Read dyu Koow daminɛ kitabu 19 Bible Online

Koow daminɛ kitabu 19 - dyu bible

Koow daminɛ kitabu 19

¹Mɛlɛkɛ fila nunu sera Sodɔmu wuladafɛ, Lɔti tun siginin be dugu donda la. A y'u ye tuma min na, a wilila ka taga u kunbɛn, k'a kunbiri gwan k'a ɲaa biri duguma.

²A ko: «Ne matigiw, ne b'aw daali, aw ye jigi aw ka jɔncɛ ka soo, k'aw seen ko ka si yan, sɔgɔma joona aw be wili ka sira minɛ tugu.» U y'a jaabi ko: «Ayi, an bena si forobayɔrɔ la.»

³Nga Lɔti tora k'u daali fɔɔ u sɔnna ka jigi a ka soo. A ye buru labɛn u ye teliya la, a ma fununan k'a la, u ye dumuni kɛ.

⁴Sanni u ka la, Sodɔmu dugu cɛɛw bɛɛ bɔra dugu faan bɛɛ la, kanbelen fara cɛkɔrɔbaw kan, ka na soo lamini.

⁵ U ye Lɔti wele k'a fɔ a ye ko: «Lonancɛ minw jigira i ka soo bii suu nin na, olu be min? Bɔ n'u ye kɛnɛma an fɛ, janko an k'u ɲini i n'a fɔ musow.»

⁶Lɔti bɔtɔ k'u kunbɛn, a ye soo daa tugu a kɔfɛ

⁷k'a fɔ ko: «Ne balimaw, ne b'aw daali, aw kana kojugu kɛ.

⁸Denmuso fila be ne fɛ, u ma cɛko lɔn fɔlɔ. Ne ben'a to olu be bɔ aw fɛ, aw k'aw sago kɛ olu la. Nga aw kana foyi kɛ cɛɛ nunu na, bari u nana jigi ne ka soo.»

⁹U y'a jaabi ko: «Bɔ yen. Cɛɛ nin nana sigi an fɛ lonanya la, sisan a b'a fɛ k'an sɔsɔ! Ayiwa, an bena min kɛ a la, o bena juguya ka tɛmɛ u ta kan.» O fɔnin kɔ, u tora ka Lɔti ɲɔtiɲɔti, u gwɛrɛla ko u be bonda kari.

¹⁰Nga cɛɛ fila nunu y'u bolo kɛ ka Lɔti sama ka don soo kɔnɔ u fɛ ka daa tugu.

¹¹ Mɔgɔ minw be soo daa la, denmisɛn fara mɔgɔkɔrɔbaw kan, ka olu ɲaa fiyɛn. U tora ka daa yaala ka dɛsɛ.

¹²Cɛɛ fila nunu y'a fɔ Lɔti ye ko: «I ka mɔgɔ dɔ wɛrɛ be dugu nin kɔnɔ wa? Birancɛw, walima dencɛw, walima denmusow, walima i ka mɔgɔ fɛɛn o fɛɛn be nin dugu nin kɔnɔ, aw ka bɔ yan.

¹³An bena dugu nin halaki, bari yankaw ka kojugu mankan boɲana kosɔbɛ Masaba ɲakɔrɔ fɔɔ a y'an ci ka n'a halaki.»

¹⁴Lɔti bɔra ka taga kuma a birancɛw fɛ, minw tun y'a denmusow maminɛ. A ko: «Aw ye wili ka bɔ yan, Masaba bena dugu nin halaki!» Nga a birancɛw tun be miiri ko a be tulon na.

¹⁵Dugugwɛdafɛ, mɛlɛkɛw y'a gwan Lɔti kɔ ko: «Wili k'i ka muso minɛ, n'i denmuso fila minw be i fɛ yan, ka taga, n'o tɛ, aw bena halaki dugu nin ka juguya kosɔn.»

¹⁶ Lɔti tun te teliyara minkɛ, cɛɛ nunu y'a bolo minɛ, a n'a muso, n'a denmuso fila, ka bɔ n'u ye dugu kɔnɔ, bari Masaba tun makarila u la.

¹⁷U bɔnin kɔ dugu kɔnɔ, mɛlɛkɛw kelen y'a fɔ Lɔti ye ko: «Boli k'i nii kisi! Kana filɛli kɛ i kɔfɛ, kana lɔ kɔkɛnɛ yɔrɔ si la. Boli ka taga kuluw yɔrɔ la, n'o tɛ, i bena halaki!»

¹⁸Lɔti y'a fɔ u ye ko: «Aw ye hakɛ to, ne matigiw, o te se ka kɛ.

¹⁹Ne, i ka jɔncɛ, koo diyara i ye, i makarila ne la kosɔbɛ ka ne niin kisi. Nga ne te se ka boli ka se kuluw yɔrɔ la, ni balawu nin ma ne sɔrɔ, ne ka sa.

²⁰A filɛ, dugudennin min ye yan fɛ, a yɔrɔ man jan, ne be se ka boli fɔɔ ka se yen. A to ne ka boli ka taga yen ka n niin kisi. A ka dɔgɔ kosɔbɛ, tiɲɛ tɛ wa?»

²¹Mɛlɛkɛ y'a fɔ Lɔti ye ko: «Ayiwa, ne bena o koo nin kɛ i ye fana. I ye dugu min koo fɔ, ne tena o halaki.

²²Nga teliya ka taga, ne tena se ka foyi kɛ n'i ma se yen.» O le kosɔn, o dugu tɔgɔ ko Sowari. [1]

²³Lɔti be donna Sowari kɔnɔ, ni tile be bɔra fana.

²⁴ O waati la, Masaba y'a kɛ kiribi ni tasuma bɔra sankolo la ka jigi Sodɔmu ni Gɔmɔri kan i n'a fɔ sanji.

²⁵A ye dugu nunu halaki, ni u kɔnɔ mɔgɔw bɛɛ, ni kɔkɛnɛ yɔrɔ bɛɛ, ani fɛɛn o fɛɛn falenna o yɔrɔ la.

²⁶ Nga Lɔti muso ye filɛli kɛ kɔfɛ, a yɛlɛmana ka kɛ kɔgɔ kabakurulaman ye.

²⁷Ibrayima tun lɔra Masaba ɲakɔrɔ yɔrɔ min na, sɔgɔma joona, a wilila ka taga o yɔrɔ la.

²⁸A ye Sodɔmu ni Gɔmɔri, ani kɔkɛnɛ yɔrɔ bɛɛ filɛ. A ye sisi finman dɔ wilitɔ ye i n'a fɔ dibi ta.

²⁹Ala ye kɔkɛnɛ dugu nunu halaki tuma min na, a y'a hakili to Ibrayima la, ka Lɔti kisi dugu nunu halakituma na, Lɔti tun siginin be yɔrɔ min na.

³⁰Lɔti n'a denmuso fila bɔra Sowari ka taga sigi kuluw yɔrɔ la bari a tun be siran, o la, a ma sɔn ka to Sowari. A tagara to kuluwo kɔnɔ n'a denmuso fila nunu ye.

³¹Loon dɔ, a denmuso fɔlɔ y'a fɔ a dɔgɔmuso ye ko: «An faa kɔrɔla. Cɛɛ si te mara nin na min bena la n'an ye i n'a fɔ a be deli ka kɛ yɔrɔ bɛɛ cogo min na.

³²Na, an ka duvɛn di an faa ma, a k'a min, an ka la n'a ye janko an ka kɔmɔgɔw sɔrɔ a ye.»

³³O loon sufɛ, u ye duvɛn di u faa ma, a y'a min. Denmuso fɔlɔ donna ka la n'a ye, facɛ tun te a yɛrɛ kala ma a latuma n'a wilituma na.

³⁴O dugusagwɛ, kɔrɔmuso y'a fɔ a dɔgɔmuso ye ko: «Ne lara ni n facɛ ye sufɛ. An ka duvɛn d'a ma bii tugu, a k'a min, i ka don ka la n'a ye janko an ka kɔmɔgɔw sɔrɔ a ye.»

³⁵U ye duvɛn di u faa ma o sufɛ tugu, a y'a min fɔɔ a tun te a yɛrɛ kala ma. Dɔgɔmuso donna ka la n'a ye, facɛ tun te a yɛrɛ kala ma a latuma n'a wilituma na.

³⁶Lɔti denmuso fila bɛɛ ye kɔnɔ ta ten u faa fɛ.

³⁷Kɔrɔmuso ye dencɛ wolo k'a tɔgɔ la ko Mowabu. Ale lo ye mowabuw bɛma ye. U be yen halibi.

³⁸Dɔgɔmusoman fana ye dencɛ wolo k'a tɔgɔ la ko Bɛnami. [2] Ale lo ye amoniw bɛma ye. U be yen halibi.