Read dyu Koow daminɛ kitabu 25 Bible Online

Koow daminɛ kitabu 25 - dyu bible

Koow daminɛ kitabu 25

¹Ibrayima ye muso wɛrɛ furu, ale tɔgɔ tun ko Ketura.

²Ale ye deen minw wolo a ye, o ye: Zimuran, ni Yɔkisan ani Medan ni Madiyan ni Yisibaki ani Suwa.

³Yɔkisan tun ye Saba ni Dedan facɛ ye. Siya minw bɔra Dedan na, olu ye asuriw, ni letusiw ani leyumiw ye.

⁴Madiyan dencɛw tun ye Ɛfa, ni Efɛri ni Anɔki ni Abida ani Elida ye. Olu bɛɛ tun ye Ketura kɔmɔgɔw ye.

⁵Ibrayima y'a ka nafolo bɛɛ di Isiyaka ma.

⁶A ye dencɛ minw sɔrɔ a ka muso wɛrɛw fɛ, a ye fɛɛn dɔw di olu ma fana. Nga k'a to nii la, a y'u bila ka taga kɔrɔn ɲafan fɛ jamana na [1] k'u yɔrɔ jaɲa a dencɛ Isiyaka la.

⁷Ibrayima sii bɛɛ lajɛnnin tun ye saan kɛmɛ ni bi wolonwula ani duuru ye.

⁸Ibrayima kɔrɔla kosɔbɛ ka sɔrɔ ka sa. A tun ye hɛrɛ sɔrɔ a ka kɔrɔya kɔnɔ ka sɔrɔ ka ta'a faaw fɛ.

⁹A dencɛ Isiyaka ni Isimayɛli y'a suu don kuluwo kɔnɔ Makipela, iticɛ Sowari dencɛ Efurɔn ka foro la, Manbure gɛrɛfɛ,

¹⁰ Ibrayima tun ye foro min san itiw fɛ. Ale n'a muso Sara suuw donna yen.

¹¹Ibrayima sanin kɔ, Ala ye barika don a dencɛ Isiyaka la, a tun siginin be Laayiroyi kɔlɔn gɛrɛfɛ.

¹²Ibrayima dencɛ Isimayɛli, Sara ka jɔnmuso Agari ka bɔ Ezipiti ye min wolo a ye, ale kɔmɔgɔw filɛ nin ye.

¹³Isimayɛli ka deen cɛmanw tɔgɔw filɛ nin ye ka kɛɲɛ ni u wolocogo ye ka tugu ɲɔgɔn na: Nebayɔti ye Isimayɛli dencɛ fɔlɔ ye, ni Kedari ni Adabeyɛli ani Mibisamu,

¹⁴ni Misima, ani Duma ni Masa,

¹⁵ani Adadi ni Tema, ani Yeturi ni Nafisi ani Kedima.

¹⁶Olu le tun ye Isimayɛli dencɛ tan ni fila ye. U kelen kelen bɛɛ tun ye kuntigiw ye u ka jama cɛma. U y'u tɔgɔ la u ka duguw n'u sigiyɔrɔw kan.

¹⁷Isimayɛli sii bɛɛ lajɛnnin tun ye saan kɛmɛ ni bi saba ani wolonwula ye. A sara ka ta'a faaw fɛ.

¹⁸A kɔmɔgɔw sigira k'a ta Awila fɔɔ Suri, min be Ezipiti gɛrɛfɛ ka taga Asuri jamana faan fɛ. Bɛɛn tun te u n'u fadenw cɛ fewu.

¹⁹Ibrayima dencɛ Isiyaka ka koo filɛ nin ye.

²⁰Ibrayima ye Isiyaka wolo. Isiyaka ye saan bi naani sɔrɔ, ka sɔrɔ ka Erebɛka furu. Ale tun ye Aramuka Laban dɔgɔmuso ye, a facɛ tun ye Aramuka Betuwɛli ye.

²¹Isiyaka ye Masaba daali a muso ye, bari a tun te se ka deen sɔrɔ. Masaba y'a ka daalili mɛn, a muso Erebɛka ye kɔnɔ ta.

²²Deenw ye ɲɔgɔn ɲɔtiɲɔti a kɔnɔ, a y'a fɔ ko: «Mun le be kɛra ne la?» A tagara Masaba ɲininga.

²³ Masaba y'a fɔ a ye ko: «Siya fila le b'i kɔnɔ, siya fila bena bɔ i la, u bena faran ka bɔ ɲɔgɔn na. Siya kelen barika bena boɲa ni kelen ta ye, kɔrɔcɛ ma bena baara kɛ dɔgɔcɛ ma ye.»

²⁴Erebɛka jigituma sera tuma min na, a jigira filaninw na.

²⁵Min kɔnna ka bɔ, ale wulennin tun lo, a fari yɔrɔ bɛɛ tun ye sii ye. O la, u y'a tɔgɔ la ko Ezawu. [2]

²⁶O kɔ, a dɔgɔcɛ bɔra, Ezawu senju minɛnin b'a bolo. O la, u y'a tɔgɔ la ko Yakuba. [3] Isiyaka tun ye saan bi wɔɔrɔ sɔrɔ u wolotuma na.

²⁷Deen nunu boɲɛna. Ezawu kɛra donso ɲanaman ye, a tun be kongo yaala kosɔbɛ. Yakuba kɛra mɔgɔsumanin ye, a tun be soo kɔnɔ tuma bɛɛ.

²⁸Ezawu koo tun ka di Isiyaka ye, bari kongosogo tun ka d'a ye. Yakuba koo tun ka di Erebɛka ye.

²⁹Loon dɔ, ka Yakuba to dumuni tobi la, Ezawu sɛgɛnninba bɔra kongo ka na.

³⁰A y'a fɔ Yakuba ye ko: «Ne barika banna dɛ! I ka dumuni wuleman nin dɔ di yan joona, ne k'a dumu.» O le kosɔn, u ye Ezawu wele Edɔmu. [4]

³¹Yakuba ko: «I k'i ka kɔrɔya falen ne fɛ fɔlɔ.»

³²Ezawu y'a jaabi ko: «A filɛ, ne be ɲini ka sa, o kɔrɔya tɔnɔ be mun ɲa ne ye?»

³³ Yakuba ko: «I kali ne ye fɔlɔ.» Ezawu kalil'a ye k'a ka kɔrɔya falen a fɛ.

³⁴Yakuba ye buru ni dumuni nin dɔ di Ezawu ma. A ye dumuni kɛ ka minni kɛ, ka sɔrɔ ka wili ka taga. A kɛra ten, Ezawu m'a ka kɔrɔya jati foyi ye.