Read digo Zefania 2 Bible Online

Zefania 2 - digo bible

Zefania 2

¹Mwimwi atu a taifa risiro na haya, kusanyikani phamwenga

²kabila tamdzangbwephepheruswa dza wiswa, kabila Mwenyezi Mlungu kadzangbwekuhenderani mai kulengana na tsukizize nyinji, kabila siku ya Mwenyezi Mlungu kuonyesa tsukizize kufika.

³Muendzeni Mwenyezi Mlungu mwi atu anyenyekevu murio kpwenye tsi, mlungao amurize. Hendani haki na mnyenyekee nkuhenda mkaepuka kutiywa adabu siku iyo ya tsukizi za Mwenyezi Mlungu.

⁴Mudzi wa Gaza undarichwa, wa Ashikeloni undakala gandzo. Atu a Ashidodi nao andazolwa mutsi wenye, na atu a Ekironi andauswa kpwenye mudzi wao.

⁵Shaka hiro mwi atu kula Kerethi msagalao pwani kulunga-lunga bahari. Neno ra Mwenyezi Mlungu ri chinyumecho uwe Kanani, yani tsi ya Afilisti. Ndakuangamiza na taphana hata mutu ndiyesala kpwenye tsiiyo.

⁶Tsi yenu ya pwani indahendwa weru wa kurisa na kudzengbwa vibanda vya arisa na vyaa vya mangʼondzi na mbuzi.

⁷Yo tsi ya pwani indakala ya atu a Juda ndiosala, na kuko andaphaha marisa. Dziloni andakpwedza aoye kpwenye nyumba zorichwa hiko Ashikeloni, mana Mwenyezi Mlungu, Mlungu wao andaamanyirira, na aauyizire hali nono ariyokala nayo pho mwandzo.

⁸“Nkasikira ufyozi wa Amoabu na Aamoni anyetavyo vira ambavyo osi afyorera atu angu, na kudzikarya kukala andahala tsi yao.

⁹Kpwa hivyo, mimi Mwenyezi Mlungu, Mlungu wa majeshi naamba, kpwa kpweli dza niishivyo, mimi Mlungu wa Iziraeli, naapa kukala Moabu indakala dza Sodoma na Amoni indakala dza Gomora. Tsi hizo zindamera mihi ya miya na madibwa ga munyu,[2] na zindakala tuphu hata kare na kare. Atu angu ndiosala andaziteka tsi zao, atu a taifa rangu ndiosala andazihala zikale urisi wao.”

¹⁰Higo gandakala maripho ga ngulu zao kpwa kukala afyola na achidzikarya chinyume cha atu a Mwenyezi Mlungu, Mlungu wa majeshi.

¹¹Mwenyezi Mlungu andaaogofyera, mana andabananga-bananga milungu yosi kpwenye yo tsi, na atu a pwani zosi andamsujudiya kuko kpwenye tsi zao.

¹²Mwenyezi Mlungu anaamba, “Piya mwimwi atu a Kushi mundaolagbwa na upanga wangu.”

¹³Mwenyezi Mlungu andagolosa mkpwonowe chinyume cha vurini na kuangamiza tsi ya Ashuru. Andauhenda mudzi wa Ninawi ukale gandzo na tsiiye ikale kavu dza jangbwa.

¹⁴Mifugo ya chila aina indakala mumo na chila aina ya nyama a tsakani. Vimburu vindalala dzulu ya magandzoge, vindarira mo madirishani. Makunguru gandarira vizingitini. Mapambo ga mierezi gandarichwa phereru.

¹⁵Ninawi iriyodzikarya kukala i salama, yadziamba, “Takuna wanjina dza mimi.” Haya vino lola, ikakala gandzo na makalo ga nyama a tsakani. Chila atsupaye phephi na phapho anaufyorera na kuubera.