Read digo Mika 6 Bible Online

Mika 6 - digo bible

Mika 6

¹Sambi phahi phundzani agombavyo Mwenyezi Mlungu. Iye anaamba, “Ima urehe malaugo mbere za myango na udzikanire mbere ya vidzango.

²Sikirani malalamishi ga Mwenyezi Mlungu mwimwi myango na mwimwi misingi ya kudumu ya dunia. Mana Mwenyezi Mlungu ana malau na atue na andauzana maswali na Aiziraeli.”

³“Mwi atu angu, nkakuhendani utu wani? Nikakuremwezani na ni? Hebu nijibuni.

⁴Nákutuluzani Misiri nchikukombolani kula tsi ambayo kala mu atumwa. Námuhuma Musa phamwenga na Aruni na Miriamu, edze akulongozeni.

⁵Atu angu tambukirani vira Balaki[5] mfalume wa Moabu arivyokupangirani mai na vira Balaamu mwana wa Beori arivyomjibu. Tambukirani gara garigohendeka hangu mriphola Shitimu[6] hadi mriphofika Giligali, ili mmanye mahendo ga haki ga Mwenyezi Mlungu.”

⁶Ndiphokpwedza mbere za Mwenyezi Mlungu kusujudu, nimrehereni Mlungu ariye dzulu? Dze, nedze na sadaka za kuochwa za ana ndzau a mwaka mmwenga-mmwenga?

⁷Dze, Mwenyezi Mlungu andahamirwa ni maelufu ga maturume au myuho maelufu na maelufu ga mafuha ga zaituni? Dze, nimulavye mwanangu wa mbere kpwa kuniriphira makosa gangu, mlatso wangu mwenye kpwa sababu ya dambi yangu?

⁸Hata, uwe mwanadamu Mwenyezi Mlungu akakuonyesa ririro ra sawa. Ye Mwenyezi Mlungu analonda utu wani? Iye analonda uhende haki na ukale na mendzwa isiyosika, ukale mutu wa kugbwa maguluni mbereze.

⁹Phundzani! Mwenyezi Mlungu anagomba na atu a Jerusalemu! Kuogopha dzinare ni ikima. Mwenyezi Mlungu anaamba, “Sikira we taifa na osi achiokusanyika mo mudzini.

¹⁰Uwe nyumba ya uyi, siweza kuyala hazinayo uriyoiphaha kpwa handzo na vipimo vya handzo ambavyo navizira.

¹¹Dze, nimuhesabire mutu ahumiraye mizani ya handzo kukala kana hatiya hiye ariye na mawe ga kupimira gasigo sawa?

¹²Atue ario matajiri a mudzi wa fujo na enyezie ana handzo aho anagomba handzo.

¹³Kpwa hivyo nikaandza kukubanangani, nami ndakuangamizani kpwa sababu ya dambi zenu.

¹⁴Mundarya ela tamundamvuna, mundaenderera kukala na ndzala. Mundaika ela tamundakala na akiba, kpwa sababu hicho mndichoika akiba chindahalwa zewe wakati wa viha.

¹⁵Mundaphanda ela tamundavuna, mundaminya zaituni ela tamundadzipaka mafuhage, mundavyoga zabibu ela tamundanwa uchiwe.

¹⁶Mkagbwira malagizo ga mfalume Omuri na mahendo gosi ga mfalume Ahabu na chivyaziche, na mkalunga mila zao. Kpwa hivyo ndakuangamizani ndahenda atu enu anyeterwe, mataifa gosi gandakuberani.”