Read dyu Koow daminɛ kitabu 4 Bible Online

Koow daminɛ kitabu 4 - dyu bible

Koow daminɛ kitabu 4

¹Adama jɛnna n'a muso Awa ye. Awa ye kɔnɔ ta ka Kayɛn wolo. A ko: «Ne ye dencɛ sɔrɔ Masaba barika la.»

²O kɔ, a ye Kayɛn dɔgɔcɛ Abɛli wolo. Abɛli tun ye begɛnmarabaga ye, Kayɛn tun ye sɛnɛkɛla ye.

³Waati dɔ nana se, Kayɛn y'a ka sɛnɛfɛn dɔw bɔ saraka ye Masaba ye.

⁴ Abɛli y'a ka begɛnw ka deen fɔlɔ dɔw n'u tulu bɔ saraka ye. Masaba sɔnna Abɛli n'a ka saraka la,

⁵nga a ma sɔn Kayɛn n'a ta la. O la, Kayɛn dimina kosɔbɛ, a ɲaa kumuna.

⁶Masaba y'a fɔ Kayɛn ye ko: «Mun na i dimina, mun na i ɲaa kumuna?

⁷N'i ye koɲuman kɛ, i kuun bena kɔrɔta. Nga n'i te koɲuman kɛ, hakɛ yɔrɔ man jan i la. A b'i dɛndɛna, nga e kɔni ka ban.»

⁸ O bɛɛ n'a ta, Kayɛn y'a fɔ a dɔgɔcɛ Abɛli ye ko u ka taga kongo la. K'u to kongo la, Kayɛn wilil'a dɔgɔcɛ Abɛli kama k'a faga.

⁹Masaba y'a fɔ Kayɛn ye ko: «I dɔgɔcɛ Abɛli be min?» Kayɛn y'a jaabi ko: «Ne m'a lɔn. Ne le ye n dɔgɔcɛ kɔlɔsibaga ye wa?»

¹⁰ Masaba ko: «I ye mun le kɛ? K'i dɔgɔcɛ joli to duguma, a kulekan sera ne ma.

¹¹Sisan, dugukolo min y'i dɔgɔnin joli min, i dangana o kan.

¹²N'i ye dugukolo sɛnɛ, i ka suman tena ɲa i bolo tugu. I bena to yaala la tuma bɛɛ dugukolo kan, sigiyɔrɔ tena sɔrɔ i fɛ.»

¹³Kayɛn y'a fɔ Masaba ye ko: «Ne ka jalaki tɔɔrɔ ka bon, ne te se k'o muɲu.

¹⁴I ye ne gwɛn ka bɔ nin yɔrɔ la bii, ne bena dogo i la. Ne bena kɛ yaalabaga ye dugukolo kan tuma bɛɛ, sigiyɔrɔ tena kɛ n fɛ. Ni mɔgɔ o mɔgɔ ye ne ye, a bena ne faga.»

¹⁵Masaba y'a fɔ a ye ko: «Ayi. Ni mɔgɔ min ye e Kayɛn faga, a jurusara bena bɔ o tigi la fɔɔ siɲɛ wolonwula.» Masaba ye taamasiɲɛ dɔ kɛ Kayɛn la janko ni mɔgɔ o mɔgɔ y'a ye, o kan'a faga.

¹⁶O kɔ, Kayɛn bɔra Masaba ɲakɔrɔ ka taga sigi Nɔdi [1] jamana na Edɛn kɔrɔn ɲafan na.

¹⁷Kayɛn jɛnna n'a ka muso ye, a muso ye kɔnɔ ta ka Enɔki wolo. Kayɛn ye dugu sigi k'a dencɛ tɔgɔ la o dugu kan ko Enɔki.

¹⁸Enɔki ye Iradi wolo. Iradi ye Mewuyayɛli wolo, Mewuyayɛli fana ye Mɛtusayɛli wolo, Mɛtusayɛli ye Lamɛki wolo.

¹⁹Lamɛki ye muso fila furu, kelen tɔgɔ ko Ada, kelen tɔgɔ ko Sila.

²⁰Ada ye Yabali wolo. Mɔgɔ minw be begɛnw mara n'u be sigi ka yaala, olu bɛɛ bɛma le ye Yabali ye.

²¹Ale dɔgɔcɛ tɔgɔ ko Yubali. Gɔni ni filefiyɛbagaw bɛɛ bɛma le y'ale ye.

²²Sila fana ye dencɛ wolo, a tɔgɔ ko Tubalikayɛn. Ale lo tun be zira ni nigɛfɛn sifaw bɛɛ dilan. Tubalikayɛn dɔgɔmuso tɔgɔ ko Naama.

²³Lamɛki y'a fɔ a musow ye ko: «Ada ni Sila, aw ye mɛnni kɛ ne fɛ. Lamɛki musow, aw k'aw tulo malɔ. Ne ye mɔgɔ faga ka n ka mandimi juru sara, ne ye kanbelen faga bari a ye ne bugɔ.

²⁴ Kayɛn ta juru bena sara siɲɛ wolonwula, nga Lamɛki ta bena sara siɲɛ bi wolonwula ni wolonwula!»

²⁵Adama jɛnna n'a ka muso ye tugu. A muso ye dencɛ wolo k'a tɔgɔ la ko Sɛti. A ko: «Kayɛn ye Abɛli faga, Ala ye deen wɛrɛ di n ma tugu Abɛli nɔɔ na.»

²⁶Sɛti fana ye dencɛ sɔrɔ k'a tɔgɔ la ko Enɔsi. O waati la, mɔgɔw y'a daminɛ ka Masaba bato.