Read dyu Koow daminɛ kitabu 29 Bible Online

Koow daminɛ kitabu 29 - dyu bible

Koow daminɛ kitabu 29

¹O kɔ, Yakuba ye sira minɛ tugu ka taga kɔrɔn fɛ mɔgɔw ka jamana na.

²O yɔrɔ la, a ye kɔlɔn dɔ ye kongo kɔnɔ. A ye sagakulu saba lanin ye o daa la, bari u tun be jii bɔ o kɔlɔn nin kɔnɔ k'a di sagaw ma. Kɔlɔn nin datugunin tun be ni kabakuru belebeleba dɔ ye.

³Ni sagaw bɛɛ tun lajɛnna yen tuma min na, u dɛndɛbagaw tun be kabakuru nin kɔlɔnkolon k'a bɔ kɔlɔnda la ka jii bɔ k'a di u ma, ka kɔsegi k'a tugu yen.

⁴Yakuba ye sagadɛndɛbagaw ɲininga ko: «Ne balimaw, aw bɔra min?» U y'a jaabi ko: «An bɔra Aran.»

⁵A y'a fɔ u ye ko: «Aw be Nawɔri mamaden Laban lɔn wa?» U ko: «An b'a lɔn.»

⁶A y'u ɲininga ko a ka kɛnɛ wa. U ko a ka kɛnɛ, ko a denmuso Arasɛli natɔ filɛ n'a ka sagaw ye.

⁷Yakuba ko: «Tile ma ban fɔlɔ. Begɛn lajɛntuma ma se. Aw ka jii di sagaw ma ka segi n'u ye u ka ɲiminikɛyɔrɔ la.»

⁸U y'a jaabi ko: «An te se k'o kɛ fɔɔ sagakuluw bɛɛ ka lajɛn, u ka sɔrɔ ka kabakuru kɔlɔnkolon k'a bɔ kɔlɔnda la. O tuma na, an bena jii di sagaw ma.»

⁹Ka Yakuba to kuma na n'u ye, Arasɛli sera n'a facɛ ka sagaw ye, bari a tun ye sagadɛndɛbaga ye.

¹⁰Yakuba y'a belencɛ Laban denmuso Arasɛli ye, ka Laban ka sagaw ye dɔrɔn, a gwɛrɛla ka kabakuru nin kɔlɔnkolon k'a bɔ kɔlɔnda la ka jii di a belencɛ ka sagaw ma.

¹¹O kɔ, a ye Arasɛli fo, k'a daminɛ ka kasi kosɔbɛ.

¹²A tun y'a fɔ Arasɛli ye ko ale ye a faa ka somɔgɔ dɔ ye, ko a ye Erebɛka dencɛ ye. Arasɛli bolila ka taga o fɔ a facɛ ye.

¹³Laban y'a dɔgɔmuso dencɛ Yakuba kibaru mɛn minkɛ, a bolila ka ta'a kunbɛn k'a bolo meleke a la k'a fo kosɔbɛ ka taga n'a ye a ka soo. Yakuba ye koo nunu bɛɛ lakali Laban ye.

¹⁴Laban y'a fɔ a ye ko: «Siga t'a la, i ye ne ka somɔgɔ yɛrɛ yɛrɛ ye.» Yakuba ye kalo kelen kuturu kɛ Laban fɛ.

¹⁵Loon dɔ, Laban y'a fɔ Yakuba ye ko: «An ye balimaw ye, o ye tiɲɛ ye, nga o t'a yira ko i ka kan ka baara kɛ ne ye gwansan dɛ! I ka sara bena kɛ min ye, o fɔ ne ye.»

¹⁶O y'a sɔrɔ denmuso fila tun be Laban fɛ. Fɔlɔ tɔgɔ ko Leya, filanan tɔgɔ ko Arasɛli.

¹⁷Leya ɲada tun cɛ ma ɲi, nga Arasɛli tun cɛ ka ɲi, a ɲada tun filɛ ka di.

¹⁸Arasɛli koo tun ka di Yakuba ye kosɔbɛ. A y'a fɔ Laban ye ko: «Ne bena saan wolonwula baara kɛ i ye, n'i be sɔn, i k'i denmuso fitini Arasɛli di ne ma.»

¹⁹Laban ko: «K'a d'i ma, o ka fisa ne ma k'a di cɛɛ wɛrɛ ma. To ne fɛ yan.»

²⁰O la, Yakuba ye baara kɛ saan wolonwula Arasɛli kosɔn, nga Arasɛli koo tun ka d'a ye cogo min na, o waati tun kɛra a ɲana i n'a fɔ tile damani dɔrɔn.

²¹O kɔ, Yakuba y'a fɔ Laban ye ko: «Ne ka muso di ne ma. Ne ka waati latigɛnin dafara, ne b'a fɛ k'a furu.»

²²Laban y'o yɔrɔ mɔgɔw bɛɛ lajɛn ka ɲanagwɛ kɛ.

²³Nga suu kora tuma min na, a y'a denmuso Leya minɛ ka ta'a di Yakuba ma. Yakuba lara n'a ye.

²⁴Laban y'a ka jɔnmuso Zilipa di a denmuso Leya ma a ka kɛ a ka jɔnmuso ye.

²⁵Dugu gwɛra tuma min na, a y'a ye ko Leya lo! Yakuba y'a fɔ Laban ye ko: «I ye mun le kɛ ne la ten? Ne ma baara kɛ i ye Arasɛli lo kama wa? Mun na i ye ne namara?»

²⁶Laban ko: «Ka kɛɲɛ n'an ka landa ye, dɔgɔmuso te se ka furu kɔrɔmuso ɲa.

²⁷I ka kɔɲɔya lɔgɔkun tɔɔ kɛ n'a ye, o kɔ, an ben'a dɔgɔmuso fana d'i ma, i ka sɔrɔ ka saan wolonwula wɛrɛ baara kɛ ne ye ale kosɔn.»

²⁸Yakuba y'a kɛ ten. A ye lɔgɔkun tɔɔ kɛ ni Leya ye. O kɔ, Laban y'a denmuso Arasɛli d'a ma a k'a furu.

²⁹Laban y'a ka jɔnmuso Bila di a denmuso Arasɛli ma k'a kɛ a ka jɔnmuso ye.

³⁰Yakuba lara ni Arasɛli fana ye. Arasɛli koo tun ka d'a ye ka tɛmɛ Leya kan. A ye baara kɛ Laban ye saan wolonwula wɛrɛ kɔnɔ.

³¹Masaba y'a ye ko Leya koo tun man di a cɛɛ ye tuma min na, a ye wolo nɔgɔya a ye, nga Arasɛli tun ma se ka deen sɔrɔ.

³²Leya ye kɔnɔ ta ka dencɛ wolo. A y'a tɔgɔ la ko Urubɛn, [1] bari a ko: «Masaba ye ne ka dusukasi ye. Sisan kɔni, ne koo bena diya n cɛɛ ye.»

³³A ye kɔnɔ ta tugu ka dencɛ wolo. A ko: «Masaba y'a mɛn ko ne koo man di n cɛɛ ye minkɛ, a ye nin fana di ne ma.» O la, a y'a tɔgɔ la ko Simeyɔn. [2]

³⁴A ye kɔnɔ ta tugu ka dencɛ wolo. A ko: «Aa! Sisan kɔni, ne cɛɛ bena nɔrɔ ne la, bari ne ye dencɛ saba wolo a ye.» O la, a y'a tɔgɔ la ko Levi. [3]

³⁵A ye kɔnɔ ta tugu ka dencɛ wolo. A ko: «Sisan ne bena Masaba tanu.» O la, a y'a tɔgɔ la ko Zuda. [4] O kɔ, a ka wolo lɔra.