Read dyu Koow daminɛ kitabu 33 Bible Online

Koow daminɛ kitabu 33 - dyu bible

Koow daminɛ kitabu 33

¹Yakuba ko a be filɛli kɛ, a ye Ezawu natɔ ye ni cɛɛ kɛmɛ naani ye. A y'a deenw tilan k'u kalifa Leya ni Arasɛli ani jɔnmuso fila nunu ma.

²A ye jɔnmusow n'u deenw bila ɲafɛ, ka Leya n'a deenw tugu olu kɔ, ka Arasɛli ni Yusufu bila u bɛɛ kɔ.

³Ale yɛrɛ tɛmɛna u ɲa k'a kunbiri gwan duguma siɲɛ wolonwula, n'a be gwɛrɛl'a kɔrɔcɛ la.

⁴Ezawu bolila ka ta'a kunbɛn k'a bolo meleke a kaan na k'a fo kosɔbɛ. U kasira.

⁵O kɔ, Ezawu ko a be filɛli kɛ, a ye musow ni denmisɛnw ye, a ko: «Nunu bɔra min?» Yakuba y'a jaabi ko: «Ala ye deen minw di ne, i ka jɔɔn ma, olu lo.»

⁶O tuma na, jɔnmusow n'u deenw gwɛrɛla k'u kunbiri gwan duguma.

⁷O kɔ, Leya n'a deenw gwɛrɛla k'u kunbiri gwan duguma. O bɛɛ kɔ, Yusufu ni Arasɛli fana gwɛrɛl'a la k'u kunbiri gwan duguma.

⁸Ezawu ko: «Ne ye begɛnkulu minw kunbɛn, o kɔrɔ ye mun ye?» Yakuba y'a jaabi ko: «Janko ne koo ka diya i ye, ne matigi.»

⁹Ezawu ko: «Ne dɔgɔcɛ, fɛɛn min be ne bolo, o be ne bɔ. To n'i ta ye.»

¹⁰Yakuba ko: «Ayi, ne b'i daali, ni ne koo ka d'i ye, i ka sɔn ka ne ka boɲafɛn nunu minɛ. Bari i ye ne minɛ ka ɲa cogo min na, ne y'i ɲada ye, o kɛra i n'a fɔ mɔgɔ ye Ala ɲada ye.

¹¹Ne ye boɲafɛn minw d'i ma, ne b'i daali ko i ka sɔn k'o minɛ, bari Ala makarila ne la, ne mako be fɛɛn min na, o bɛɛ be ne fɛ.» A y'a kɛ wajibiyako ye minkɛ, Ezawu sɔnna k'a minɛ.

¹²Ezawu ko: «Aw ye na an ka taga. An bena taga ɲɔgɔn fɛ.»

¹³Yakuba y'a fɔ a ye ko: «Ne matigi, i y'a lɔn ko denmisɛnw barika ka dɔgɔ, sagamuso ni misimuso dentigiw be yen. N'an ye taama wajibiya n'u ye tile kelen kɔnɔ, begɛn nunu bɛɛ bena sa.

¹⁴Ne matigi, ne b'i daali i ka bila ne ɲa. Ne bena taama begɛnw kɔ dɔɔni dɔɔni ni denmisɛnw ye fɔɔ ka taga se i fɛ *Seyiri mara la.»

¹⁵Ezawu ko: «Ne bena n ka mɔgɔ dɔw to n'i ye.» Yakuba ko: «Mun na? Min ka gwɛlɛ, o ye ne koo ka diya i ye dɔrɔn, ne matigi.»

¹⁶O la, Ezawu ye Seyiri sira minɛ o loon na.

¹⁷Yakuba tagara se Sukɔti, ka soo lɔ yen ka wɛɛrɛw dilan a ka begɛnw ye. O kosɔn, u b'o yɔrɔ wele ko Sukɔti. [1]

¹⁸Yakuba kɔseginin kɔ ka bɔ Aramu jamana na, a sera Sisɛmu dugu la hɛrɛ la, Kanaan jamana na. A tagara sigi dugu gɛrɛfɛ.

¹⁹ A y'a ka fanibugu lɔ yɔrɔ min na, a y'o dugukolo san Sisɛmu faa Amori deenw fɛ warigwɛ kilo kelen ɲɔgɔn na.

²⁰A ye sarakabɔyɔrɔ lɔ yen k'o tɔgɔ la ko «Ala ye Isirayɛli ka Ala ye.» [2]