Read dyu Koow daminɛ kitabu 20 Bible Online

Koow daminɛ kitabu 20 - dyu bible

Koow daminɛ kitabu 20

¹Ibrayima bɔra yen ka taga jamana worodugu ɲafan fɛ, ka taga sigi Kadɛsi ni Suri cɛ. O kɔ, a tagara sigi Gerari.

² K'a to o yɔrɔ la, a y'a fɔ ko a muso Sara ye a dɔgɔmuso ye. Gerari masacɛ Abimelɛki ye mɔgɔw bila ka taga Sara minɛ ka na n'a ye a ka soo.

³Nga Ala y'a yɛrɛ yira Abimelɛki la siko la sufɛ k'a fɔ a ye ko: «I bena sa muso nin kosɔn, i ye min ta, bari a furunin lo.»

⁴O y'a sɔrɔ Abimelɛki tun ma gwɛrɛ a la. O la, a y'a fɔ ko: «Masaba, i be sɔn ka siya halaki min ma kojugu kɛ wa?

⁵Cɛɛ nin m'a fɔ ne ye ko a dɔgɔmuso lo wa? Muso fana tun y'a fɔ ko a kɔrɔcɛ lo. Ne y'a kɛ ni kɔnɔgwɛ ye, ne ma juguya kɛ.»

⁶Ala y'a fɔ a ye ko: «Ne y'a lɔn ko i y'a kɛ ni kɔnɔgwɛ ye, o le kosɔn, ne y'i bali ka n hakɛ ta. O la, ne m'a to i ka se a ma.

⁷Sisan, muso nin segi a cɛɛ ma. A cɛɛ ye kira ye, a bena daalili kɛ i ye, i tena sa. N'i banna k'a kɔsegi a ma, i k'a lɔn ko i n'i ka mɔgɔw bɛɛ bena sa.»

⁸Dugu gwɛra sɔgɔma joona, Abimelɛki y'a ka dugu ɲamɔgɔw bɛɛ wele k'o koow bɛɛ fɔ u ye. Olu siranna kosɔbɛ.

⁹Abimelɛki ye Ibrayima fana wele k'a fɔ a ye ko: «I ye mun kɛ an na? Ne y'i hakɛ ta koo jumɛn na, fɔɔ i ye ne, ni ne ka mara mɔgɔw bila hakɛba nin na? I ye min kɛ ne la, o te kɛta ye!»

¹⁰A ye Ibrayima ɲininga tugu ko: «Mun kosɔn i y'o kɛ?»

¹¹Ibrayima y'a jaabi ko: «Ne tun y'a miiri ko yan mɔgɔw te siran Ala ɲa fewu, ko u bena ne faga n muso kama.

¹²Hali k'o bɔ a la, ne dɔgɔmuso lo tiɲɛ na. N faa ka denmuso lo, nga an te baa kelen. Ne y'a furu.

¹³Tuma min na Ala ye n wele ka bɔ n faso la ka n kɛ yaalabaga ye, ne y'a fɔ a ye ko n'an tagara yɔrɔ o yɔrɔ, a ka koɲuman kɛ ne ye k'a fɔ ko ne y'a kɔrɔcɛ ye.»

¹⁴Abimelɛki ye misiw ni begɛnmisɛnw, ani jɔncɛw ni jɔnmusow di Ibrayima ma, k'a muso Sara kɔsegi a ma

¹⁵k'a fɔ ko: «Ne ka mara filɛ. Taga sigi i sagolayɔrɔ la.»

¹⁶A y'a fɔ Sara ye ko: «Ne be warigwɛ kuru waa kelen di i kɔrɔcɛ ma. O ben'a yira i ka mɔgɔw bɛɛ la ko jalakiyɔrɔ si t'i la.»

¹⁷Ibrayima ye Ala daali. Ala ye Abimelɛki n'a muso, n'a ka jɔnmusow kɛnɛya, u ye deenw sɔrɔ tugu

¹⁸bari Masaba tun ye Abimelɛki ka soo kɔnɔ musow bɛɛ kɛ denwolobaliw ye Ibrayima muso Sara kama.