayoo, mana iye ni ndugu wa phephi wa mayoo.

¹⁴Usilale na mkpwaza sowe mvyere wala sowe mdide; hinyo ni mayozo.

¹⁵Usilale na mkpwaza-mwanao, hiye ni mchetu wa mwanao mlume.

¹⁶Usilale na mkpwaza nduguyo, iye ni mlamuo, undamvundzira ishima mwenenu.

¹⁷Usilale na mchetu, chisha ukalala na mwanawe mchetu wala mdzukuluwe. Hinyo ni abarie a phephi, kuatsanganya ni kuhenda uyi.

¹⁸Usilóle mlamuo wakati mcheo achere moyo, iyo indasababisha viha.

¹⁹“Usilale na mchetu napho ana mambo ga chichetu.

²⁰Usilale na mkpwaza jirani na ukadzitiya unajisi naye.

²¹“Usilavye mwanao hata mmwenga akale sadaka kpwa Moleki,[3] mana kuhenda hivyo ni kubera dzina rangu mimi Mlunguo. Mimi, ndimi Mwenyezi Mlungu.

²²“Usimuhende mlume myao mchetu. Hiro ni dzambo ra kutsukiza.

²³Usilale na nyama sedze ukadzitiya najisi. Mlume au mchetu yeyesi asihende hivyo. Kuhenda hivyo ni chinyume cha maumbile.

²⁴“Msidzitiye najisi kpwa kuhenda mambo higo kpwa sababu mataifa ganjina ambago ndagazola mbere zenu gadzinajisi kpwa njira hiyo.

²⁵Tsi yao yatiywa najisi nami nchiitiya adabu kpwa ajili ya dambize, nayo tsi ichirema enyezie.

²⁶Ela mwimwi na ajeni asagalao kahi zenu ni mgbwire masharuti gangu na malagizo gangu chisha msihende mambo higo ga kutsukiza.

²⁷Mambo higo ga kutsukiza gahendwa ni atu ariosagala tsi ya Kanani kabila ya mwimwi, nao achiinajisi.

²⁸Phahi, mwimwi msihende mambo higo mkaitiya najisi yo tsi, sedze ikakuremani dza irivyorema taifa ririrokala kabila yenu.

²⁹Atu osi ndiohenda mambo higo ga kutsukiza ni atengbwe kure na atu ao.

³⁰Kpwa hivyo gbwirani malagizo gangu gosi. Msilunge mila za hinyo ariosagala kpwenye tsi kabila mwimwi, sedze mkadzitiya najisi kpwa njira hiyo. Mimi, ndimi Mwenyezi Mlungu, Mlungu wenu.”