Read dyu Koow daminɛ kitabu 11 Bible Online

Koow daminɛ kitabu 11 - dyu bible

Koow daminɛ kitabu 11

¹Diɲɛ kɔnɔ mɔgɔw bɛɛ tun be kaan kelen ni kuma kelen le fɔ.

²K'u to munumunu na ka to ka taga kɔrɔn ɲafan fɛ, u ye kɔkɛnɛ dɔ ye Sineyari mara la ka sigi yen.

³U y'a fɔ ɲɔgɔn ye ko: «Aw ye na, an ka biriki gosi k'u jɛni.» O kɛra u ka kabakuruw ye, ka bɔgɔmanan kɛ k'a lɔ.

⁴U ko: «Aw ye na, an ka dugu sigi, ka sangasojan lɔ a kɔnɔ, a kuun ka se fɔɔ sankolo la, an ka tɔgɔba sɔrɔ, janko an kana jɛnsɛn dugukolo yɔrɔ bɛɛ la.»

⁵U tun be dugu ni sangasojan min lɔra, Masaba jigira ka na o filɛ.

⁶A ko: «U bɛɛ ye siya kelen ye, u bɛɛ be kaan kelen fɔ. N'u y'a daminɛ ten, foyi tena u bali k'u ka koo latigɛninw kɛ.

⁷Aw ye to an ka jigi k'u ka kaan ɲagami, janko u kana ɲɔgɔn ka kaan mɛn tugu.»

⁸O la, Masaba y'u jɛnsɛn ka bɔ yen. U tagara dugukolo yɔrɔ bɛɛ la k'o dugu sigiko dabila.

⁹O le y'a to u y'o yɔrɔ wele ko Babɛli, [1] bari Masaba ye diɲɛ mɔgɔw bɛɛ ka kaan ɲagami yen, k'u jɛnsɛn ka bɔ o yɔrɔ la, ka taga dugukolo yɔrɔ bɛɛ la.

¹⁰Sɛmu kɔmɔgɔw filɛ nin ye. Sɛmu ye saan kɛmɛ sɔrɔ tuma min na, a ye Aripakisadi wolo, saan fila sanjiba tɛmɛnin kɔ.

¹¹Aripakisadi wolonin kɔ, Sɛmu ye saan kɛmɛ duuru kɛ, a ye dencɛ ni denmuso wɛrɛw sɔrɔ.

¹²Aripakisadi ye saan bi saba ni duuru sɔrɔ tuma min na, a ye Sela wolo.

¹³Sela wolonin kɔ, Aripakisadi ye saan kɛmɛ naani ani saba kɛ, a ye dencɛ ni denmuso wɛrɛw sɔrɔ.

¹⁴Sela ye saan bi saba sɔrɔ tuma min na, a ye Ebɛri wolo.

¹⁵Ebɛri wolonin kɔ, Sela ye saan kɛmɛ naani ani saba kɛ, a ye dencɛ ni denmuso wɛrɛw sɔrɔ.

¹⁶Ebɛri ye saan bi saba ni naani sɔrɔ tuma min na, a ye Pelɛgi wolo.

¹⁷Pelɛgi wolonin kɔ, Ebɛri ye saan kɛmɛ naani ni bi saba kɛ, a ye dencɛ ni denmuso wɛrɛw sɔrɔ.

¹⁸Pelɛgi ye saan bi saba sɔrɔ tuma min na, a ye Erewu wolo.

¹⁹Erewu wolonin kɔ, Pelɛgi ye saan kɛmɛ fila ni kɔnɔntɔn kɛ, a ye dencɛ ni denmuso wɛrɛw sɔrɔ.

²⁰Erewu ye saan bi saba ni fila sɔrɔ tuma min na, a ye Serugi wolo.

²¹Serugi wolonin kɔ, Erewu ye saan kɛmɛ fila ni wolonwula kɛ, a ye dencɛ ni denmuso wɛrɛw sɔrɔ.

²²Serugi ye saan bi saba sɔrɔ tuma min na, a ye Nawɔri wolo.

²³Nawɔri wolonin kɔ, Serugi ye saan kɛmɛ fila kɛ, a ye dencɛ ni denmuso wɛrɛw sɔrɔ.

²⁴Nawɔri ye saan mugan ni kɔnɔntɔn sɔrɔ tuma min na, a ye Tera wolo.

²⁵Tera wolonin kɔ, Nawɔri ye saan kɛmɛ ni tan ni kɔnɔntɔn kɛ, a ye dencɛ ni denmuso wɛrɛw sɔrɔ.

²⁶Tera ye saan bi wolonwula sɔrɔ, a ye Abramu ni Nawɔri ani Aran wolo.

²⁷Tera kɔmɔgɔw filɛ nin ye. Tera ka deenw ye Abramu ni Nawɔri ani Aran ye. Aran fana tun ye Lɔti wolo.

²⁸Aran kɔnna ka sa a facɛ Tera ɲa k'u to a wolodugu la Uri, Kalide jamana na.

²⁹Abramu ni Nawɔri ye musow furu. Abramu muso tɔgɔ tun ko Sarayi, Nawɔri ta tɔgɔ ko Milika, o tun ye Aran denmuso ye. Aran le tun ye Milika ni Isika wolo.

³⁰O y'a sɔrɔ Sarayi tun ye muso denwolobali ye, a ma deen sɔrɔ.

³¹Tera tagara n'a dencɛ Abramu ye, ani a mamaden Lɔti, min tun ye Aran dencɛ ye, ani a biranmuso Sarayi, min tun ye a dencɛ Abramu muso ye. U bɔra Uri, Kalide jamana na ko u be taga Kanaan jamana na. U sera Aran tuma min na, u sigira o yɔrɔ la.

³²Tera sii bɛɛ tun ye saan kɛmɛ fila ni duuru ye. A sara Aran.