Read digo Amosi 1 Bible Online

Amosi 1 - digo bible

Amosi 1

¹Higa ni maneno ga Amosi, ariyekala mmwenga wa arisa a Tekoa. Maono gaga kuhusu Iziraeli, wagaona wakati mfalume Uziya ariphokala anatawala Juda na Jeroboamu mwana wa Joashi ariphokala anatawala Iziraeli. Gaga gahendeka miaka miiri kabila ya msumbo wa tsi kukala.

²Amosi achiamba, “Mwenyezi Mlungu andaruruma kula Sayuni, andanguruma dza chiguruguru kula Jerusalemu; na weru wa kurisa arisa gandauma, na chirere cha mwango Karimeli chindanyala.”

³Mwenyezi Mlungu anaamba, “Kpwa sababu atu a Damasikasi akahenda dambi vivyo kpwa vivyo, ni niatiye adabu. Aho apiga atu a Giliadi dza mutu awagavyo mtsere kpwa vifwaya vya meno-meno ga vyuma.

⁴Kpwa hivyo, dzumba ririrodzengbwa ni mfalume Hazaeli nindaritiya moho, nao undaocha ngome za mfalume Beni-Hadadi.

⁵Nindavundza magbwama ga miryango ya Damasikasi, na kuusa mtawala wa Dete ra Aveni, agbwiraye fwimbo ya utawala ko Bethi-Edeni; na atu a Aramu andatsamizwa kpwa lazima aphirikpwe Kiri,” Mwenyezi Mlungu anaamba.

⁶Mwenyezi Mlungu anaamba, “Kpwa sababu atu a Gaza akahenda dambi vivyo kpwa vivyo, ni niatiye adabu. Ahala mateka malalo mazima-mazima, na atue achiaguza dza atumwa kpwa Aedomu.

⁷Kpwa hivyo ndautiya moho ukuta wa Gaza, nao undaocha ngomeze.

⁸Nindausa mfalume wa Ashidodi, na ye agbwiraye fwimbo ya utawala ko Ashikeloni. Nindagolosa mkpwono wangu nipige Ekironi, na nyo Afilisti asereo andaangamika,” Mwenyezi Mlungu anaamba.

⁹Mwenyezi Mlungu anaamba, “Kpwa sababu atu a Tiro akahenda dambi vivyo kpwa vivyo, ni niatiye adabu. Aho ahala mateka malalo mazima-mazima, na atue achiaguza dza atumwa kpwa Aedomu, nao taayagbwira chilagane cha udugu.

¹⁰Kpwa hivyo, ukuta wa Tiro ndautiya moho, nao undaocha ngomeze.”

¹¹Mwenyezi Mlungu anaamba, “Kpwa sababu atu a Edomu akahenda dambi vivyo kpwa vivyo, ni niatiye adabu. Aho azoresa adugu ao, Aiziraeli na achiaolaga kpwa upanga bila mbazi. Tsukizi zao zaenderera kuaka hata kare na kare.

¹²Kpwa hivyo, mudzi wa Temani ndautiya moho, nao undaocha ngome za Bosira.”

¹³Mwenyezi Mlungu anaamba, “Kpwa sababu atu a Amoni akahenda dambi vivyo kpwa vivyo, ni niatiye adabu. Wakati anapigana ili kupanula miphaka yao, aahula achetu a mimba a Giliadi.

¹⁴Kpwa hivyo, ukuta wa Raba nindautiya moho, nao undaocha ngomeze, na siku iyo kundakala na kululu za viha, navyo viha vindavuma dza phuto.

¹⁵Na mfalume wao andatsamizwa kpwa lazima, iye phamwenga na vilongozie,” Mwenyezi Mlungu anaamba.