Read dyu Koow daminɛ kitabu 15 Bible Online

Koow daminɛ kitabu 15 - dyu bible

Koow daminɛ kitabu 15

¹O koow tɛmɛnin kɔ, Masaba y'a yɛrɛ yira Abramu la k'a fɔ a ye ko: «Abramu, i kana siran. Ne y'i tangabaga ye i n'a fɔ kɛlɛden ka nigɛkunbɛnnan, i ka sara bena caya kosɔbɛ.»

²Abramu ko: «Matigi, Masaba, nafa t'a la ka fɛɛn di ne ma tugu. Ne bena taga ni deen te n fɛ, ne cɛɛn tabaga bena kɛ Eliyezɛri ye ka bɔ Damasi.

³«I ma deen di ne ma. O la, jɔɔn minw wolola ne ka soo, olu dɔ bena ne cɛɛn ta.»

⁴O tuma na, Masaba y'a fɔ ko: «Ale tena i cɛɛn ta. I yɛrɛ woloden le bena i cɛɛn ta.»

⁵ A bɔra ni Abramu ye kɛnɛma k'a fɔ a ye ko: «Sankolo filɛ, lolow jati, i be se k'u jati wa? I kɔmɔgɔw bena caya ten.»

⁶ Abramu lara Masaba la, o la, a y'a jati mɔgɔtilennin ye.

⁷Masaba y'a fɔ a ye fana ko: «Ne ye Masaba ye. Ne le y'i bɔ Uri, Kalide jamana na, janko ka jamana nin d'i ma i ka kɛ a tigi ye.»

⁸Abramu ko: «Matigi, Masaba, ne ben'a lɔn cogo di ko ne bena kɛ a tigi ye?»

⁹Masaba y'a fɔ a ye ko: «I ka misimuso ni bamuso ni sagajigi minɛ ka na n'u ye, u kelen kelen bɛɛ ka saan saba saba sɔrɔ, ani tuganin kelen ni jɛnɛtuba kelen.»

¹⁰Abramu y'o fɛɛn nunu bɛɛ minɛ k'u cɛ ci fila fila, k'u bilabila ɲɔgɔn kɔrɔ, nga a ma kɔnɔw cɛ ci.

¹¹Kɔnɔw jigira sogo nunu kan, nga Abramu y'u gwɛn.

¹² Tile bentuma na, sinɔgɔ ye Abramu minɛ, siranya fana tun b'a la kosɔbɛ, a sinɔgɔra kosɔbɛ.

¹³ Masaba y'a fɔ a ye ko: «I k'a lɔn tigitigi ko i kɔmɔgɔw bena kɛ lonanw ye jamana wɛrɛ la. U bena kɛ jɔɔnw ye, u bena tɔɔrɔ saan kɛmɛ naani kɔnɔ.

¹⁴ Nga u bena kɛ jɔɔnw ye siya min fɛ, ne bena olu ɲagwan. O kɔ, u bena bɔ o yɔrɔ la ni nafoloba ye.

¹⁵E kɔni, e bena kɔrɔ ka sɔrɔ ka sa, i suu be don hɛrɛ la.

¹⁶I kɔmɔgɔw *filankuru naaninan le bena kɔsegi ka na yan, bari amoriw minw siginin be jamana nin kɔnɔ, olu ka juguya ma se a daan ma fɔlɔ. N'a ser'a daan ma tuma min na, ne bena u gwɛn.»

¹⁷Tile bennin kɔ, dibi donna tuma min na, sisi tun be bɔra dibi dɔ kɔnɔ, tasuma mananin tun be kala dɔ kan. Olu tɛmɛna sogo nunu cɛma.

¹⁸ O loon na, Masaba ye layidu ta Abramu ye ko: «Ne be jamana nin d'i kɔmɔgɔw ma, k'a ta Ezipiti baa ma, fɔɔ ka taga se baa belebele ma, min ye Efarati baa ye,

¹⁹keniw ka mara ni keniziw ta, ani kadimɔnw ta,

²⁰ni itiw ta, ani periziw ta ni erefaw ta,

²¹ani amoriw ta, ni kanaanw ta, ni girigasiw ta, ani zebuziw ta.»