Read dyu Koow daminɛ kitabu 39 Bible Online

Koow daminɛ kitabu 39 - dyu bible

Koow daminɛ kitabu 39

¹Isimayɛliden nunu tagara ni Yusufu ye Ezipiti jamana na. Ezipiti masacɛ kɔlɔsibagaw kuntigi Potifari y'a san olu fɛ.

² Yusufu tor'a kuntigi ka soo. Masaba tun b'a fɛ kosɔbɛ.

³A kuntigi y'a ye ko Masaba be ni Yusufu ye, ko n'a ko a be koo o koo kɛ, o be ɲa a fɛ.

⁴A koo diyar'a kuntigi ye kosɔbɛ, ale y'a don a ka baara la, k'a bololafɛnw bɛɛ kalifa a ma, k'a sigi a ka soo kunna.

⁵Tuma min na Potifari ye Yusufu sigi a ka soo, ani a ka bololafɛn bɛɛ kunna, Masaba ye barika don Ezipiticɛ nin ka soo la Yusufu kosɔn, k'a ka soo n'a ka foro kɔnɔ fɛɛnw yiriwa.

⁶A tun y'a ka fɛɛn bɛɛ to Yusufu bolo, ale tun te foyi si kɛ tugu ni dumuni dama tɛ. Yusufu tun cɛ ka ɲi kosɔbɛ.

⁷Waati dɔ nana se, a kuntigi muso ɲaa bɔr'a fɛ, ale y'a fɔ a ye ko: «Na la ni ne ye.»

⁸A banna, a y'a fɔ a ye ko: «Ne kuntigi y'a bolo bɔ koo bɛɛ la soo kɔnɔ, a ye sokɔnɔfɛnw bɛɛ kalifa ne ma.

⁹Mɔgɔ si te soo nin kɔnɔ min ka fisa ni ne ye, a ma ne bali foyi la fɔɔ ele dama, bari e y'a ka muso ye. Mun na ne bena kojuguba kɛ ani ka Ala hakɛ ta?»

¹⁰Loon o loon a tun be to ka o kuma kelen fɔ Yusufu ye, nga Yusufu ma sɔn ka mɛnni kɛ a fɛ.

¹¹Loon dɔ, Yusufu donna soo kɔnɔ ko a be baara kɛ, o y'a sɔrɔ soo kɔnɔ baarakɛla si tun te yen.

¹²Muso nin ye Yusufu minɛ a ka fani ma, k'a fɔ a ye ko a ka la n'ale ye. Yusufu y'a ka fani wulan k'a to a bolo ka boli ka bɔ kɛnɛma.

¹³Muso nin y'a ye ko a y'a ka fani wulan k'a to ale bolo ka boli ka bɔ kɛnɛma minkɛ,

¹⁴a y'a ka baarakɛlaw wele k'a fɔ u ye ko: «Aw yɛrɛ ka nin filɛ sa! U nana ni eburu nin ye, waasa a ka to k'a ɲaa don an na! A nana ko fɔɔ a be la ni ne ye, ne kulera.

¹⁵A y'a ye ko ne be kulera kosɔbɛ dɔrɔn, a wilila k'a ka fani to ne gɛrɛfɛ ka boli ka bɔ kɛnɛma.»

¹⁶Muso nin ye Yusufu ka fani bila a gɛrɛfɛ fɔɔ a cɛɛ nana tuma min na.

¹⁷A ye o kuma kelen fɔ a cɛɛ ye ko: «I nana ni jɔncɛ eburu min ye, ale lo donna ne kan ko fɔɔ a be la ni ne ye.

¹⁸Nga ne kulera dɔrɔn, a wilila ka boli ka bɔ kɛnɛma k'a ka fani to ne gɛrɛfɛ.»

¹⁹Yusufu kuntigi y'a muso ka kuma mɛn ka ban tuma min na, ko: «A filɛ sa, i ka jɔɔn ye min kɛ,» a dimina kosɔbɛ

²⁰ka Yusufu minɛ k'a don kaso la, masacɛ ka kasodenw tun be boon min na. Ka Yusufu to kaso la,

²¹ Masaba tor'a fɛ, k'a koo diya kasobon kɔlɔsibaga ye.

²²Ale ye Yusufu bila ko a ka to ka kasoden tɔw bɛɛ kɔlɔsi. Foyi si tun te kɛ yen ni ale sababu tɛ.

²³Ni kasobon kɔlɔsibaga tun ye min to Yusufu bolo, a tun te o filɛ tugu, bari Masaba tun be ni Yusufu ye, ka to ka koo bɛɛ ɲa a bolo.