Read dyu Koow daminɛ kitabu 12 Bible Online

Koow daminɛ kitabu 12 - dyu bible

Koow daminɛ kitabu 12

¹ Masaba y'a fɔ Abramu ye ko: «Bɔ i ka jamana na, faran i ka mɔgɔw n'i faso la, ka taga jamana dɔ la, ne bena min yira i la.

²Ne bena i kɛ siya dɔ faa ye, min bena caya, ne bena hɛrɛ kɛ i ye, k'i tɔgɔ boɲa. Mɔgɔw bena hɛrɛ sɔrɔ i barika la.

³ Mɔgɔ min mana duba kɛ i ye, ne bena o tigi ta ɲa. Min mana i danga, ne bena o ta cɛn. E le barika la, dugukolo kan siyaw bɛɛ bena hɛrɛ sɔrɔ.»

⁴Abramu wilila ka taga i n'a fɔ Masaba y'a fɔ a ye cogo min na. Lɔti fana tagara n'a ye. Abramu sii tun ye saan bi wolonwula ni duuru ye a bɔwaati la Aran.

⁵A tagara n'a muso Sarayi ye, n'a dɔgɔnin dencɛ Lɔti ye, ani a ka nafolo bɛɛ, n'a ka jɔɔnw bɛɛ, u tun ye minw sɔrɔ k'u to Aran. U bɔra ka Kanaan jamana sira minɛ, ka taga se yen.

⁶Abramu ye jamana nin cɛtigɛ fɔɔ ka taga se Sisɛmu mara la, More joyiri yɔrɔ la. O waati la, kanaanw tun be jamana nin kɔnɔ.

⁷ Masaba y'a yɛrɛ yira Abramu la k'a fɔ a ye ko: «Ne bena jamana nin d'i kɔmɔgɔ ma.» O la, Abramu ye sarakabɔyɔrɔ lɔ Masaba ye o yɔrɔ la, ale min tun y'a yɛrɛ yira a la.

⁸Abramu bɔra o yɔrɔ la ka taga kuluw yɔrɔ la Betɛli kɔrɔn ɲafan fɛ. A y'a ka fanibugu lɔ ka Betɛli to a tileben ɲafan fɛ, ka Ayi to a kɔrɔn ɲafan fɛ. A ye sarakabɔyɔrɔ lɔ Masaba ye o yɔrɔ la fana, ka Masaba bato yen.

⁹O kɔ, a ye sira minɛ tugu ka taga Kanaan jamana worodugu ɲafan fɛ.

¹⁰Kɔngɔ donna Kanaan jamana na. Abramu wilila ka taga Ezipiti jamana na, ka sigi yen, bari kɔngɔ nin tun juguyara.

¹¹A surunyana Ezipiti la tuma min na, a y'a fɔ a muso Sarayi ye ko: «Ne y'a lɔn ko i cɛɛ ka ɲi.

¹²Ni Ezipitikaw ɲaa lara i kan, u ben'a fɔ ko i ye ne muso ye, o la, u bena ne faga k'i to yen.

¹³ Ne b'a ɲini i fɛ i k'a fɔ ko i ye ne dɔgɔmuso ye janko u ka ne minɛ ka ɲa i kosɔn, ne nii be kisi i sababu la.»

¹⁴Abramu sera Ezipiti tuma min na, Ezipitikaw y'a ye ko a muso cɛɛ ka ɲi kosɔbɛ.

¹⁵Ezipiti masacɛ ka mɔgɔbabaw y'a ye tuma min na, u y'a koo fɔ a ye. U y'a minɛ ka taga n'a ye masacɛ ka soo.

¹⁶Masacɛ ye Abramu minɛ ka ɲa Sarayi kosɔn, ka misiw ni begɛnmisɛnw d'a ma, ani faliw, ni jɔncɛw ni jɔnmusow, ani ɲɔgɔmɛw.

¹⁷Nga Masaba ye masacɛ n'a ka somɔgɔw tɔɔrɔ kosɔbɛ Abramu muso Sarayi kosɔn.

¹⁸O la, masacɛ ye Abramu wele k'a fɔ a ye ko: «I ye mun le kɛ ne la ten? Mun na i m'a fɔ ne ye ko i ka muso lo?

¹⁹Mun na i y'a fɔ ne ye ko i dɔgɔmuso lo, fɔɔ ne y'a minɛ k'a kɛ n muso ye? Sisan, i muso filɛ nin ye. A minɛ ka taga n'a ye!»

²⁰Masacɛ ye cii fɔ a ka mɔgɔw ye, k'u ka sira di Abramu ma a ka taga n'a ka muso ani a ka bololafɛnw bɛɛ ye.