Read dyu Koow daminɛ kitabu 2 Bible Online

Koow daminɛ kitabu 2 - dyu bible

Koow daminɛ kitabu 2

¹Sankolo ni dugukolo n'u kɔnɔnafɛnw bɛɛ danni bana ten.

² Ala tilar'a ka baara la, ka lafiɲɛ tile wolonwulanan loon.

³Ala ye barika don tile wolonwulanan loon na k'o kɛ a yɛrɛ ta ye, bari a ye baara min bɛɛ kɛ ka diɲɛ dan, a lafiɲɛna o la o loon na.

⁴O ye sankolo ni dugukolo daminɛcogo ye, u dantuma na. Masa Ala ye dugukolo ni sankolo dan tuma min na,

⁵kongo kɔnɔ yiri si tun te dugukolo kan fɔlɔ, biin si tun ma falen fɔlɔ, bari Masa Ala tun ma sanji jigi dugukolo kan fɔlɔ. Mɔgɔ fana tun te yen ka dugukolo sɛnɛ.

⁶Nga jii tun be bɔ dugukolo le kɔnɔ ka yɔrɔ bɛɛ ɲigi.

⁷ Masa Ala ye mɔgɔ dan ni buguri ye k'a dafiɲɛ fiyɛ a nunwo la ka ninakili don a la, a kɛra ten mɔgɔ kɛra nimanfɛn ye.

⁸Masa Ala tun ye yɔrɔɲuman dɔ labɛn kɔrɔn ɲafan fɛ, k'a tɔgɔ la ko Edɛn. A ye mɔgɔ min dan, a y'o bila o kɔnɔ.

⁹ Masa Ala y'a kɛ yiri ɲanaman sifa bɛɛ falenna dugukolo kan, minw ka ɲi dumuni na. A fana y'a kɛ yiri dɔ falenna yɔrɔɲuman nin cɛma, min be sii di mɔgɔ ma, ani k'a to mɔgɔ be koɲuman ni kojugu lɔn ka bɔ ɲɔgɔn na.

¹⁰Baji dɔ tun be bɔ Edɛn, ka yɔrɔɲuman nin ɲigi, a faranna ka kɛ bolo naani ye.

¹¹Kelen tɔgɔ ko Pisɔn, ale be munumunu Awila jamana faan bɛɛ la, sanu be sɔrɔ yɔrɔ min na.

¹²O jamana nin sanu ye sanu yɛrɛ yɛrɛ ye. Yiri sifa dɔ be yen min jii kasa ka di, ani kabakuru kɔlɔbolaman sɔngɔgwɛlɛn sifa dɔ fana be o yɔrɔ la.

¹³A filanan tɔgɔ ko Giyɔn, o be munumunu Kusi jamana faan bɛɛ la.

¹⁴A sabanan tɔgɔ ko Tigiri, o be woyo ka tɛmɛ Asiri jamana kɔrɔn ɲafan na. Naaninan tɔgɔ ko Efarati.

¹⁵Masa Ala ye mɔgɔ bila Edɛn, yɔrɔɲuman kɔnɔ, ko a k'a sɛnɛ k'a kɔlɔsi.

¹⁶A y'a fɔ mɔgɔ ye ko: «I be se ka yɔrɔ nin yiriw bɛɛ deen dumu

¹⁷fɔɔ yiri kelen dama, min b'a to mɔgɔ be koɲuman ni kojugu lɔn ka bɔ ɲɔgɔn na. N'i y'o deen dumu loon min na, i bena sa, siga t'a la.»

¹⁸Masa Ala ko: «Cɛɛ ka to a kelen na, o ma ɲi. Ne bena dɛmɛbaga dan k'a d'a ma min y'a bɔɲɔgɔnko ye.»

¹⁹O y'a sɔrɔ Masa Ala tun ye kongosogow ni kɔnɔw bɛɛ lalaga ni bɔgɔ ye. A nana n'u ye cɛɛ fɛ janko a k'a filɛ a bena tɔgɔ min la u kan. Cɛɛ ye tɔgɔ min la fɛɛn ɲanaman nunu kelen kelen bɛɛ kan, o le kɛra u tɔgɔ ye.

²⁰Cɛɛ ye begɛnw, ni kɔnɔw, ni kongosogow bɛɛ tɔgɔw la. Nga dɛmɛbaga ma sɔrɔ a fɛ olu cɛma min y'a bɔɲɔgɔnko ye.

²¹Masa Ala ye sinɔgɔba bila cɛɛ la. K'a to sinɔgɔ la, a y'a galagakolo kelen bɔ k'a farisogo kɛ a nɔɔ na yen.

²²Masa Ala ye galagakolo min bɔ cɛɛ la, a ye o kɛ muso ye ka na n'a ye cɛɛ fɛ.

²³Cɛɛ ko: «Cɔ! A ɲana! Ne dɔ le ye nin ye, ne kolow dɔ lo! [1] A bena wele ko muso, bari a bɔra cɛɛ la.» [2]

²⁴ O le kosɔn, cɛɛ ben'a faa n'a baa to yen ka nɔrɔ a muso la, u fila be jɛn ka kɛ kelen ye.

²⁵Cɛɛ n'a muso fari lakolon tun lo, maloya tun te yen.