Read dyu Koow daminɛ kitabu 21 Bible Online

Koow daminɛ kitabu 21 - dyu bible

Koow daminɛ kitabu 21

¹Masaba ye koɲuman kɛ Sara ye i ko a tun y'a fɔ cogo min na, a y'a kɛ a ka fɔcogo la.

² Sara ye kɔnɔ ta ka dencɛ wolo Ibrayima ye, ka kɛɲɛ ni Ala ka waati latigɛnin ye. O y'a sɔrɔ a kɔrɔla kosɔbɛ.

³Sara ye dencɛ min wolo Ibrayima ye, Ibrayima y'a tɔgɔ la ko Isiyaka.

⁴ Ibrayima y'a dencɛ Isiyaka kɛnɛkɛnɛ a wolonin tile seeginan loon i n'a fɔ Ala tun y'a fɔ a ye cogo min na.

⁵Isiyaka wolotuma na, Ibrayima sii tun ye saan kɛmɛ.

⁶Sara ko: «Ala y'a to ne sera ka yɛlɛ. Mɔgɔ o mɔgɔ ma n'a mɛn, o tigi bena yɛlɛ fana.» [1]

⁷A y'a fɔ tugu ko: «Jɔn tun be se k'a fɔ Ibrayima ye ko Sara bena siin di deenw ma? O bɛɛ n'a ta, ne ye dencɛ wolo a ye a ka cɛkɔrɔbaya tuma na.»

⁸Deen boɲana, u y'a daa bɔ siin na. Loon min na Isiyaka daa bɔra siin na, Ibrayima ye ɲanagwɛba kɛ.

⁹Agari ka bɔ Ezipiti ye deen min wolo Ibrayima ye, ale yɛlɛla Isiyaka ma, Sara y'a ye.

¹⁰A y'a fɔ Ibrayima ye ko: «Jɔnmuso nin n'a dencɛ gwɛn, jɔnmuso deen ni ne dencɛ Isiyaka tena jɛn cɛɛn kan.»

¹¹ O kuma ma diya Ibrayima ye fewu a dencɛ kosɔn.

¹² Nga Ala y'a fɔ a ye ko: «I deen nin n'i ka jɔnmuso ka koo kana gwɛlɛya i ma. Sara mana fɛɛn o fɛɛn fɔ i ye, i ka sɔn o ma, bari Isiyaka le kɔmɔgɔw bena wele i deenw.

¹³Ne bena i ka jɔnmuso dencɛ kɛ siya dɔ bɛma ye, bari i kɔmɔgɔ dɔ lo.»

¹⁴O dugusagwɛ sɔgɔma joona, Ibrayima ye dumuni ni jiforoko ta k'u di Agari ma. A y'a dulon a gaman na, k'a deen fana di a ma, k'a bila ka taga. A tagara to ka yaalayaala Bɛriseba kongokolon kɔnɔ.

¹⁵Foroko kɔnɔ jii banna tuma min na, Agari y'a deen bila yiridennin dɔ kɔrɔ

¹⁶ka tɛmɛ ka taga sigi yɔrɔ dɔ la. Ni u ye biɲɛ bon a be taga ben hakɛ min na, u furancɛ tun be bɛn o ma, bari a ko: «Deen nin te se ka sa ne ɲana.» K'a to o yɔrɔ la, a y'a daminɛ ka kasi kosɔbɛ.

¹⁷Ala ye deen kasikan mɛn. Ala ka mɛlɛkɛ tora sankolo la ka Agari wele k'a fɔ a ye ko: «Agari, mun le kɛra? Kana siran, bari deen nin be yɔrɔ min na, Ala y'a kasikan mɛn.

¹⁸Wili ka ta'a minɛ a bolo ma, ne ben'a kɛ siyaba faa ye.»

¹⁹Ala ye Agari ɲaa yɛlɛ, a ye kɔlɔn dɔ ye, jii be min kɔnɔ. A tagara foroko fa jii la ka dɔ di a deen ma, a y'a min.

²⁰Ala tora deen nin fɛ, a boɲana. A siginin tun be kongokolon kɔnɔ, a kɛra mɔgɔ ye min be se biɲɛbon na kosɔbɛ.

²¹A tun be Paran kongokolon kɔnɔ, a baa ye Ezipiti sunguru dɔ ɲini a ye.

²² O waati la, Abimelɛki n'a ka kɛlɛdenw kuntigi Pikɔli nana Ibrayima fɛ k'a fɔ a ye ko: «Ala b'i fɛ i ka koo kɛtaw bɛɛ la.

²³Ayiwa, sisan i ka kali Ala tɔgɔ la ko i tena ne janfa, ko i tena ne deenw, walima ne mamadenw fana janfa. Ne ye koɲuman kɛ i ye cogo min na, i ka o ɲɔgɔn kɛ ne ni jamana mɔgɔw ye, i siginin be min kɔnɔ.»

²⁴Ibrayima y'a fɔ ko: «N bena kali.»

²⁵Nga Ibrayima ye Abimelɛki jalaki kɔlɔn dɔ koo la, ale Abimelɛki ka baaradenw tun ye min bɔsi a fɛ fanga la.

²⁶Abimelɛki y'a jaabi ko: «Mɔgɔ min ye o koo kɛ, ne ma o tigi lɔn. I fana tun ma o fɔ ne ye, ne fana ma bɔ a kala ma fɔɔ bii.»

²⁷Ibrayima ye misiw ni begɛnmisɛnw minɛ k'o di Abimelɛki ma, u fila bɛnna.

²⁸Ibrayima ye sagaden musoman wolonwula bɔ sagakulu la k'u bila danna.

²⁹Abimelɛki y'a ɲininga ko: «I ye sagaden musoman wolonwula minw bila danna, o kɔrɔ ye mun ye?»

³⁰A y'a jaabi ko: «I ka saga wolonwula nunu minɛ ne bolo k'a yira ko ne le ye kɔlɔn nin sogi.»

³¹O le y'a to o yɔrɔ tɔgɔ ko Bɛriseba, bari cɛɛ fila nunu kalila ɲɔgɔn ye o yɔrɔ la. [2]

³²U bɛnna Bɛriseba, o kɔ, Abimelɛki n'a ka kɛlɛdenw kuntigi Pikɔli kɔsegira filisiw ka jamana na.

³³Ibrayima ye yiri dɔ tutu Bɛriseba k'o kɛ hakilijigifɛn ye koo nin na. O yiri tɔgɔ ko tamarisi. A ye Masa Ala bato yen, ale min be yen tuma bɛɛ.

³⁴Ibrayima sigira filisiw ka jamana na ka waatijan kɛ yen.