Read digo Luka 1 Bible Online

Luka 1 - digo bible

Luka 1

¹Muishimiwa Theofilo: Atu anji aandika kare habari za mambo gohendeka ku kpwehu.

²Ahumira maelezo ga hara arioona mambo higa na matso gao kula mwandzo na ambao atangaza habari hizo.

³Muishimiwa Theofilo, bada ya kugachunguza gosi sawa-sawa kula mwandzo, nami náona inafwaha nikuandikire kpwa mpango,

⁴ili nawe udzionere mwenye ukpweli wa mambo hurigofundzwa.

⁵Wakati Herode kala ni mfalume wa tsi ya Judea, kpwakala kuna mlavyadzi-sadaka mmwenga yeihwa Zakariya. Mutu hiye wahenda kazi na chikundi cha Abija. Mchewe kala ni Elizabethi, naye piya kala ni wa chivyazi cha Aruni.

⁶Osi airi kala ni atu a kumuogopha Mlungu, alunga shariya za Mlungu na malagizoge gosi bila lawama tse.

⁷Ela kala taana mwana, mana Elizabethi kala ni tasa, tsona osi airi kala ni atumia sana.

⁸Siku mwenga, kala ni zuma ra chikundi cha Zakariya kulavya sadaka.

⁹Mila yao kala ni kupiga kura kutsambula mmwenga kuinjira Nyumba ya Kuvoya Mlungu kufukiza ubani, na siku iyo kura yamgbwerera Zakariya.

¹⁰Wakati Zakariya kala anafukiza ubani himo ndani, kundi rosi ra atu kala rinavoya hiko kondze.

¹¹Phahi Malaika wa Mlungu wamtsembukira mo ndani, achiima mkpwono wa kulume wa phatu pha kufukizira uvumba.

¹²Zakariya ariphomuona yuya malaika wakala na wasiwasi na achiogopha.

¹³Ela malaika achimuamba, “Usiogophe Zakariya! Mlungu wasikira mavoyogo na mcheo Elizabethi andavyala mwana mlume. Nawe undamuiha Johana.

¹⁴Ni raha ya viphi yo ndiyokala nayo, na atu anji andahererwadze ndiphovyalwa ye mwana!

¹⁵Mlungu andamuona mutu muhimu. Ni lazima asinwe uchi wala asihumire ulevi wa aina yoyosi, na andatawalwa ni Roho Mtakatifu hangu ndanini mwa nine.

¹⁶Na andaaelekeza Aiziraeli anji kumuogopha Mlungu wao tsona.

¹⁷Andamtanguliya Mlungu na nguvu na uwezo dza viratu nabii Elija. Andaapatanisha ano baba na ana ao; andaagaluza atu asiomuogopha Mlungu kukala na maazo ga kumuogopha Mlungu na andamtayarishira Mlungu atue.”

¹⁸Zakariya achimuuza yuya malaika, “Nindamanyadze kala mambo higa gandahendeka kpweli? Mimi ni mtumia sana na mkpwazangu naye piya ni mtumia.”

¹⁹Malaika achimuamba, “Mimi ni Gaburaeli, niimaye mbere za Mlungu kumuhumikira, na nkahumwa nedze nikuambire higa mambo manono.

²⁰Sikiza, undakala bwibwi kpwa sababu kukaamini maneno gangu, ambago gandakala wakatiwe uchifika. Kundagomba hadi higo chigokuambira gahendeke.”

²¹Wakati hinyo, hara atu kura kondze kala anamgodzera Zakariya kuno akatezeka kpwadze anakaa mo ndani ya Nyumba ya Kuvoya Mlungu.

²²Ariphotuluka kondze, achikala kaweza kubisha nao. Ndipho hara atu achimanya kala Zakariya akaphaha ruwiya mo ndani ya Nyumba ya Kuvoya Mlungu. Kayaweza kugomba ela kala anabisha nao na mikono.

²³Zakariya ariphomala zumare, waphiya kaya.

²⁴Badaye mchewe Elizabethi wagbwira mimba. Wadzifwitsa nyumbani miezi mitsano.

²⁵Waamba, “Sambi Mlungu akaniterya, akaniusira waibu nriokala nao mbere za atu.”

²⁶Mwezi wa sita wa mimba ya Elizabethi, yuya malaika Gaburaeli wahumwa ni Mlungu aphiye mudzi wa Nazareti ko jimbo ra Galilaya,

²⁷kpwa msichana mmwenga mwanamwali aihwaye Maryamu. Hiye Maryamu kala ni mchumba wa mutu yeihwa Yusufu ambaye kala ni chivyazi cha Mfalume Daudi.

²⁸Malaika ariphofika kpwa Maryamu achimuamba, “Togola we umendzwaye sana! Mlungu wakujaliya.”

²⁹Maryamu wayugika sana na maneno higa, na achidziuza mana ya mwadzo hinyo.

³⁰Malaika achimuamba, “Usiogophe Maryamu, mana Mlungu wakujaliya.

³¹Sikiza, undagbwira mimba na undavyala mwana mlume na undamuiha Jesu.

³²Naye andakala mkpwulu na andaihwa mwana wa Mwenyezi Mlungu. Bwana Mlunguo andamuhenda mfalume dza mkarewe Daudi.

³³Naye andakala mfalume wa atu a chivyazi cha Jakobo hata kare na kare, na utawalawe taundakala na mwisho.”

³⁴Maryamu achimuuza yuya malaika, “Gandakaladze gano, na bado mino nchere mwanamwali?”

³⁵Achiambwa, “Undakpwedzerwa ni Roho Mtakatifu na nguvu za Mwenyezi Mlungu zindakufwinika. Kpwa hivyo ndiyevyalwa andaihwa Mtakatifu, Mwana wa Mlungu.

³⁶Piya umanye kala mʼbario Elizabethi ana mimba ya mwana mlume, hata dzagbwe atu kala achiamba ni tasa; phamwenga na utumiawe, huno ni mweziwe wa sita.

³⁷Mana kpwa Mlungu takuna rorosi risirowezekana.”

³⁸Maryamu achiamba, “Mimi ni muja wa Mlungu, naikale kama uchivyoamba.” Alafu yuya malaika achiuka.

³⁹Phahi, bada ya muda, Maryamu waphiya mara mwenga kpwa Elizabethi, mudzi mmwenga urio myango ya Juda.

⁴⁰Wamenya nyumbani mwa Zakariya na achendalamusa Elizabethi.

⁴¹Elizabethi ariphosikira mwadzo wa Maryamu, yuya mwana mura ndanini wasumba. Chisha Elizabethi walongozwa ni Roho Mtakatifu,

⁴²achikota kululu achiamba, “Wajaliwa kuriko achetu osi na hiye ndiyemvyala piya wajaliwa!

⁴³Ni ajabu ya viphi yo, nine wa Bwana wangu kpwedza kpwangu kunijambosa!

⁴⁴Lola! Nchiphosikira mwadzoo tu, mwanangu himu ndanini akasumba-sumba kpwa raha.

⁴⁵Wajaliwa uwe yeamini kala gandahendeka gara ambago Mlungu wakuambira!”

⁴⁶Naye Maryamu achiamba: “Roho yangu inamtogola Mlungu,

⁴⁷na inahererwa kpwa sababu ya Mlungu Muokoli wangu.

⁴⁸Kpwa mana Mlungu wanionera mbazi mimi mtumishiwe mnyonje. Hangu sambi vivyazi vyosi vindaniiha yejaliwa.

⁴⁹Kpwa sababu Mlungu wa Uwezo Wosi wanihendera mambo makulu, naye dzinare ni takatifu.

⁵⁰Andaaonera mbazi atu amuogophao, vivyazi na vivyazi.

⁵¹Wahenda mambo makulu na uwezowe; waatsamula atu a mioyo ya kudzikarya.

⁵²Waausira ufalume wao afalume akulu-akulu, na achiahenda muhimu anyonje.

⁵³Waamvunisa andzala na mambo manono-manono, ela achiausa matajiri mikono mihuphu.

⁵⁴Waaterya Aiziraeli atumishie, na achiaonera mbazi,

⁵⁵ Burahimu na uvyaziwe hata kare na kare, kama vyoalaga akare ehu.”

⁵⁶Maryamu wasagala kama miezi mihahu na Elizabethi, ndipho achiuya kaya.

⁵⁷Wakati wa kuvyala uriphofika, Elizabethi wavyala mwana mlume.

⁵⁸Ndugu na majirani ga Elizabethi ariphosikira kala Mlungu akamjaliya mwana, ahererwa piya.

⁵⁹Mwana ariphokala akamala sabaa mwenga, akpwedza atu achimdeka, na atu kala analonda amuihe dzina ra Zakariya, dzina ra ise.

⁶⁰Ela nine achiamba, “Hata! Kandaihwa hivyo, ela ni aihwe Johana.”

⁶¹Hara atu achimuamba, “Ni mʼbario ani aihwaye Johana?”

⁶²Phahi, abisha na mikono na ise wa yuya mwana ili amanye analonda kumuiha ani.

⁶³Hipho, Zakariya wavoya chibao cha kuandikira, achiandika hivi: “Dzinare ni Johana.” Na atu osi achiona ajabu!

⁶⁴Phapho hipho Zakariya achivugulwa kauli, achimtogola Mlungu.

⁶⁵Majirani osi aangalala na achiogopha. Mambo higo gaenea seemu za gambani za tsi yosi ya Judea.

⁶⁶Osi ariosikira mambo higo aririkana mwao mioyoni na achiamba, “Mwana yuno andakala mutu wa viphi?” Mana kala ni wazi kala uwezo wa Mlungu kala u phamwenga naye.

⁶⁷Alafu Zakariya ise wa Johana, walongozwa ni Roho Mtakatifu na achiaambira atu maneno ga Mlungu:

⁶⁸“Naatogolwe Bwana Mlungu wa Iziraeli, mana wakpwedza kuterya na kukombola atue.

⁶⁹Wahurehera muokoli wa uwezo mkpwulu, kula kpwa chivyazi cha mtumishiwe Daudi,

⁷⁰kama arivyolaga hipho kare, ariphohumira manabiige matakatifu,

⁷¹kukala andahuokola kula kpwa maadui gehu na atu osi ariohuzira.

⁷²Mlungu waamba andaonera mbazi akare ehu, na andatimiza ahadiye takatifu.

⁷³Ahadiye yomlaga mkare wehu Burahimu:

⁷⁴Kukala andahutivya kula kpwa maadui gehu na andahujaliya ili humhumikire bila wuoga,

⁷⁵piya hudzitenge kumuhumikira Mlungu, na hulunge haki siku zosi za maisha gehu.

⁷⁶Nawe mwanangu, undaihwa nabii wa Mwenyezi Mlungu, mana undatanguliya Mlungu kumtayarishira njiraze,

⁷⁷kuatangazira atue kukala andaaokola, kpwa kuswamehewa dambi zao.

⁷⁸Mlungu wehu ni mpole na wa mbazi; andahurehera mwanga wa dzuwa wa wokofu kula mlunguni.

⁷⁹Undaangʼarira atu ario jizani, ambaro ni dalili ya chifo, na undahuelekeza maisha ga salama.”

⁸⁰Phahi, yuya mwana wakula, na achiphera chiroho. Naye wasagala vidze-vidze hadi siku ariyotsembukira Aiziraeli chingʼangʼa.