Read dyu Koow daminɛ kitabu 35 Bible Online

Koow daminɛ kitabu 35 - dyu bible

Koow daminɛ kitabu 35

¹ Ala y'a fɔ Yakuba ye ko: «Wili ka taga sigi Betɛli, ka sarakabɔyɔrɔ lɔ ne Ala ye o yɔrɔ la, ne min tun ye n yɛrɛ yira i la i bolituma na i kɔrɔcɛ Ezawu ɲa.»

²O la, Yakuba y'a fɔ a ka somɔgɔw ni a ka mɔgɔw bɛɛ ye ko: «Siya wɛrɛw ka joo minw be aw fɛ, aw k'o bɛɛ fili, k'aw yɛrɛ saniya, ka fani wɛrɛw don.

³O kɔ, an ka wili ka taga Betɛli. Ne bena sarakabɔyɔrɔ lɔ Ala ye o yɔrɔ la, min ye ne ka daalili jaabi ne degunlon na, ani ka to ne fɛ ne taayɔrɔw bɛɛ la.»

⁴Siya wɛrɛw ka joo minw tun b'u fɛ, u ye olu bɛɛ di Yakuba ma, ani minw tun be u tulo la. Yiriba dɔ tun be Sisɛmu gɛrɛfɛ, a ye dingɛ sogi o kɔrɔ k'u don yen.

⁵O kɔ, u ye sira minɛ ka taga. Ala ye siranya bila u laminiduguw la kosɔbɛ, o la, olu ma tugu u kɔ.

⁶Yakuba n'a ka mɔgɔw sera Luzi, min ye Betɛli ye bii, Kanaan jamana na.

⁷A ye sarakabɔyɔrɔ lɔ yen, k'o yɔrɔ tɔgɔ la ko Betɛli ka Ala, bari Ala tun y'a yɛrɛ yira a la o yɔrɔ la tuma min na a tun be bolil'a kɔrɔcɛ ɲa.

⁸Erebɛka lamɔbaga Debora sara. U y'a suu don joyiri dɔ jukɔrɔ Betɛli gɛrɛfɛ, ka tɔgɔ la yiri nin kan ko Kasikan.

⁹Yakuba seginin kɔ ka bɔ Aramu jamana na, Ala y'a yɛrɛ yira a la tugu ka barika don a la.

¹⁰ Ala y'a fɔ a ye ko: «I tɔgɔ ko Yakuba. Nga i tena wele Yakuba tugu, i tɔgɔ bena kɛ Isirayɛli ye.» O la, a y'a tɔgɔ la ko Isirayɛli.

¹¹ Ala y'a fɔ a ye ko: «Ne ye Setigi Ala ye. Ne bena deen caaman d'i ma, k'i kɔmɔgɔw caya. I bena kɛ siya faa ye, i yɛrɛ bena kɛ siya caaman faa ye. Masacɛw bena bɔ i kɔmɔgɔw la.

¹²Ne ye jamana min di Ibrayima ni Isiyaka ma, ne bena o d'i ma, k'a d'i kɔmɔgɔw ma.»

¹³O kɔ, Ala tagara k'a to yen o yɔrɔ la.

¹⁴ Ala tun kumana Yakuba fɛ yɔrɔ min na, a ye kabakuru lɔ yen, ka jii ni tulu bɔn a kan.

¹⁵Ala tun kuman'a fɛ yɔrɔ min na, a y'o yɔrɔ tɔgɔ la ko Betɛli. [1]

¹⁶U bɔra Betɛli ka taga se yɔrɔ dɔ la, o yɔrɔ ni Efarata tun ka jan dɔɔni. Arasɛli jigira o yɔrɔ la, a jigiko gwɛlɛyara.

¹⁷K'a to o gwɛlɛya kɔnɔ, muso min tun b'a dɛmɛna ka jigi, ale y'a fɔ a ye ko a kana siran, ko a ye dencɛ wɛrɛ sɔrɔ.

¹⁸A tun be ɲini ka sa tuma min na, a ye deen nin tɔgɔ la ko Bɛnoni. Nga deen faa y'a tɔgɔ la ko Bɛnzamɛn. [2]

¹⁹Arasɛli sara, u y'a suu don Efarata sira daa la, dugu min be wele fana ko Bɛtilehɛmu.

²⁰Yakuba ye kabakuru dɔ tutu a kaburu kan. A be yen halibi ka Arasɛli kaburu yɔrɔ yira.

²¹Isirayɛli tagara ɲafɛ k'a ka fanibugu lɔ Migidaledɛri kɔfɛ.

²² Ka Isirayɛli to o mara la, Urubɛn lara n'a facɛ ka gɛrɛfɛmuso Bila ye. Isirayɛli y'o kibaru mɛn. Yakuba ye dencɛ tan ni fila le sɔrɔ.

²³Leya ka deenw tun ye: Yakuba deen fɔlɔ Urubɛn, ni Simeyɔn ni Levi ni Zuda ni Isakari ani Zabulɔn ye.

²⁴Arasɛli taw tun ye Yusufu ni Bɛnzamɛn ye.

²⁵Arasɛli ka jɔnmuso Bila ka deenw tun ye Dan ni Nɛfutali ye.

²⁶Leya ka jɔnmuso Zilipa taw tun ye Gadi ni Asɛri ye. Olu le tun ye Yakuba ka dencɛw ye minw wolola k'a to Aramu jamana na.

²⁷ Yakuba ser'a facɛ Isiyaka fɛ Manbure, Kiriyataraba gɛrɛfɛ, u be min wele Eburɔn bii, Ibrayima ni Isiyaka tun sigira yɔrɔ min na.

²⁸Isiyaka sii bɛɛ lajɛnnin tun ye saan kɛmɛ ni bi seegi ye.

²⁹A kɔrɔla kosɔbɛ ka sɔrɔ ka sa, ka ta'a faaw fɛ. A dencɛ Ezawu ni Yakuba y'a suu don.