Read dyu Koow daminɛ kitabu 40 Bible Online

Koow daminɛ kitabu 40 - dyu bible

Koow daminɛ kitabu 40

¹O koow tɛmɛnin kɔ, loon dɔ, Ezipiti masacɛ ka baarakɛla fila y'a hakɛ ta: a ka dɔrɔ dibagaw kuntigi n'a ka buru dilanbagaw kuntigi.

²Masacɛ dimina kuntigi fila nunu kɔrɔ, minw ye a ka dɔrɔ dibagaw kuntigi ye, ni burudilanbagaw kuntigi.

³A kɔlɔsibagaw kuntigi be kasobon min kunna, a y'u datugu yen, Yusufu tun datugunin be yɔrɔ min na fana.

⁴Kasodenw kɔlɔsibagaw kuntigi y'u ka koɲa to Yusufu bolo, a ka to k'u filɛ. U ye waati dɔ kɛ kaso la yen.

⁵Loon dɔ sufɛ, u fila bɛɛ sikora k'u to kaso la, Ezipiti masacɛ ka dɔrɔ dibaga n'a ka buru dilanbaga. Kɔrɔ tun be o siko nunu kelen kelen bɛɛ la.

⁶O dugusagwɛ, Yusufu donna u ka yɔrɔ la k'a sɔrɔ u ɲaa sisinin lo.

⁷A y'u ɲininga ko: «Mun y'a to aw ɲaa kumunin lo bii?»

⁸U y'a jaabi ko: «An sikora, mɔgɔ si te yan ka siko nunu kɔrɔ fɔ an ye.» Yusufu y'a fɔ u ye ko: «Siko kɔrɔ fɔ koo te Ala ka koo ye wa? Aw ka siko nunu lakali ne ye.»

⁹Dɔrɔ dibagaw kuntigi y'a ka siko lakali Yusufu ye. A ko: «Ne sikora k'a ye ko *ɛrɛzɛnsun dɔ tun be ne ɲakɔrɔ.

¹⁰Bolo saba tun be ɛrɛzɛnsun nin na. A nugura ka feeren kɛ, a deenw mɔnna.

¹¹Ezipiti masacɛ ka minfilen tun be ne bolo, ne ye ɛrɛzɛn nunu tigɛ k'u bisi a ka filen kɔnɔ k'a don a bolo.»

¹²Yusufu y'a fɔ a ye ko: «O kɔrɔ filɛ nin ye. Bolo saba nunu ye tile saba ye.

¹³Yanni tile saba, masacɛ bena i kuun kɔrɔta, k'i bila i ka baarakɔrɔ la tugu. I bena masacɛ ka filen don a bolo i n'a fɔ i tun be to k'o kɛ cogo min na.

¹⁴Nga n'i ye hɛrɛ sɔrɔ tuma min na, e k'i hakili to ne la ka koɲuman kɛ ne ye. Ne b'i daali i ka ne koo fɔ masacɛ ye ka ne bɔ kaso nin kɔnɔ.

¹⁵Bari u ye ne minɛ ka bɔ eburuw ka jamana na ka na ni ne ye fanga na. Ne ma foyi kɛ yan fana min ka kan ni kaso ye.»

¹⁶Burudilanbagaw kuntigi y'a ye ko Yusufu ye kɔrɔ min fɔ siko nin la, k'o ka ɲi. A y'a fɔ Yusufu ye ko: «Ne fana sikora. Buru tun be sinsin saba kɔnɔ ne kuun na.

¹⁷Masacɛ ka dumunifɛn wusuninw sifa bɛɛ tun be sanfɛ sinsin kɔnɔ, nga kɔnɔw tun be o dumuna sinsin kɔnɔ ne kuun na.»

¹⁸Yusufu y'a jaabi ko: «O kɔrɔ filɛ nin ye. Sinsin saba nunu ye tile saba ye.

¹⁹Yanni tile saba, masacɛ bena i kuun tigɛ k'i dulon yiri la. Kɔnɔw bena i suu dumu.»

²⁰O tile sabanan loon le tun ye masacɛ ka wololon ɲanagwɛ ye. A ye dumuniba dilan a ka dugu kuntigiw bɛɛ ye. A ye dɔrɔ dibagaw kuntigi ni burudilanbagaw kuntigi bɔ kaso la a ka baaradenw ɲana.

²¹A ye dɔrɔ dibagaw kuntigi sigi tugu a ka baara la, o la, a y'a daminɛ tugu ka to ka masacɛ ka filen don a bolo.

²²Nga a ye burudilanbagaw kuntigi dulon i n'a fɔ Yusufu tun y'a fɔ u ye cogo min na a ka siko kɔrɔ fɔtuma na.

²³Dɔrɔ dibagaw kuntigi hakili ma to Yusufu la, a ɲinɛn'a kɔ.