Read digo Obadiya 1 Bible Online

Obadiya 1 - digo bible

Obadiya 1

¹Hizi ni ruwiya arizoonyeswa Obadiya. Hivi ndivyo Mwenyezi Mlungu, Mlungu aambavyo kuhusu atu a Edomu; Hukaphaha habari kula kpwa Mwenyezi Mlungu kukala, kpwahumwa mjumbe kpwa mataifa akaambe, “Unukani! Uphiyeni hukapigane na Aedomu!”

²Mwenyezi Mlungu anaambira Edomu, “Lola, Nindakuhenda taifa dide kahi ya mataifa nawe undaberwa sana.

³Ko kudzikaryako mo mwako moyoni kukakuchenga uwe usagalaye kpwenye panga za myamba, na makalogo ga dzulu ya myango unadziamba, ‘Takuna mutu awezaye kunitsereza photsi bii.’

⁴Mana Mwenyezi Mlungu anaamba kukala, ‘Hata ukauruka dzulu sana dza kozi au ukaika midziyo kahi-kahi za nyenyezi chisha nindakutsereza vivyo.’ ”

⁵Majambazi au aivi amenyererapho atu usiku, nkuiya vitu alondavyo tu. Na atu avunapho zabibu nkusaza-saza ili achiya nao aphahe kutsembwesa. Ela uwe undaangamizwa tsetsetse.

⁶Kpwa kpweli uwe Edomu, yani chivyazi cha Esau undafutwa chila chitu, hata yo akibayo uriyofwitsa, indaendzwa ihalwe.

⁷Hinyo osi achiogbwirana nawe andakuzola kula tsiiyo. Hinyo urioika nao chilagane andakuchenga na kukuturya. Asenao a chala na pete andakuchenga na akuhege, bila uwe mwenye kumanya.

⁸“Mwenyezi Mlungu anaamba, Siku iyo nindabananga-bananga enye ikima osi a Edomu atu enye ufahamu kahi ya milima ya Esau.

⁹Mwimwi masujaa a mudzi wa Temani, mundagbwirwa ni mchecheta. Chila ariye kahi ya mwango wa Esau andaolagbwa.”

¹⁰Kpwa sababu ya uyi muriohendera ndugu zenu ana a Jakobo mundaaibishwa; na mʼbanangbwe hata kare na kare.

¹¹Wakati hura atu ambao sio Ayahudi ariphomenya Jerusalemu na kuahala mateka ndugu zenu phamwenga na vitu vyao na kuiganya Jerusalemu kpwa kupiga kura, mwimwi mwaima kanda mchilorera avi kala mu phamwenga na higo maadui.

¹²Msingeonato wakati ndugu zenu kala a mashakani. Msingehererwa wakati mudzi wao unaangamizwa. Mwahenda makosa kpwa kutseka ndugu zenu siku ya mashaka gao.

¹³Siku iyo ya mashaka gao, msingevyoga maryango ga atu angu. Msingeonato wala msingehala vitu vyao.

¹⁴Msingeima maganikoni ili kugbwira hara ariokala anachimbira, Msingealavya kpwa maadui gao hinyo ariokala akatiya siku ya mashaka gao.

¹⁵Mana siku ya Mwenyezi Mlungu kuamula mataifa gosi i phephi. Na hivyo murivyoahendera ayawenu mwi atu a Edomu, namwi mundahenderwa dza vivyo. Mambo mai gosi mrigogahenda gandakuuyirani enye.

¹⁶Mwenyezi Mlungu waenderera kuamba, “Mana dza viratu atu a Juda arivyophaha mashaka dzulu ya mwango wangu mtakatifu, mataifa ganjina gosi gandagaya dza vivyo andagaya kpwa kugaya hadi asire tsetsetse ikale avi taayakalapho hipha duniani.

¹⁷Ela mwango wa Sayuni phandakala na atu ndiotiya napho phandakala phatakatifu. Atu a nyumba ya Jakobo ndiosala andahala tsona urisi wao kula kpwa maadui gao.

¹⁸Atu a chivyazi cha Esau andakala dza mibuwa mifu ela atu a chivyazi cha Jakobo na cha Yusufu indakala dza moho uakao. Nazo zindaocha atu a chivyazi cha Esau tsetsetse bila kusaza hata mutu mmwenga, mimi Mwenyezi Mlungu nkaamba.”

¹⁹Atu asagalao jangbwa ra uphande wa mwakani wa Juda, andahala mwango wa Esau. Atu asagalao tsi za myango ya Juda andahala tsi ya Afilisti, ya Efuraimu na ya Samariya. Mbari ya Benjamini nayo indahala tsi ya Giliadi.

²⁰Kundi ra Aiziraeli ariotsamizwa kpwa lazima kula Kanani andakpwedza ahale tsi yosi hadi Sarefathi. Atu a Jerusalemu ariotsamizwa kpwa lazima ambao kala a Sefaradi, nyo andahala midzi ya jangbwa ra uphande wa mwakani wa Juda.

²¹Atu a Jerusalemu ariotiya andapanda mwango Sayuni ili autawale mwango wa Esau, na Mwenyezi Mlungu mwenye ndiye ndiyekala mfalume wao.