Read dyu Koow daminɛ kitabu 34 Bible Online

Koow daminɛ kitabu 34 - dyu bible

Koow daminɛ kitabu 34

¹Leya ye denmuso min wolo Yakuba ye, n'a tɔgɔ ko Dina, loon dɔ, ale bɔra ka taga o yɔrɔ sunguruw fɛ.

²Ivicɛ Amori tun ye jamana ɲamɔgɔ ye. A dencɛ Sisɛmu ye Dina ye tuma min na, a y'a minɛ ka la n'a ye fanga na.

³Yakuba denmuso Dina koo diyara Sisɛmu ye kosɔbɛ. A y'a kanu ka kuma diman fɔ a ye.

⁴Sisɛmu y'a fɔ a facɛ Amori ye ko a ka sunguru nin ɲini ale ye furu la.

⁵Yakuba y'a mɛn ko Sisɛmu y'a denmuso Dina ka sunguruya cɛn, nga o y'a sɔrɔ a dencɛw tun be kongo kɔnɔ n'a ka begɛnw ye. O la, a ma foyi fɔ fɔɔ u nana tuma min na.

⁶Sisɛmu facɛ Amori tagara Yakuba sɛgɛrɛ ka kuma a fɛ.

⁷Yakuba dencɛw kɔsegira ka bɔ kongo la. U y'o koo mɛn tuma min na, u dusu kasira, u dimina kosɔbɛ, bari Sisɛmu ye maloyako kɛ Isirayɛli jama cɛma, a lara ni Yakuba denmuso ye, min man kan ka kɛ.

⁸Nga Amori y'a fɔ u ye ko: «Aw denmuso koo diyara ne dencɛ Sisɛmu ye kosɔbɛ. Ne b'aw daali aw k'a d'a ma furu la.

⁹Aw ka lamɔgɔya tugu n'an ye, k'aw denmusow di an ma furu la, k'an denmusow fana furu.

¹⁰Aw be se ka sigi an cɛma, jamana labilanin be aw ye. Aw ye sigi a kɔnɔ ka sanni ni feere kɛ, ani ka nafolo sɔrɔ a kɔnɔ.»

¹¹Sisɛmu y'a fɔ Dina facɛ n'a balimaw ye ko: «Aw mana fɛɛn o fɛɛn fɔ ne ye, ne bena o di janko ne koo ka se ka diya aw ye.

¹²Hali n'aw ye furusɔngɔ caaman fɔ, ni ale yɛrɛ boɲafɛnw, aw mana min fɔ, ne bena o di ka kɛɲɛ n'aw ka kuma ye, janko aw ka sunguru nin di ne ma furu la dɔrɔn.»

¹³Yakuba deenw ye Sisɛmu n'a facɛ Amori jaabi ni namarakuma ye, bari Sisɛmu tun y'u balimamuso Dina ka sunguruya cɛn.

¹⁴U y'a fɔ u ye ko: «An te se k'an balimamuso di cɛɛ kɛnɛkɛnɛbali ma, bari o ye maloyako ye an fɛ.

¹⁵An te sɔn aw ka kuma ma fɔɔ ni aw kelen kelen bɛɛ kɛnɛkɛnɛna ka kɛ i n'a fɔ anw.

¹⁶O tuma na, an bena se k'an denmusow di aw ma, k'aw denmusow furu. An bena sigi n'aw ye ka kɛ kelen ye.

¹⁷Nga ni aw ma sɔn ka kɛnɛkɛnɛ, ayiwa, an bena an balimamuso minɛ ka taga n'a ye.»

¹⁸U ka kuma diyara Amori n'a dencɛ Sisɛmu ye.

¹⁹Mɔgɔw tun be kanbelen nin boɲa kosɔbɛ a faa ka somɔgɔw bɛɛ cɛma. Yakuba deenw ye min fɔ, a teliyara k'o kɛ, bari Yakuba denmuso koo tun diyar'a ye kosɔbɛ.

²⁰Amori n'a dencɛ Sisɛmu tagara u ka dugu donda la ka kuma dugu mɔgɔw fɛ.

²¹U ko: «Juguya si te mɔgɔ nunu kɔnɔ an faan fɛ. An k'a to u ka sigi an ka jamana kɔnɔ ka jago kɛ. Jamana ka bon, an be kun a kɔnɔ. An be se k'u denmusow furu, k'an denmusow di u ma fana.

²²Nga mɔgɔ nunu tena sɔn ka sigi n'an ye an ka kɛ kelen ye, fɔɔ ni an sɔnna kɛnɛkɛnɛko la. Cɛɛw bɛɛ ka kɛnɛkɛnɛ i n'a fɔ olu.

²³U ka misiw, n'u ka nafolo, n'u ka begɛn tɔw bɛɛ tena kɛ an ta ye wa? An ka sɔn u ta ma, o la, u bena sigi n'an ye.»

²⁴Cɛɛ minw bɔra ka taga dugu donda la, olu bɛɛ sɔnna Amori n'a dencɛ Sisɛmu ka kuma ma. Dugu kɔnɔ cɛɛw bɛɛ kɛnɛkɛnɛna.

²⁵O tile sabanan loon, k'u bɛɛ to u ka kɛnɛkɛnɛko dimi la, Yakuba dencɛ fila, Simeyɔn ni Levi, minw ye Dina kɔrɔcɛw ye, olu y'u ka murujanjanw ta ka taga dugu kɔnɔ. Dugu kɔnɔ mɔgɔw tun te foyi kala ma, u ye cɛɛw bɛɛ faga.

²⁶U ye Amori n'a dencɛ Sisɛmu faga ni murujan ye, ka Dina minɛ ka bɔ Sisɛmu ka soo kɔnɔ ka taga.

²⁷Yakuba deen tɔw tagara suu nunu yɔrɔ la ka dugu nafolo bɛɛ cɛ, bari u tun y'u balimamuso ka sunguruya cɛn.

²⁸U y'u ka begɛnmisɛnw n'u ka misiw ani u ka faliw minɛ, ka fara u ka dugu kɔnɔ fɛɛnw ni u ka foro kɔnɔ fɛɛnw bɛɛ kan.

²⁹U y'u ka nafolo bɛɛ cɛ, k'u ka denmisɛnw n'u ka musow bɛɛ minɛ, ka soo kɔnɔ minanw bɛɛ cɛ ka taga n'u ye.

³⁰Yakuba y'a fɔ Simeyɔn ni Levi ye ko: «Aw ye ne bila koo la ka ne koo goya jamana nin mɔgɔw ye, minw ye kanaanw ni periziw ye. Anw man ca. U bena ɲɔgɔn lajɛn ne kama ka ne kɛlɛ, ka ne ni n ka soo halaki.»

³¹U y'a jaabi ko: «A tun bɛnnin lo a k'an balimamuso minɛ i n'a fɔ kakalamuso wa?»