Read dyu Koow daminɛ kitabu 27 Bible Online

Koow daminɛ kitabu 27 - dyu bible

Koow daminɛ kitabu 27

¹Isiyaka tun kɔrɔla, a ɲaa fanga dɔgɔyara fɔɔ ka fiyɛn. A y'a dencɛ fɔlɔ Ezawu wele k'a fɔ a ye ko: «Ne deen.» A y'a jaabi ko: «Naamu.»

²Isiyaka ko: «Ne kɔrɔla sisan, ne te n taalon lɔn.

³I ka donsominanw ta, i ka toon n'i ka kala, ka taga kongo la ka sogo ɲini ne ye sisan.

⁴Dumuni min ka di ne ye, i k'o tobi ka na n'a ye, ne k'a dumu, janko ne ka se ka duba kɛ i ye sanni ne ka sa.»

⁵Isiyaka tun be kuma nin fɔr'a dencɛ Ezawu ye tuma min na, Erebɛka y'a mɛn. Ezawu wilila ka taga kongo kɔnɔ, ko a be sogo ɲini ka na n'a ye.

⁶Erebɛka y'a fɔ a dencɛ Yakuba ye ko: «A filɛ, i faa ye kuma min fɔ i kɔrɔcɛ Ezawu ye, ne y'o mɛn.

⁷A ko a ka taga sogo ɲini ka na dumuni diman tobi ale ye, a k'o dumu, ko a bena duba kɛ a ye Masaba ɲakɔrɔ sanni ka sa.

⁸Sisan n deen, mɛnni kɛ ne fɛ. Ne bena min fɔ i ye, i k'o kɛ.

⁹Taga baden ɲanaman fila minɛ begɛnw cɛma ka na n'u ye. Ne bena dumuni diman dilan min ka d'i facɛ ye.

¹⁰I bena ta'a d'i facɛ ma, a b'a dumu, janko a ka duba kɛ i ye sanni a ka sa.»

¹¹Yakuba y'a fɔ a bamuso Erebɛka ye ko: «Ne kɔrɔcɛ Ezawu farisi ka ca, ne ta man ca.

¹²N'a sɔrɔ ne faa bena ne mɔmɔ, ne bena kɛ namaramɔgɔ ye a ɲana ka danga sɔrɔ duba nɔɔ na.»

¹³A baa y'a fɔ a ye ko: «N deen, o danga ka ne minɛ. Mɛnni kɛ ne fɛ dɔrɔn ka taga u minɛ.»

¹⁴Yakuba tagara u minɛ ka na n'u ye a bamuso fɛ. A bamuso ye dumuni tobi min ka di a facɛ ye.

¹⁵O kɔ, Ezawu, min tun ye Erebɛka ka dencɛ fɔlɔ ye, a ka faniɲuman minw tun be Erebɛka fɛ soo kɔnɔ, Erebɛka ye olu ta k'u don a dencɛfitini Yakuba kaan na.

¹⁶A ye badengolo nɔrɔ Yakuba bolow la, n'a kaan yɔrɔ nuguninw na.

¹⁷O kɔ, a tun ye dumuni ni buru min labɛn, a y'o di a dencɛ Yakuba ma.

¹⁸Yakuba tagar'a facɛ fɛ k'a fɔ a ye ko: «Baba.» Isiyaka ko: «Naamu. Ne deen, jɔn lo?»

¹⁹Yakuba y'a faa jaabi ko: «Ne Ezawu lo, i dencɛ fɔlɔ. I ye min fɔ n ye, n y'o kɛ. Ne b'i daali, i ka wili ka sigi ka ne ka sogo ɲimi, janko i ka se ka duba kɛ ne ye.»

²⁰Isiyaka y'a fɔ a dencɛ ye ko: «Ne deen, i y'a sɔrɔ kelen cogo di?» Yakuba y'a jaabi ko: «Masaba, i ka Ala ye ne dɛmɛ.»

²¹Isiyaka y'a fɔ Yakuba ye ko: «Ne deen, gwɛrɛ ne la, ne k'i mɔmɔ k'a filɛ yala n'i ye ne dencɛ Ezawu yɛrɛ le ye.»

²²Yakuba gwɛrɛl'a faa Isiyaka la, a y'a mɔmɔ k'a fɔ ko: «Yakuba kumakan lo, nga bolow ye Ezawu bolow ye.»

²³A ma Yakuba lɔn, bari sii tun b'a bolow kan i n'a fɔ a kɔrɔcɛ Ezawu bolow. O la, a ye duba kɛ a ye.

²⁴A ko: «I ye ne dencɛ Ezawu ye tiɲɛ na wa?» Yakuba ko: «Ɔnhɔn.»

²⁵Isiyaka ko: «Ne deen, sogo di ne ma, ne k'a ɲimi, ka sɔrɔ ka duba kɛ i ye.» Yakuba y'a d'a ma, a y'a ɲimi. A nana ni duvɛn fana ye, a y'o min.

²⁶O kɔ, a faa Isiyaka y'a fɔ a ye ko: «Ne deen, gwɛrɛ ne la ka i bolo meleke n na.»

²⁷ Yakuba gwɛrɛl'a la k'a bolo meleke a la. A faa Isiyaka y'a ka fani kasa mɛn tuma min na, a ye duba kɛ a ye ko: «Anhaan! Ne dencɛ kasa be i n'a fɔ foro kasa, Masaba ka nɛɛma be min kan.

²⁸Ala ka komiji d'i ma ka bɔ sankolo la ka dugukolo nafa d'i ma k'i ka suman n'i ka duvɛnkɛnɛ caya.

²⁹ Siya wɛrɛw ka baara kɛ i ye, u k'u kunbiri gwan i kɔrɔ. I ka kɛ i balimaw kuntigi ye, i badenw k'u kunbiri gwan i kɔrɔ. Minw mana i danga, olu danganin lo, minw mana duba kɛ i ye, olu ta ka ɲa.»

³⁰Isiyaka tilara duba kɛli la Yakuba ye. Yakuba bɔr'a fɛ dɔrɔn, a kɔrɔcɛ Ezawu nana ka bɔ kongo la yaalayɔrɔ la.

³¹A fana ye dumuni diman tobi ka taga n'a ye a faa fɛ. A y'a fɔ a ye ko: «Ne faa, wili k'i deen ka sogo ɲimi janko i ka duba kɛ a ye.»

³²A faa Isiyaka y'a ɲininga ko: «Jɔn lo?» A y'a jaabi ko: «Ne ye i dencɛ ye, i dencɛ fɔlɔ Ezawu.»

³³Isiyaka yɛrɛyɛrɛla kosɔbɛ k'a fɔ ko: «Jɔn le ye sogo ɲini ka n'a di ne ma sa? Ne ye dumuni kɛ ka ban ka duba kɛ o tigi ye sanni i ka na. O tigi ye dubaden ye tiɲɛ na.»

³⁴Ezawu y'a faa ka kuma mɛn dɔrɔn, a digir'a la kosɔbɛ fɔɔ a ye kulekanba bɔ k'a fɔ a faa ye ko: «Duba kɛ ne fana ye kɛ, baba!»

³⁵Isiyaka ko: «I dɔgɔcɛ ye namara kɛ k'i ka duba sɔrɔ.»

³⁶ Ezawu ko: «U y'a tɔgɔ la ko Yakuba. O bɛnna, bari a ye namara kɛ ne la siɲɛ fila. A ye ne ka kɔrɔya minɛ, sisan a ye ne ka duba bɔsi ne la. I ma duba dɔ to ne ye wa?»

³⁷Isiyaka ye Ezawu jaabi ko: «Ne y'a kɛ i kuntigi ye k'a balimaw bɛɛ don a bolo. Ne ye suman ni duvɛnkɛnɛ sɔrɔko duba kɛ a ye. Ne be se ka mun kɛ i ye tugu, ne deen?»

³⁸ Ezawu y'a fɔ a faa ye ko: «O duba dɔrɔn le b'i fɛ wa? Duba kɛ ne fana ye kɛ, baba!» O kɔ, Ezawu kasira kosɔbɛ.

³⁹ A faa Isiyaka y'a jaabi ko: «Dugukolo nafa tena sɔrɔ i sigiyɔrɔ la. A tena komiji fana sɔrɔ ka bɔ sankolo la.

⁴⁰ I bena balo i ka murujan barika la. I bena baara kɛ i baden ye, nga k'i to munumunu na yɔrɔ bɛɛ, i bena se k'o baara nɔgɔya i yɛrɛ ye.»

⁴¹U faa ye duba min kɛ Yakuba ye, Ezawu y'o dimi mara a kɔnɔ Yakuba kama. A y'a fɔ a yɛrɛ kɔnɔ ko: «N faa satuma surunyana. N'o tɛmɛna ka ban, ne bena n dɔgɔcɛ Yakuba faga.»

⁴²U ye Erebɛka dencɛ fɔlɔ Ezawu ka kuma fɔ a ye tuma min na, a y'a dencɛfitini Yakuba wele k'a fɔ a ye ko: «I kɔrɔcɛ Ezawu b'a fɛ k'i faga k'a dimi bɔ.

⁴³O la, n deen, mɛnni kɛ n fɛ. Boli ka taga n kɔrɔcɛ Laban ka soo Aran sisan

⁴⁴ka waati dɔɔni kɛ a fɛ yen fɔɔ i kɔrɔcɛ dusu ka suma.

⁴⁵N'a dusu sumana, i ye koo min kɛ a la, n'o bɔra a kɔnɔ tuma min na, ne bena cira bila i ma ko i ka na. Mun na ne ben'a to ne be bɔnɛ aw fila bɛɛ la loon kelen na?»

⁴⁶Erebɛka y'a fɔ Isiyaka ye ko: «Iti deen nunu ye diɲɛ nigɛ bɔ ne la. [1] Ni Yakuba ye olu ɲɔgɔn dɔ furu jamana nin denmusow cɛma kɔni, kuun t'a la ne ka to sii la tugu.»