Read dyu Koow daminɛ kitabu 3 Bible Online

Koow daminɛ kitabu 3 - dyu bible

Koow daminɛ kitabu 3

¹ Masa Ala tun ye kongosogo minw dan, saa le tun ka cegu n'u bɛɛ ye. Saa y'a fɔ muso ye ko: «Tiɲɛ na, Ala y'a fɔ ko aw kana yɔrɔ nin yiriw si deen dumu wa?»

²Muso y'a jaabi ko: «An be se ka yɔrɔ nin yiriw deen dumu.

³Nga yiri min be yɔrɔ nin cɛmancɛ la, Ala ko an kana ale deenw dumu, ko an kana maga a la. Ko n'o tɛ, an bena sa.»

⁴Saa y'a fɔ muso ye ko: «Aw tena sa.

⁵Ala y'a lɔn ko ni aw y'o yiri nin deen dumu loon min na, aw ɲaa bena yɛlɛ, aw bena kɛ i n'a fɔ ale, ka koɲuman ni kojugu lɔn.»

⁶Muso y'a ye k'o yiri nin deen ka di dumu na, ko a fana filɛ ka di, ani ko a be lɔnniya di mɔgɔ ma. A ye dɔ tigɛ k'a dumu ka dɔ di a cɛɛ ma a gɛrɛfɛ, ale fana y'a dumu.

⁷O tuma na, u fila bɛɛ ɲaa yɛlɛla, u y'a lɔn ko u fari lakolon lo. O kosɔn, u ye torofuraburuw kalan ɲɔgɔn na k'u yɛrɛ sutara n'o ye.

⁸Wuladafɛ, tile sumana waati min na, u ye Masa Ala yaalayaalatɔ mankan mɛn yɔrɔɲuman nin kɔnɔ. U dogor'a ɲa yiriw cɛma.

⁹Masa Ala ye cɛɛ wele k'a fɔ a ye ko: «I be min?»

¹⁰Cɛɛ y'a jaabi ko: «Ne y'i mankan mɛn yɔrɔɲuman nin na, ne siranna, ka dogo bari ne fari lakolon lo.»

¹¹Masa Ala ko: «Jɔn y'a fɔ i ye ko i fari lakolon lo? Ne y'a fɔ i ye ko i kana yiri min deen dumu, i y'o dɔ dumu kɛ?»

¹²Cɛɛ y'a fɔ ko: «I ye muso min di ne ma, ale lo ye yiri nin deen dɔ di ne ma, ne y'a dumu.»

¹³ Masa Ala y'a fɔ muso ye ko: «Mun na i y'o kɛ?» Muso y'a fɔ ko: «Saa le ye ne nigɛ, ne y'a dumu.»

¹⁴Masa Ala y'a fɔ saa ye ko: «I y'o kɛ minkɛ, i dangana begɛnw ni kongosogow bɛɛ cɛma! I bena fofo i kɔnɔbara kan, ka buguri dumu i sii bɛɛ la.

¹⁵ Ne bena e ni muso kɛ ɲɔgɔn juguw ye, k'i deenw n'a taw kɛ ɲɔgɔn juguw ye. Muso ka deen bena i kungolo ɲɔɲɔ, i ben'a cin a seen na.»

¹⁶Ala y'a fɔ muso ye ko: «Ne bena i ka deen woloko gwɛlɛya kosɔbɛ. I bena tɔɔrɔ wolowaati la. I cɛɛ nigɛ bena kɛ i la, ale bena kɛ i kuntigi ye.»

¹⁷ Ala y'a fɔ cɛɛ ye ko: «I sɔnna i muso ta ma, ka yiri nin deen dumu, ne tun y'a fɔ k'a gwɛlɛya i ma ko i kana min dumu. O kosɔn, dugukolo dangana i kama. I bena baaragwɛlɛn kɛ i sii bɛɛ la ka sɔrɔ k'i daladumuni sɔrɔ.

¹⁸A bena ŋɔni ni binjugu bɔ i kama, suman le bena kɛ i ka balo ye.

¹⁹I bena i daladumuni sɔrɔ i wasiji la fɔɔ i ka kɔsegi dugukolo kɔnɔ, i bɔra min na. I ye buguri ye, i bena kɔsegi buguri la.»

²⁰Adama y'a muso tɔgɔ la ko Awa, bari adamadenw bɛɛ bamuso lo.

²¹Masa Ala ye golo ta ka delekew dilan Adama n'a muso ye k'u fɛɛrɛbɔ n'o ye.

²² O kɔ, Masa Ala ko: «Sisan, Adama kɛra i n'a fɔ anw, ka koɲuman ni kojugu lɔn ka bɔ ɲɔgɔn na. An k'a bali janko yiri min be sii di mɔgɔ ma, a kana o deen tigɛ k'a dumu, ka to nii la kudayi.»

²³O le y'a to Masa Ala y'a gwɛn ka bɔ Edɛn, yɔrɔɲuman na, ko a ka taga dugukolo sɛnɛ, a bɔra min kɔnɔ.

²⁴A ye cɛɛ gwɛn ka bɔ yen tuma min na, a ye mɛlɛkɛ bisigi dɔw sigi yɔrɔɲuman nin kɔrɔn ɲafan fɛ, minw tɔgɔ ko *serubɛnw, ka murujan manamananin fariman di u ma janko ka yiri nin sira kɔlɔsi, min be sii di mɔgɔ ma.