Read dyu Koow daminɛ kitabu 30 Bible Online

Koow daminɛ kitabu 30 - dyu bible

Koow daminɛ kitabu 30

¹Arasɛli y'a ye ko a ma deen wolo Yakuba ye minkɛ, a kɔrɔmuso keliya donn'a la deen nunu kosɔn. A y'a fɔ Yakuba ye ko: «Deenw di ne ma, n'o tɛ, ne bena sa!»

²Yakuba dimin'a kɔrɔ k'a fɔ ko: «Ne le ye Ala ye wa? Ale lo ye i bali denwolo la.»

³Arasɛli ko: «Ne ka jɔnmuso Bila filɛ. I k'ale minɛ ka la n'a ye janko a ka deen sɔrɔ ne ye. Ne fana bena deenw sɔrɔ ale barika la.»

⁴O la, a y'a ka jɔnmuso Bila di Yakuba ma k'a kɛ a muso ye. Yakuba lara n'a ye.

⁵Bila ye kɔnɔ ta ka dencɛ wolo Yakuba ye.

⁶Arasɛli ko: «Ala ye tiɲɛ di ne ma. A ye ne ka daalili mɛn ka dencɛ di ne ma.» O la, a y'a tɔgɔ la ko Dan. [1]

⁷Arasɛli ka jɔnmuso Bila ye kɔnɔ ta tugu ka dencɛ filanan wolo Yakuba ye.

⁸Arasɛli ko: «Ne ye bondori kɛ ni n kɔrɔmuso ye kosɔbɛ, ne ser'a kɔrɔ.» O la, a ye deen nin tɔgɔ la ko Nɛfutali. [2]

⁹Leya y'a ye ko a ka wolo lɔra minkɛ, a y'a ka jɔnmuso Zilipa di Yakuba ma a k'a kɛ a muso ye.

¹⁰Leya ka jɔnmuso Zilipa ye dencɛ wolo Yakuba ye.

¹¹Leya ko: «Ne kunna diyara koyi!» O la, a y'a tɔgɔ la ko Gadi. [3]

¹²Leya ka jɔnmuso Zilipa ye dencɛ wɛrɛ wolo Yakuba ye siɲɛ filanan na.

¹³Leya ko: «Ne nisɔn diyara dɛ! Musow ben'a fɔ ko ne nisɔn diyanin lo.» O la, a ye deen tɔgɔ la ko Asɛri. [4]

¹⁴*Biletigɛtuma na, Urubɛn tagara kongo kɔnɔ ko a be yiriden dɔw yaala u tun be minw jati densɔrɔfura ye. A ye dɔw sɔrɔ ka na u di a baa Leya ma. Arasɛli y'a fɔ Leya ye ko: «Ne b'i daali, e k'i dencɛ ka yiriden nunu dɔw di ne ma.»

¹⁵Leya y'a jaabi ko: «I ye ne cɛɛ bɔsi ne la, o ka dɔgɔ i ɲana kɛ? I b'a fɛ ka ne deen ka yiriden nunu minɛ fana.» Arasɛli y'a jaabi ko: «Ayiwa, n'i ye i dencɛ ka yiriden nunu dɔw di ne ma, Yakuba bena la n'i ye bii sufɛ.»

¹⁶Yakuba kɔsegitɔ ka bɔ kongo kɔnɔ wulafɛ, Leya bɔra k'a kunbɛn k'a fɔ a ye ko: «I ka kan ka la ne fɛ bii, bari ne ye n dencɛ ka yiridenw di Arasɛli ma janko ka i sɔrɔ.» Yakuba tagara la n'a ye o sufɛ.

¹⁷Ala ye Leya kaan mɛn, Leya ye kɔnɔ ta k'a ka dencɛ duurunan wolo Yakuba ye.

¹⁸A ko: «Ala ye ne sara, bari ne ye n ka jɔnmuso di n cɛɛ ma.» O la, a y'a deen nin tɔgɔ la ko Isakari. [5]

¹⁹Leya ye kɔnɔ ta tugu k'a dencɛ wɔɔrɔnan wolo Yakuba ye.

²⁰A ko: «Ala ye fɛnɲuman di ne ma. Sisan ne cɛɛ bena ne boɲa bari ne ye dencɛ wɔɔrɔ wolo a ye.» O la, a ye deen nin tɔgɔ la ko Zabulɔn. [6]

²¹O kɔ, a ye denmuso wolo k'ale tɔgɔ la ko Dina.

²²Ala hakili tora Arasɛli la k'a kaan mɛn ka deen d'a ma.

²³Arasɛli ye kɔnɔ ta ka dencɛ wolo. A ko: «Ala ye ne ka maloya bɔ n kunna.»

²⁴A y'a tɔgɔ la ko Yusufu. [7] A y'a fɔ ko: «Masaba, i ka dencɛ dɔ wɛrɛ di ne ma ka fara nin kan.»

²⁵Arasɛli ye Yusufu wolo ka ban tuma min na, Yakuba y'a fɔ Laban ye ko: «Ne be sira daali ka segi n faso la.

²⁶Ne ye baara kɛ i ye ne musow ni n deen minw kosɔn, i ka olu di ne ma, ne be taga. Ne ye baara min kɛ i ye, i yɛrɛ b'o lɔn.»

²⁷Laban y'a fɔ a ye ko: «Ni ne koo diyara i ye, to ne fɛ yan, bari ne ye lagwɛli kɛ k'a lɔn ko Masaba ye ne dɛmɛ i kosɔn.

²⁸E k'i ka sara fɔ, ne ben'a d'i ma.»

²⁹Yakuba y'a fɔ a ye ko: «Ne ye baara kɛ i ye cogo min na, i ka begɛnw kɛra cogo min na ne bolo, i yɛrɛ b'o lɔn.

³⁰Sanni ne ka na, dɔɔni lo tun be i bolo, sisan a cayara kosɔbɛ ne bolo, Masaba y'i dɛmɛ ne kosɔn. N'o tɛ, ne bena se ka baara kɛ ne yɛrɛ ka somɔgɔw ye tuma jumɛn?»

³¹Laban y'a ɲininga ko: «Ne ka mun d'i ma?» Yakuba y'a jaabi ko: «Kana foyi di ne ma. Ne bena min fɔ, n'i sɔnna o la, ne bena to k'i ka begɛnw dɛndɛ k'u kɔlɔsi.

³²Ne bena yaala i ka begɛnmisɛnw bɛɛ cɛma bii. Sagaden minw ɲɛgɛɲɛgɛnin bɛ, ani tɔnitɔninin be minw bɛɛ kan, ni saga finmanw, ani baden ɲɛgɛɲɛgɛninw, ni tɔnitɔninin be minw na, o bɛɛ bena bila danna. Olu le bena kɛ ne ka sara ye.

³³N'i nana ne ka sara filɛ sini, ne ka tilenninya bena lɔn. Baa o baa ɲɛgɛɲɛgɛnin tɛ, walima tɔnitɔninin te min na, saga minw finnin tɛ, ni olu dɔ yera ne bolo, o bena jati fɛɛn soɲani ye.»

³⁴Laban ko: «Ayiwa, a ka kɛ ka kɛɲɛ n'i ka kuma ye.»

³⁵O loon kelen na, bakɔrɔnin minw ɲɛgɛɲɛgɛnin lo ani tɔnitɔninin be minw na, ni bamuso minw ɲɛgɛɲɛgɛnin lo ni tɔnitɔninin be minw na, ani saga finmanw bɛɛ, Laban ye olu bɛɛ bɔ k'u don a dencɛw bolo.

³⁶O kɔ, a y'a yɔrɔ jaɲa Yakuba la k'a to Laban ka begɛnmisɛn tɔw dɛndɛ na. Tile saba taama ɲɔgɔn tun b'u cɛ.

³⁷Yakuba ye yiri dɔw bolow tigɛ, o yiri nunu tɔgɔ ko populiyiri, ni amandiyiri, ani pilataniyiri ye. A y'u fara bɔ janko u gwɛmanyɔrɔw ka bɔ.

³⁸A ye bere wɔrɔnin nunu bila begɛnw ka kolokolow bɛɛ kɔnɔ janko u ka to u ɲafɛ n'u be minni kɛ. N'u nana minni kɛ tuma o tuma, u tun ka teli ka yɛlɛ ɲɔgɔn kan.

³⁹U tun be to ka yɛlɛ ɲɔgɔn kan bere nunu kɔrɔ. N'u ye kɔnɔ ta ka jigi, o deen nunu ɲɛgɛɲɛgɛnin lo, walima tɔnitɔninin be kɛ u la.

⁴⁰Yakuba ye sagaden minw bila danna, a tun be to k'olu bila ka yɛlɛ Laban ka begɛn musomanw kan. A kɛra ten, a ye begɛnw sɔrɔ k'o kɛ a yɛrɛ ta ye, a ma sɔn k'u ɲagami ni Laban taw ye.

⁴¹Tuma o tuma ni begɛnmuso ɲanamanw yɛlɛtuma sera, Yakuba tun be bere nunu bila begɛnw kɔrɔ kolokolo kɔnɔ janko u ka yɛlɛ o kɔrɔ.

⁴²Ni begɛnmisɛn minw fasanin lo, a tun te u bila olu kɔrɔ. O la, deen fasaninw kɛra Laban ta ye, deen barikamanw kɛra Yakuba ta ye.

⁴³A kɛra ten, Yakuba kɛra nafolobatigi ye. Begɛnmisɛn caaman tun b'a fɛ, ani jɔnmusow ni jɔncɛw, ni ɲɔgɔmɛw ani faliw fana.