Read dyu Koow daminɛ kitabu 18 Bible Online

Koow daminɛ kitabu 18 - dyu bible

Koow daminɛ kitabu 18

¹Masaba y'a yɛrɛ yira Ibrayima la Manbure joyiriw gɛrɛfɛ. Ibrayima tun siginin be a ka fanibugu daa la tilegwanfɛ.

² A y'a ɲaa kɔrɔta ka filɛli kɛ, a ye cɛɛ saba lɔnin ye, u yɔrɔ tun man jan a la. A y'u ye minkɛ, a wilila ka bɔ a ka soo daa la ka boli ka taga u kunbɛn, k'a ɲaa biri duguma

³k'a fɔ ko: «Ne matigi, ni ne koo ka d'i ye, ne b'i daali, i kana i ka jɔncɛ tɛmɛ.

⁴U ka na ni jii dɔɔni ye, aw b'aw seen ko, ka lafiɲɛ yiri nin kɔrɔ.

⁵Ne bena dumuni di aw ma janko aw ka barika sɔrɔ, ka sɔrɔ ka taga n'aw ka sira ye, bari aw sera aw ka jɔncɛ fɛ.» U ko: «Ayiwa, i k'a kɛ ten.»

⁶Ibrayima teliyara ka taga don fanibugu kɔnɔ Sara fɛ k'a fɔ a ye ko: «Teliya, mugu tɛntɛnnin filen ɲaa saba bɔ k'o nɔɔni, ka ŋɔmi yiran.»

⁷O kɔ, a bolila ka taga misidenɲuman belebele dɔ minɛ a ka begɛnw cɛma k'o di baaraden dɔ ma, ale fana teliyara k'o labɛn.

⁸A ye naare ni nɔnɔ ta, ka na o bila lonanw kɔrɔ, ani misiden sogo tobinin. Ka u to dumuni na, a lɔra u gɛrɛfɛ yiri kɔrɔ.

⁹U y'a ɲininga ko: «I muso Sara be min?» A y'u jaabi ko: «A be soo kɔnɔ.»

¹⁰ U dɔ ko: «Siga t'a la, ne bena kɔsegi ka na i fɛ yan saan wɛrɛ, nin waati nin ɲɔgɔn na, k'a sɔrɔ dencɛ b'i muso Sara bolo.» Sara yo kuma mɛn k'a to Ibrayima kɔfɛ fanibugu daa la.

¹¹O y'a sɔrɔ Ibrayima ni Sara tun kɔrɔla kosɔbɛ, Sara sii tun tɛmɛna denwolo ma.

¹² O la, Sara yɛlɛl'a yɛrɛ kɔnɔ k'a fɔ ko: «Ne kɔrɔla ka ban, ne matigi fana kɔrɔla. O diya waati ma tɛmɛ wa?»

¹³Masaba y'a fɔ Ibrayima ye ko: «Mun na Sara yɛlɛla k'a fɔ ko yala ale musokɔrɔnintɔ bena deen wolo sɔbɛ la wa?

¹⁴ Ne, Masaba be dɛsɛ koo dɔ la wa? Ne bena kɔsegi ka na i fɛ saan wɛrɛ, nin waati ɲɔgɔn na, k'a sɔrɔ dencɛ be Sara bolo.»

¹⁵Sara siranna, o la, a y'a sɔsɔ k'a fɔ k'ale ma yɛlɛ. Nga Masaba ko: «Ayi, i yɛlɛla.»

¹⁶Cɛɛ nunu wilila k'o be taga tuma min na, u ye u ɲaa sin Sodɔmu faan fɛ. Ibrayima y'u bila sira.

¹⁷Masaba ko: «Ne bena koo min kɛ, ne bena o dogo Ibrayima la wa?

¹⁸Ibrayima bena kɛ siya barikaman faa ye, min bena caya, dugukolo kan siyaw bɛɛ bena hɛrɛ sɔrɔ ale barika la.

¹⁹Ne y'a woloma janko a k'a deenw ladi ani olu kɔmɔgɔw, ko u ka ne, Masaba ka sira taama ni tilenninya ani tiɲɛ ye janko ne ye layidu min ta a ye, ne ka o dafa.»

²⁰Masaba ko: «U be Sodɔmu ni Gɔmɔri jalakila koo minw na, o ka ca kosɔbɛ, u kɔnɔ mɔgɔw ka hakɛ ka bon kosɔbɛ.

²¹O le y'a to ne bena jigi ka ta'a filɛ n'u ka kɛwaliw be ten i n'a fɔ n y'a mɛn cogo min na. N'o tɛ fana, ne ben'a lɔn.»

²²Lonancɛ nunu bɔra yen k'o ɲaa sin Sodɔmu faan fɛ. Nga Ibrayima lɔnin tora Masaba ɲakɔrɔ.

²³Ibrayima gwɛrɛla k'a fɔ ko: «I bena mɔgɔtilenninw ni mɔgɔjuguw halaki ɲɔgɔn fɛ wa?

²⁴N'a sɔrɔ mɔgɔtilennin bi duuru be sɔrɔ dugu nin kɔnɔ. I bena u halaki ɲɔgɔn fɛ tiɲɛ na wa? I tena u to yen mɔgɔtilennin bi duuru nunu kosɔn wa?

²⁵Ka sɔn ka mɔgɔtilenninw ni mɔgɔjuguw faga ɲɔgɔn fɛ, e kɔni te sɔn o la! Ka mɔgɔtilennin ni mɔgɔjugu kɛɲɛ, e te sɔn o la! E min be adamadenw bɛɛ kiti, i tena kiti tigɛ ni tilenninya ye wa?»

²⁶Masaba ko: «Ni ne ye mɔgɔtilennin bi duuru sɔrɔ Sodɔmu dugu kɔnɔ, ne bena dugu bɛɛ to yen olu kosɔn.»

²⁷Ibrayima y'a fɔ tugu ko: «Ne ye adamaden dɔrɔn ye. O bɛɛ n'a ta, ne be n jaa gwɛlɛya ka kuma Masaba fɛ.

²⁸N'a sɔrɔ mɔgɔ duuru be mɔgɔ bi duuru nunu jɛn. I bena dugu bɛɛ halaki o mɔgɔ duuru kosɔn wa?» Masaba ko: «Ni ne ye mɔgɔtilennin bi naani ni duuru sɔrɔ yen, ne ten'a halaki.»

²⁹Ibrayima kuman'a fɛ tugu k'a fɔ ko: «N'a sɔrɔ mɔgɔtilennin bi naani le be sɔrɔ yen.» Masaba ko: «Ne tena dugu nin halaki mɔgɔ bi naani kosɔn.»

³⁰Ibrayima ko: «Masaba, kana dimi ni ne kumana halibi. N'a sɔrɔ mɔgɔtilennin bi saba le be sɔrɔ yen.» Masaba ko: «Ni ne ye mɔgɔtilennin bi saba sɔrɔ yen, ne ten'a halaki.»

³¹Ibrayima ko: «Ne bena n jaa gwɛlɛya ka kuma Masaba fɛ tugu. N'a sɔrɔ mɔgɔtilennin mugan le be sɔrɔ yen.» Masaba ko: «Ne ten'a halaki mɔgɔ mugan kosɔn.»

³²Ibrayima ko: «Masaba, kana dimi ni ne kumana siɲɛ kelen tugu. N'a sɔrɔ mɔgɔtilennin tan le be sɔrɔ yen.» Masaba ko: «Ne ten'a halaki mɔgɔ tan nunu kosɔn.»

³³Masaba tilara kuma na Ibrayima fɛ tuma min na, a tagara. Ibrayima kɔsegira soo.