Read dyu Koow daminɛ kitabu 22 Bible Online

Koow daminɛ kitabu 22 - dyu bible

Koow daminɛ kitabu 22

¹ O koow tɛmɛnin kɔ, Ala ye Ibrayima kɔrɔbɔ, a ko: «Ibrayima.» Ibrayima ko: «Naamu.»

² Ala ko: «I dencɛ minɛ, i dencɛ kelenpe, Isiyaka min koo ka d'i ye, i ka taga n'a ye Moriya mara la. Ne bena kulu min yira i la, i k'a kɛ saraka ye k'a jɛni o yɔrɔ la.»

³O dugusagwɛ sɔgɔma joona, Ibrayima wilila k'a ka fali labɛn ka taga n'a ka baaraden fila n'a dencɛ Isiyaka ye. Ala ye yɔrɔ min koo fɔ a ye, a ye saraka jɛnilɔgɔ ci ka sira ta ka taga yen.

⁴Tile sabanan loon, ka Ibrayima to yɔrɔjan, a y'a ɲaa kɔrɔta k'o yɔrɔ nin ye.

⁵A y'a fɔ a ka baaradenw ye ko: «Aw ye to yanni fali ye. Ne ni deen nin bena taga yan fɛ ka Ala bato. O kɔ, an bena kɔsegi ka na aw fɛ yan.»

⁶Ibrayima ye saraka jɛnilɔgɔ ta k'a la a dencɛ Isiyaka kuun na, ka tasuma ni muru ta a bolo. U fila tora ka taga ɲɔgɔn fɛ.

⁷Isiyaka y'a fɔ a faa Ibrayima ye ko: «Ne faa.» Ibrayima ko: «Naamu, ne deen.» Isiyaka ko: «Tasuma ni lɔgɔ be yen, nga an bena sagaden min kɛ saraka ye k'a jɛni, o be min?»

⁸Ibrayima y'a jaabi ko: «Ne deen, Ala yɛrɛ le bena sagaden koo ɲanabɔ a ka kɛ saraka ye ka jɛni.» U fila bɛɛ tora ka taga ɲɔgɔn fɛ.

⁹ Ala tun ye yɔrɔ min koo fɔ Ibrayima ye, u sera o yɔrɔ la tuma min na, Ibrayima ye sarakabɔyɔrɔ lɔ ka lɔgɔ la a kan k'a dencɛ Isiyaka siri k'a la sarakabɔyɔrɔ kan, lɔgɔ kan.

¹⁰O kɔ, a ye muru ta a bolo ko a b'a dencɛ faga.

¹¹Masaba ka mɛlɛkɛ tora sankolo la k'a wele ko: «Ibrayima, Ibrayima.» Ibrayima y'a jaabi ko: «Naamu.»

¹²A ko: «Kana maga deen nin na, kana foyi k'a la. Ne y'a lɔn sisan ko i be siran Ala ɲa, bari i ma ban k'i dencɛ, i dencɛ kelenpe di ne ma.»

¹³Ibrayima y'a ɲaa kɔrɔta ka sagajigi dɔ ye, a gɔɔn ferekenin be nɔnfɔn dɔ la. A tagar'a minɛ k'ale kɛ saraka ye k'a jɛni a dencɛ nɔɔ na.

¹⁴Ibrayima y'o yɔrɔ nin tɔgɔ la ko Masaba bena o ɲanabɔ. Fɔɔ ka se bii ma, u b'a fɔ ko: «Masaba bena o ɲanabɔ a ka kulu kan.»

¹⁵Masaba ka mɛlɛkɛ tora sankolo la ka Ibrayima wele tugu

¹⁶ k'a fɔ ko: «I ye nin kɛ minkɛ, i ma ban k'i dencɛ, i dencɛ kelenpe di ne ma minkɛ, o la, ne be n daa d'i ma, ne Masaba ko ten,

¹⁷ ko ne kɔni bena hɛrɛ kɛ i ye k'i kɔmɔgɔw caya i n'a fɔ lolow ni kɔgɔjida la cɛncɛn. I kɔmɔgɔw bena u juguw ka duguw minɛ k'a kɛ u yɛrɛ ta ye.

¹⁸ Siyaw bɛɛ bena duba sɔrɔ i kɔmɔgɔ barika la, bari i ye ne sago kɛ.»

¹⁹O kɔ, Ibrayima kɔsegir'a ka baaradenw fɛ. U bɛɛ ye sira minɛ ɲɔgɔn fɛ ka taga Bɛriseba. Ibrayima sigira o yɔrɔ la.

²⁰O koow tɛmɛnin kɔ, u y'a fɔ Ibrayima ye ko Milika fana ye deenw sɔrɔ Ibrayima dɔgɔcɛ Nawɔri ye.

²¹Ko dencɛ fɔlɔ tɔgɔ ko Usi, n'a dɔgɔcɛ Buzi, ni Aramu facɛ Kemuyɛli,

²²ani Kɛzɛdi ni Azo, ani Pilidasi ni Yidilafu ani Betuwɛli.

²³Betuwɛli ye Erebɛka facɛ ye. Milika ye dencɛ seegi nunu le wolo Ibrayima dɔgɔcɛ Nawɔri ye.

²⁴A ka gɛrɛfɛmuso Ereyuma fana ye Tɛba ni Gaamu ani Tagasi ni Maaka wolo a ye.