Read dyu Koow daminɛ kitabu 13 Bible Online

Koow daminɛ kitabu 13 - dyu bible

Koow daminɛ kitabu 13

¹Abramu bɔra Ezipiti jamana na ka taga Kanaan worodugu ɲafan fɛ, ale n'a ka muso n'a ka bololafɛnw bɛɛ. Lɔti fana tagara n'a ye.

²Abramu tun ye nafolobatigi ye, begɛnw ni warigwɛ ani sanu caaman tun b'a fɛ.

³A bɔra Kanaan worodugu ɲafan fɛ ka to ka sigi ka taga dɔɔni dɔɔni fɔɔ ka taga se Betɛli, a tun kɔnna ka sigi o yɔrɔ min na, Betɛli ni Ayi cɛ,

⁴a tun kɔnna ka sarakabɔyɔrɔ lɔ yɔrɔ min na. Abramu ye Masaba bato o yɔrɔ la.

⁵Lɔti min tun be ni Abramu ye, misiw ni begɛnmisɛnw tun be ale fɛ fana, ani fanibuguw.

⁶U tun te se ka sigi ɲɔgɔn fɛ, o yɔrɔ tun ka dɔgɔ u ma, bari fɛɛn caaman tun be u bolo.

⁷Loon dɔ, kɛlɛ donna Abramu ka begɛndɛndɛbagaw ni Lɔti taw cɛ. (O y'a sɔrɔ kanaanw ni periziw siginin tun be jamana nin kɔnɔ.)

⁸O la, Abramu y'a fɔ Lɔti ye ko: «An kana kɛlɛ, an ka begɛnmaralaw fana kana kɛlɛ, bari an ye balimaw ye.

⁹Jamana nin bɛɛ filɛ nin ye. An ka faran ɲɔgɔn na. N'i tagara numan fɛ, ne be taga kinibolo faan fɛ. N'i tagara kinibolo faan fɛ, ne be taga numan fɛ.»

¹⁰ Lɔti y'a ɲaa kɔrɔta ka Zurudɛn baji kɛnɛ bɛɛ filɛ. A y'a ye ko jii caaman be o yɔrɔ bɛɛ la. A tun be i n'a fɔ Masaba ka yɔrɔɲuman min tun ye Edɛn ye. A tun be i n'a fɔ Ezipiti jamana ka taga Sowari dugu faan fɛ. O y'a sɔrɔ Masaba tun ma Sodɔmu ni Gɔmɔri dugu halaki fɔlɔ.

¹¹Lɔti ye Zurudɛn baji kɛnɛ bɛɛ ta. A tagara kɔrɔn ɲafan fɛ. A kɛra ten, Abramu ni Lɔti faranna ɲɔgɔn na.

¹²Abramu sigira Kanaan jamana na, Lɔti tagara munumunu Zurudɛn baji kɛnɛ duguw gɛrɛfɛ, k'a ka fanibuguw lɔ Sodɔmu gɛrɛfɛ.

¹³Sodɔmukaw tun ka jugu, u tun be Masaba hakɛ ta kosɔbɛ.

¹⁴Lɔti faranna Abramu la ka ban tuma min na, Masaba y'a fɔ Abramu ye ko: «K'i to i ka yɔrɔ la, i ɲaa kɔrɔta ka filɛli kɛ kɔgɔdugu, ni worodugu ɲafan fɛ, ka kɔrɔn fɛ ni tileben fana filɛ.

¹⁵ I ɲaa be jamana min na, ne bena o bɛɛ di e n'i kɔmɔgɔ ma a ka to aw bolo kudayi.

¹⁶Ne bena i kɔmɔgɔ caya i n'a fɔ cɛncɛn fɔɔ u te se ka jati, i n'a fɔ cɛncɛn te se ka jati cogo min na.

¹⁷Wili ka jamana nin yɔrɔ bɛɛ yaala, bari ne ben'a d'i ma.»

¹⁸Abramu wilila ka ta'a ka fanibuguw lɔ Manbure joyiriw gɛrɛfɛ Eburɔn, ka sigi yen. A ye sarakabɔyɔrɔ lɔ Masaba ye o yɔrɔ la.